Mumbai News: वॉर्डमध्ये डॉक्टर आले नाहीत, सहकारी खोलीत पोहोचला; बाथरूम उघडताच निवासी डॉक्टर मृतावस्थेत

रुग्णालयात न आल्याने सहकाऱ्याने घेतला शोध

पोलिसांनी दिलेल्या माहितीनुसार, शनिवारी शिवचरण पाटील रुग्णालयातील वॉर्डमध्ये कामासाठी आले नसल्याचे लक्षात आले. ते रुग्णालयाच्या पीजी वसतीगृहात राहत असल्याने त्यांच्या रूम पार्टनरला खोलीत जाऊन पाहण्यास सांगण्यात आले. सहकारी खोलीत पोहोचला असता शिवचरण दिसून आले नाहीत. त्यांना फोन केला असता मोबाईलचा आवाज बाथरूममधून ऐकू आला. त्यामुळे सहकाऱ्याला संशय आला आणि त्याने याबाबत इतरांना माहिती दिली. त्यानंतर पोलिसांना घटनास्थळी बोलावण्यात आले.

हेही वाचा: पुण्यात संस्थाचालकाची फिल्मी स्टाईल फसवणूक ! ५० कोटींचा चेक दाखवला, बदल्यात ८७ लाख घेतले; पेट्या उघडताच निघाल्या…

बाथरूममध्ये आढळले मृतावस्थेत

पोलिसांनी बाथरूमचा दरवाजा उघडल्यानंतर शिवचरण पाटील मृतावस्थेत आढळून आले. त्यांच्या हाताला IV सलाईन लावलेली होती. तसेच कमोडमध्ये ॲनेस्थेशियाच्या औषधांच्या दोन बाटल्या आढळल्या. प्राथमिक तपासात त्यांनी हे औषध स्वतःच्या शरीरात घेतले असावे, असा संशय व्यक्त करण्यात आला आहे. मृत्यूचे नेमके कारण स्पष्ट होण्यासाठी एडीआर रिपोर्टनंतर शवविच्छेदन करण्यात येणार आहे. नातेवाईकांना सायन रुग्णालयात किंवा त्यांच्या इच्छेनुसार अन्य ठिकाणी शवविच्छेदन करण्याचा पर्याय देण्यात आला आहे. सायन रुग्णालयाचे अधिष्ठाता डॉ. प्रमोद इंगळे यांनी सांगितले की, शिवचरण पाटील हे होतकरू भावी सर्जन होते. त्यांच्या निधनामुळे रुग्णालयाने एक गुणी डॉक्टर गमावला आहे. या घटनेमागील नेमके कारण पोलिस तपासातून समोर येईल. रुग्णालयाकडून या प्रकरणाची अंतर्गत चौकशीही करण्यात येणार आहे. विद्यार्थ्यांच्या मानसिक आरोग्याबाबत अधिक संवेदनशील राहून त्यांना आवश्यक मानसिक बळ देण्याचा प्रयत्न केला जाईल, असेही त्यांनी सांगितले.