व्यावसायिक गॅसचा काळाबाजार उघड; सिंहगड रोड पोलिसांनी ७२ सिलेंडर केले जप्त

व्यावसायिक गॅसचा काळाबाजार पुन्हा एकदा समोर आला असून, सिंहगड रोड पोलिसांनी छापा कारवाई करून तब्बल ७२ गॅसचे सिलेंडर पकडले आहेत.

सौजन्य - नवराष्ट्र टीम

Follow Us:

Follow Us:

पुणे/अक्षय फाटक : व्यावसायिक गॅसचा काळाबाजार पुन्हा एकदा समोर आला असून, सिंहगड रोड पोलिसांनी छापा कारवाई करून तब्बल ७२ गॅसचे सिलेंडर पकडले आहेत. याप्रकरणी पोलिसांनी एकाला अटक केली असून, त्याच्याकडे कसून चौकशी केली जात आहे. पोलिसांनी टेम्पो तसेच गॅसचे सिलेंडर असा दहा लाखांचा ऐवज जप्त केला आहे.

याप्रकरणी पोलिसांनी सोमनाथ लहु भोजने (वय ३१, रा. वडगाव बुद्रुक, मुळ. तुळजापूर) याला अटक केली आहे. तर, सिलेंडर विक्री करण्यास देणाऱ्या विकाश धोंडाप्पा आकळे (रा. वडगाव बुद्रुक) याच्यावर गुन्हा नोंदवला आहे. याप्रकरणी सिंहगड रोड पोलिसांत भारतीय न्याय संहिता २०२३ चे कलम २८७, २८८, ३ (५) सह जिवनावश्यक वस्तुचा कायदा १९५५ चे कलम ३, ७ अन्वये गुन्हा दाखल केला आहे. ही कारवाई वरिष्ठ निरीक्षक परिमंडळ तीनचे उपायुक्त संभाजी कदम यांच्या मार्गदर्शनाखाली वरिष्ठ निरीक्षक दिलीप दाईंगडे, उपनिरीक्षक संतोष भांडवलकर, देवा चव्हाण यांच्या पथकाने केली आहे.

हे सुद्धा वाचा : शेकोटीला शेकत बसलेल्या तरुणाला दांडक्याने मारहाण; पळून जाताना पाठलाग केला अन्…

पुणे शहरात व्यावसायिक तसेच घरघुती गॅसचा काळा बाजार सातत्याने होत असल्याचे दिसत आहे. घरघुती गॅसमधून व्यावसायिकांना अवैधरित्या तो इतर टाक्यांमध्ये टाकून गॅस विकला जात आहे. दरम्यान, सिंहगड रोड पोलीस ठाण्यातील तपास पथकाचे उपनिरीक्षक संतोष भांडवलकर व त्यांचे पथक हद्दीत गस्त घालत होते. तेव्हा त्यांना माहिती मिळाली की, वडगाव भाजी मंडई येथून गोयल गंगाकडे जाणाऱ्या रस्त्यावर सिलबंद व्यावसायिक गॅस सिलेंडरची अवैधरित्या विक्री होत आहे. त्यानूसार, लागलीच उपनिरीक्षक भांडवलकर व त्यांच्या पथकाने येथे धाव घेतली. सापळा रचून सोमनाथ याला ताब्यात घेतले. त्यावेळी तो टेम्पोत सिलेंडर घेऊन विक्री करत असल्याचे सांगितले. अधिक चौकशीत त्याला या सिलेंडर मालक विकास आकळे यांनी दिल्याचे सांगितले आहे. पोलिसांनी एचपी तसेच भारत कंपनीचे तब्बल ७२ गॅस सिलेंडर आणि टेम्पो असा १० लाख २८ हजार रुपयांचा ऐवज जप्त केला आहे. अधिक तपास उपनिरीक्षक संतोष भांडवलकर करत आहेत.

जैन मंदिरात चोऱ्या करणारा अटकेत

जैन साधकांचा वेष परिधान करून जैन मंदिरात घुसून चोऱ्या करणाऱ्या एकाला स्वारगेट पोलिसांनी जेरबंद केले. त्याने पुण्यासह राज्यातील घाटकोपर वाई, चिखली, डोंबिवली अशा ठिकाणी देखील चोऱ्या केल्याची माहिती समोर आली असून, पैशांची चणचण भासत असल्याने चोऱ्या केल्याचे समोर आले आहे. त्याच्याकडून सव्वा चार लाखांचा ऐवज जप्त करण्यात आला आहे. नरेश आगरचंद जैन (वय ४५, रा. बोम्बे चाळ, सी.पी. टैंक गिरगाव, व्ही. पी. रोड, मुंबई) असे अटक केलेल्या आरोपीचे नाव आहे. ही कारवाई परिमंडळ दोनच्या उपायुक्त स्मार्तना पाटील यांच्या मार्गदर्शनाखाली वरिष्ठ निरिक्षक युवराज नांद्रे, पोलीस अंमलदार शंकर संपते, सागर केकाण, कुंदन शिंदे व त्यांच्या पथकाने केली आहे.

Web Title: Pune police has uncovered the black market of commercial gas and seized 72 cylinders nrdm

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com