बुधवार, 12 ऑगस्ट 2026
अंघोळीसाठी गेलेल्या विद्यार्थ्याचा कालव्यात बुडून मृत्यू; मित्रांच्या डोळ्यांदेखत वाहून गेल्याने खळबळ
चंद्रपूर : मित्रांसोबत अंघोळीसाठी गेलेला विद्यार्थी गोसेखुर्द कालव्यात वाहून गेला. ही घटना सावली शहरानजीक मंगळवारी उघडकीस आली. नैतिक विठ्ठल शेडमाके (वय १५, रा. सावली) असे वाहून गेलेल्या विद्यार्थ्यांचे नाव आहे. तो सावली येथील रमाबाई आंबेडकर विद्यालयात इयत्ता दहावीत शिकत होता. नैतिकचा शोध घेण्यासाठी पोलिसांसह बचाव पथकाकडून शोधमोहीम सुरू करण्यात आली होती. घटनास्थळापासून 10 किमी अंतरावर मुलाचा मृतदेह सापडला.
सोमवारी दुपारी नैतिक हा दोन मित्रांसह गोसेखुर्द कालव्यावर अंघोळीसाठी गेला होता. अंघोळ करत असताना अचानक पाण्याचा प्रवाह वाढल्याने नैतिकचा पाण्यावरील तोल सुटला आणि तो प्रवाहासोबत वाहून जाऊ लागला. मित्राने डोळ्यांसमोर वाहून जाताना पाहिल्याने दोन्ही मित्र घाबरले आणि तेथून निघून गेले. घाबरलेल्या मित्रांनी या घटनेची माहिती तत्काळ कोणालाही दिली नाही.
दरम्यान, नैतिक संध्याकाळपर्यंत घरी न परतल्याने कुटुंबीयांनी त्याचा सर्वत्र शोध घेतला. मात्र, त्याचा ठावठिकाणा लागला नाही. अखेर संशय आल्याने कुटुंबीयांनी त्याच्या मित्रांकडे चौकशी केली असता, कालव्यावर घडलेली घटना समोर आली.
शिरोडा-वेळागर समुद्रात 8 पर्यटक बुडाले
दुसऱ्या एका घटनेत, सिंधुदुर्ग जिल्ह्यातून एक मोठी बातमी समोर आली आहे. सिंधुदुर्ग जिल्ह्यातील शिरोडा वेळागर समुद्रात 8 पर्यटक बुडाले आहेत. यामध्ये तिघांचा मृत्यू झाल्याचे समोर आले आहे. तर चार पर्यटकांना वाचवण्यात यश आले आहे.
कालव्यात बुडून तरुणाचा मृत्यू
पाण्याचा अंदाज न आल्याने बुडून यापूर्वी अनेकांचा मृत्यू झाल्याच्या घटना समोर आल्या आहेत. असे असताना आता गोसेखुर्द धरणाच्या कालव्यात बुडून एका तरूणाचा मृत्यू झाला. सत्यपाल नीलकंठ सलामे (वय 26, रा. कोरंभी) असे या तरुणाचे नाव आहे. सत्यपाल सलामे याच्या मृत्यूने हळहळ व्यक्त केली जात आहे. गोसेखुर्द धरणाच्या कालव्यात त्याचा बुडून मृत्यू झाला. ही घटना उघडकीस आली. सत्यपाल हा शेळीपालन व मजुरीचेही काम करत होता. बुधवारी (दि. 23) तो सकाळी दहाच्या सुमारास आपल्या आईला शेळ्यांसाठी चारा आणायला जातो, असे सांगून सायकलने घराबाहेर पडला होता. मात्र, संध्याकाळी 4 वाजेपर्यंत घरी परतला नाही.
हेदेखील वाचा : आंघोळीसाठी पाण्यात उतरलेल्या तरुणाचा जबलपूरच्या नदीत बुडून मृत्यू; पर्यटनच बेतलं जीवावर
