
Murder Case: दिवाळीच्या सुट्टीसाठी गावी आली अन् काळाने गाठलं! प्रेमसंबंध तोडण्याच्या रागातून तरुणाने धारदार शस्त्राने केले वार अन्
पोलिसांनी दिलेल्या प्राथमिक माहितीनुसार, मृत राजाक्का खरात या कामानिमित्त पुणे येथे वास्तव्यास होत्या. दिवाळीच्या सुट्टीनिमित्त त्या आपल्या मूळगावी कंठी येथे आल्या होत्या. राजाक्का यांचे गावातीलच मनोज कोळेकर या तरुणासोबत मागील काही काळापासून प्रेमसंबंध होते. मात्र, कामानिमित्त बाहेर राहणाऱ्या राजाक्का यांनी या नात्यापासून अंतर ठेवण्यास सुरुवात केली होती.
रविवारी सायंकाळी संशयित मनोज कोळेकर याने राजाक्का यांना भेटण्यासाठी आणि पुन्हा प्रेमसंबंध ठेवण्यासाठी तगादा लावला. मात्र, राजाक्का यांनी त्याला स्पष्ट नकार दिला. हा नकार मनोजच्या जिव्हारी लागला आणि संतापाच्या भरात त्याने हे टोकाचे पाऊल उचलले.
नकाराच्या रागाने अंध झालेल्या मनोज कोळेकर याने थेट राजाक्का यांचे घर गाठले. त्यांच्यात जोरदार बाचाबाची झाल्यानंतर, मनोजने जवळील धारदार शस्त्राने राजाक्का यांच्यावर सपासप वार केले. या भीषण हल्ल्यात राजाक्का रक्ताच्या थारोळ्यात कोसळल्या आणि त्यांचा जागीच मृत्यू झाला. या अचानक घडलेल्या घटनेमुळे संपूर्ण परिसरात दहशत पसरली.
घटनेची माहिती मिळताच जत पोलीस ठाण्याचे पथक तात्काळ घटनास्थळी दाखल झाले. पोलिसांनी मृतदेह ताब्यात घेऊन शवविच्छेदनासाठी पाठवला. तांत्रिक तपासाची चक्रे वेगाने फिरवत पोलिसांनी अवघ्या काही तासांत मुख्य आरोपी मनोज कोळेकर याला त्याच्या एका साथीदारासह बेड्या ठोकल्या. या प्रकरणात आणखी कोणाचा सहभाग आहे का, याचा कसून तपास जत पोलीस करत आहेत.