Raigad News: रायगडच्या टकमक टोकावरून युवक बेपत्ता; ड्रोनने शोध घेतला अन् ८०० फूट खोल दरीत दिसला मृतदेह!
रायगड : किल्ले रायगडावरील टकमक टोकावरून उडी घेतल्याचा संशय असलेल्या ३७ वर्षीय युवकाचा मृतदेह अखेर बचाव पथकाला शोधण्यात यश आले आहे. टकमक टोकाखाली निजामपूरच्या बाजूला सुमारे ८०० फूट खोल दरीत हा मृतदेह आढळून आला. प्रतिकूल वातावरण, दाट धुके, घनदाट झाडी आणि अत्यंत तीव्र उतार अशा आव्हानात्मक परिस्थितीत बचाव पथकाने शोधमोहीम राबवली. सध्या मृतदेह दरीतून सुरक्षितपणे बाहेर काढण्यासाठी प्रयत्न सुरू आहेत.
मिळालेल्या माहितीनुसार, सुयोग पांचाळ शनिवारी किल्ले रायगडावर आला होता. त्यानंतर त्याने घरी फोन करून आपण टोकाचे पाऊल उचलत असल्याचे सांगितले. या फोननंतर काही वेळातच त्याचा मोबाईल बंद झाला. त्याच्याशी संपर्क होत नसल्याने कुटुंबीय चिंतेत पडले आणि त्यांनी तातडीने रायगडाच्या पायथ्याशी धाव घेतली. पायथ्याशी सुयोगची दुचाकी आढळून आली. मात्र, सुयोगचा ठावठिकाणा लागत नसल्याने कुटुंबीयांनी पोलिसांना माहिती दिली.
घटनेची माहिती मिळताच महाड तालुका पोलीस, स्थानिक नागरिक आणि आपत्कालीन बचाव पथक रायगडावर दाखल झाले. रात्री उशिरापर्यंत परिसरात शोध घेण्यात आला. मात्र, प्रचंड अंधार, दाट धुके आणि टकमक टोकाखालील अत्यंत धोकादायक दरी यामुळे सुरक्षेच्या कारणास्तव रात्री शोधकार्य थांबवण्यात आले.
रविवारी सकाळी उजाडताच बचाव पथकाने पुन्हा शोधमोहीम सुरू केली. दरीचा मोठा विस्तार आणि भौगोलिक परिस्थिती लक्षात घेऊन ड्रोन कॅमेऱ्यांची मदत घेण्यात आली. ड्रोनच्या माध्यमातून शोध घेत असताना निजामपूरच्या दिशेला सुमारे ८०० फूट खोल दरीत सुयोगचा मृतदेह आढळून आला.
मृतदेहाचा ठाव लागला असला तरी तो दरीतून वर आणणे हे बचाव पथकासमोर मोठे आव्हान आहे. मृतदेह आढळलेल्या ठिकाणी घनदाट झाडी, तीव्र उतार आणि खोल दरी असल्याने बचावकार्य अत्यंत जोखमीचे आहे. सध्या रेस्क्यू टीम दरीत उतरून मृतदेह सुरक्षितपणे बाहेर काढण्यासाठी शर्थीचे प्रयत्न करत आहे. सुयोगने टोकाचे पाऊल का उचलले, याचे कारण अद्याप स्पष्ट झालेले नाही. पोलीस या घटनेमागील कारणाचा तपास करत आहेत.
.png "Videos"){kind=small}
