घरखर्चाचा वाद बेतला जीवावर; संतापलेल्या मुलाने थेट बापाच्या पोटात भोसकला स्क्रू ड्रायव्हर
नागपूर : घरखर्चात हातभार लावण्यावरून बाप-लेकात झालेल्या वादाचे पर्यवसान हाणामारीत झाले. संतापलेल्या मुलाने स्क्रू ड्रायव्हर उचलून वडिलांच्या पोटात भोसकला. ही खळबळजनक घटना लकडगंज पोलिस ठाण्यांतर्गत गंगाबाई घाट, गरोबा मैदान परिसरात घडली. गंभीर जखमी झालेल्या वडिलांचा उपचारादरम्यान तिसऱ्या दिवशी मृत्यू झाला.
बबलू सहारे (वय ५६) असे मृताचे नाव असून, याप्रकरणी लकडगंज पोलिसांनी त्यांचा मुलगा तुषार सहारे (वय २३) याला अटक केली आहे. न्यायालयाने तुषारला २३ सप्टेंबरपर्यंत पोलिस कोठडी सुनावली आहे. मिळालेल्या माहितीनुसार, बबलू सहारे हे आरमशिनवर काम करत होते. ते पत्नी ममता (वय ४५) आणि मुलगा तुषार यांच्यासोबत राहत होते. तुषार विवाहित असून, तो घरातून साईन बोर्ड तयार करण्याचे काम करत होता. मुलगा मोठा झाल्याने त्यानेही घरखर्चात हातभार लावावा, अशी बबलू यांची अपेक्षा होती.
विशेषतः वीज बिल भरण्यासाठी पैसे देण्यावरून दोघांमध्ये वारंवार वाद होत असल्याचे प्राथमिक तपासात समोर आले आहे. १६ सप्टेंबरच्या रात्री १० वाजता याच मुद्यावरून बाप-लेकामध्ये पुन्हा वाद झाला. दारूच्या नशेत असलेल्या बबलू यांनी तुषारचा गळा दाबला. झटापटी दरम्यान तुषारने जवळील पेचकस उचलून बबलू यांच्या पोटात भोसकला. या हल्ल्यात बबलू गंभीर जखमी झाले.
तातडीने रुग्णालयात केले दाखल
रक्तबंबाळ अवस्थेत त्यांना उपचारासाठी घराजवळच्या रुग्णालयात नेण्यात आले. प्रकृती गंभीर असल्याने डॉक्टरांनी चांगल्या दवाखान्यात घेऊन जाण्यास सांगितले. त्यानंतर दुसऱ्या दिवशी त्यांना मेयो रुग्णालयात दाखल करण्यात आले.
उपचारानंतर घरी आणले मात्र नंतर…
उपचारानंतर बबलू यांना कुटुंबीयांनी घरी आणले. मात्र, १९ सप्टेंबरला अचानक बबलू यांची प्रकृती खालावली. त्यांना तत्काळ उपचारार्थ शताब्दी चौकातील खासगी रुग्णालयात दाखल केले. उपचारादरम्यान सायंकाळी ६ वाजता त्यांचा मृत्यू झाला. ममता सहारे यांच्या तक्रारीवरून लकडगंज पोलिसांनी तुषारविरुद्ध सदोष मनुष्यवधाचा गुन्हा दाखल करून त्याला अटक केली.
.png "Videos"){kind=small}
