बुधवार, 23 सप्टेंबर 2026
सौजन्य फोटो - सोशल मिडीया
पुणे : चांगल्या आयुष्याच्या आणि भविष्यातील शोधात यूएईतील शारजाह येथे गेलेल्या कर्नाटकातील एल्विन प्रकाश कुंदर यांची जुलैमध्ये निर्घृण हत्या झाल्याचा धक्कादायक प्रकार समोर आला आहे. हत्येनंतर त्यांच्या मृतदेहाचे नऊ तुकडे करून ते दोन बॅगमध्ये ठेवण्यात आल्याचे कुटुंबीयांनी सांगितले. ओमानच्या दिशेने जाणाऱ्या मार्गावर एका कारमध्ये त्यांचा मृतदेह आढळला. दरम्यान, प्रकाश यांची पत्नी टीना आणि त्यांचा दहावीत शिकणारा मुलगा कुठे आहेत, याबाबत अद्याप स्पष्ट माहिती मिळालेली नाही. हत्येचे कारण आणि संशयितांची ओळखही अद्याप अधिकृतपणे जाहीर करण्यात आलेली नाही. एल्विन प्रकाश कुंदर हे कर्नाटकातील उडुपी जिल्ह्यातील कुंडापूर येथील रहिवासी होते. ते गेल्या सुमारे १४ वर्षांपासून शारजाह विमानतळावर काम करत होते. ते पत्नी टीना आणि मुलासोबत शारजाहमध्ये राहत होते. टीना या शाळेत शिक्षिका असून त्यांचा मुलगा दहावीत शिकत आहे. गेल्या वर्षी डिसेंबरमध्ये प्रकाश भारतात आले होते. त्यानंतर ते पुन्हा शारजाहला गेले होते.
प्रकाश यांचे भाऊ अनिल प्रशांत कुंदर यांनी सांगितले की, २० जुलैच्या सुमारास त्यांनी प्रकाश यांना फोन केला. मात्र, प्रकाश यांनी फोन न उचलता संदेशाद्वारे आपण ठीक असल्याचे कळवले. हा प्रकार कुटुंबीयांना संशयास्पद वाटला. कारण प्रकाश नेहमी व्हॉइस मेसेजद्वारे संवाद साधत होते. त्यानंतर पुन्हा संपर्क साधण्याचा प्रयत्न केला असता कोणताही प्रतिसाद मिळाला नाही. त्यामुळे अनिल यांनी शारजाहमध्ये असलेल्या प्रकाश यांच्या वर्गमित्र मनोहर यांच्याशी संपर्क साधून प्रकाश यांची माहिती घेण्यास सांगितले. मनोहर प्रकाश राहत असलेल्या कंपनीच्या निवासस्थानी गेले. तेथे वॉचमनने प्रकाश भारतात गेल्याचे सांगितल्याचे कुटुंबीयांचे म्हणणे आहे. कंपनीच्या एचआर विभागाकडूनही सुरुवातीला प्रकाश भारतात गेल्याचे सांगण्यात आले. मात्र, अनिल यांनी प्रकाश भारतात परतले नसल्याचे स्पष्ट केले. त्यानंतर कंपनीने पासपोर्टची माहिती तपासली असता प्रकाश अजूनही शारजाहमध्ये असल्याचे समोर आल्याचे सांगण्यात आले. त्यानंतर त्यांच्या बेपत्ता होण्याची तक्रार दाखल करण्यात आली.
शोध सुरू असताना ओमानच्या दिशेने जाणाऱ्या मार्गावर उभ्या असलेल्या कारमध्ये प्रकाश यांचा मृतदेह आढळल्याचे कुटुंबीयांनी सांगितले. मृतदेहाचे नऊ तुकडे करून दोन बॅगमध्ये ठेवण्यात आले होते. त्यानंतर मृतदेहाची ओळख प्रकाश कुंदर म्हणून करण्यात आली. हत्येचा नेमका उद्देश काय होता, याबाबत अद्याप अधिकृत माहिती समोर आलेली नाही. शारजाह प्रशासनाकडून संशयितांची ओळख किंवा हत्येमागील कारण जाहीर करण्यात आलेले नसल्याचे वृत्त आहे.
प्रकाश यांच्या मृत्यूनंतर त्यांची पत्नी टीना आणि मुलाचा ठावठिकाणा स्पष्ट झालेला नाही. काही वृत्तांमध्ये दोघे शारजाहमधून भारतात आल्याची शक्यता व्यक्त करण्यात आली आहे. मात्र, याची अधिकृत पुष्टी झालेली नाही. तसेच टीना यांचा हत्येत सहभाग असल्याचा कोणताही ठोस पुरावा किंवा अधिकृत निष्कर्ष सध्या उपलब्ध नाही. कुटुंबीयांनीही प्रकाश आणि टीना यांच्यात कोणत्याही वादाची माहिती नसल्याचे सांगितले आहे.
प्रकाश यांचे भाऊ अनिल यांनी उडुपीच्या पोलिस अधीक्षकांची भेट घेऊन या प्रकरणात मदत करण्याची मागणी केली आहे. यूएईतील कायदेशीर प्रक्रिया पूर्ण झाल्यानंतर प्रकाश यांचा मृतदेह भारतात आणण्याची कुटुंबीयांना प्रतीक्षा आहे. तसेच हत्या नेमकी कशी झाली, मृतदेह कोणत्या परिस्थितीत आढळला आणि प्रकाश यांच्या पत्नी व मुलाचा ठावठिकाणा काय आहे, याबाबत अधिक माहिती देण्याची मागणी कुटुंबीयांनी केली आहे.
