कात्रजमधील ‘त्या’ तरुणाच्या खूनप्रकरणी मोठी अपडेट; पोलिसांनी दिली धक्कादायक माहिती

चुलत भावाचा खून केल्याप्रकरणी अटकेत असलेल्या आरोपीच्या चौकशीत त्याने साथीदारांना चार लाख रुपयांची सुपारी दिल्याची धक्कादायक माहिती तपासात मिळाली आहे.

• कात्रजमधील तरुणाच्या खूनप्रकरणी मोठी अपडेट
• पोलिसांनी दिली धक्कादायक माहिती
• आरोपींना ठोकल्या बेड्या

पुणे : नात्यातील महिलेशी अनैतिक संबंध असल्याच्या संशयावरुन चुलत भावाचा खून केल्याप्रकरणी अटकेत असलेल्या आरोपीच्या चौकशीत त्याने साथीदारांना चार लाख रुपयांची सुपारी दिल्याची धक्कादायक माहिती तपासात मिळाली आहे. खून प्रकरणातील साक्षीदार हा खून प्रकरणात सामील असल्याची माहिती मिळाल्यानंतर भारती विद्यापीठ पोलिसांनी तिघांना अटक केली आहे.

कात्रजमधील गुजरवाडी परिसरात अजयकुमार गणेश पंडीत (वय २२, सध्या रा. साईनगर, खोपडेगनर, कात्रज, मूळ रा. हजारीबाग, झारखंड) याचा तीक्ष्ण शस्त्राने वार करुन खून केला होता. याप्रकरणी भारती विद्यापीठ पोलिसांनी तपास करुन अजयकुमारचा चुलतभाऊ अशोक कैलास पंडीत (वय ३५, सध्या रा. मोशी, पिंपरी-चिंचवड) याला अटक केली होती. १७ नोव्हेंबर रोजी ही घटना उघडकीस आली होती. ही कारवाई परिमंडळ दोनचे पोलिस उपायुक्त मिलिंद मोहिते यांच्या मार्गदर्शनाखाली वरिष्ठ निरीक्षक राहुल खिलारे, सहायक निरीक्षक स्वप्निल पाटील, उपनिरीक्षक नीलेश मोकाशी, सचिन सरपाले, नवनाथ भोसले, सागर बोरगे, महेश बारावकर, मंगेश पवार, मंगेश गायकवाड, किरण साबळे, निलेश खैरमोडे, अवधुत जमदाडे, सोनाली पिलणे यांनी केली.

भारती विद्यापीठ पोलिसांनी अशोकला अटक केल्यानंतर त्याच्याकडे चौकशी केली. तेव्हा अजयचे नात्यातील महिलेशी अनैतिक संबंध होते. याची माहिती अशोकला मिळाल्यानंतर त्याने अजयचा खून केल्याचे प्रथम समोर आले. त्यानूसार, अशोक याला अटक केली. अशोककडे चौकशी केली असता त्याने अजयकुमारचा खून करण्यासाठी साथादीर कृष्णकुमार विजयमहतो वर्मा (वय २१), सचिनकुमार शंकर पासवान (वय २६), तसेच खूनातील पहिला साक्षीदार रणजीतकुमार धनुखी यादव (वय ३०) यांना चार लाख रुपयांची सुपारी दिल्याचे समोर आले. तसेच, या गुन्ह्यात तेही सहभागी असल्याचे समोर आले. त्यानूसार या चौघांचा शोध गेतला असता ते पुणे रेल्वे स्थानकातून रेल्वेने झारखंडला पसार होणार असल्याचे समजले. पोलिसांनी तत्काळ कृष्णकुमार, सचिनकुमार, रणजितकुमार यांना अटक केली. तिघे आरोपी कात्रजमधील साईनगर परिसरात बांधकाम साईटवर मजुरी करत होते.