"हत्येसाठी कोणते शस्त्र चांगले, हातोडा की चाकू?" 18 वर्षीय मुलाने AI ला विचारले अन् मग...
कृत्रिम बुद्धिमत्तेचा (Artificial Intelligence) जगभरात मोठ्या प्रमाणावर वापर केला जात आहे. वैद्यकीय औषधांपासून ते मुलांच्या गृहपाठापर्यंत प्रत्येक गोष्टीसाठी याचा वापर होत आहे. मात्र अनेक प्रकरणांमध्ये, याचे गंभीर परिणाम देखील होऊ लागले आहेत. युनायटेड किंगडममधील (UK) उत्तर वेल्समधून एक हृदयद्रावक बातमी समोर येत आहे. एका १८ वर्षीय मुलाने, एआयच्या (AI) मदतीने, आपल्याच आईची हत्या केली. खुनाची पद्धत अत्यंत भयानक होती. खुनापूर्वी, मुलाने एआयला (AI) खुनाच्या पद्धती आणि रक्त कसे साफ करावे याबद्दल टिप्स विचारल्या होत्या. आता न्यायालयाने मुलाला जन्मठेपेची शिक्षा सुनावली आहे.
मोल्ड क्राउन कोर्टातील खटल्याच्या सुनावणीदरम्यान धक्कादायक खुलासे झाले. २३ ऑक्टोबर, २०२५ रोजी, १८ वर्षीय ट्रिस्टन रॉबर्ट्सने आपल्या ४५ वर्षीय आई, अँजेला शेलिस, यांना ४ पौंड वजनाच्या हातोड्याने मारून ठार केले. कोर्टाला सांगण्यात आले की, ट्रिस्टनने ‘डीपसीक’ नावाच्या एका एआय (AI) सर्च इंजिनकडून खुनाबद्दल सल्ला मागितला होता. त्याने त्या चॅटबॉटला लिहिले, “भिंती, फरशी आणि अंथरुणावरून रक्ताचे डाग आणि शिंतोडे काढण्याचा सर्वात सोपा मार्ग कोणता आहे, हे मला सांगा.”
आरोपीने विचारले, “खुनासाठी कोणते शस्त्र चांगले आहे, हातोडा की चाकू?” सुरुवातीला, त्या एआयने या धोकादायक प्रश्नाचे उत्तर देण्यास नकार दिला. पण हा धूर्त मुलगा तिथेच थांबला नाही. त्याने एआयला खोटे सांगितले की तो सीरियल किलरवर एक पुस्तक लिहित आहे, ज्यानंतर एआयने त्याला उत्तर दिले. सरकारी वकील अँड्र्यू थॉमस केसी यांनी न्यायालयाला सांगितले, “डिप्सीने सुचवले की एका अननुभवी मारेकऱ्यासाठी हातोडा हा एक चांगला पर्याय असेल आणि त्याने दोन्ही शस्त्रांचे फायदे आणि तोटे देखील समजावून सांगितले.”
त्याने डिक्टाफोनवर संपूर्ण भयानक घटनेचे ऑडिओ रेकॉर्डिंग केले. हे रेकॉर्डिंग एकूण साडेचार तासांचे होते. हे ऑडिओ न्यायालयात ऐकवण्यात आले नाही कारण ते खूप अस्वस्थ करणारे मानले गेले. सरकारी वकील थॉमस यांनी स्पष्ट केले, “त्याने एक सलग रेकॉर्डिंग केले आहे, ज्यात सुरुवातीच्या हल्ल्यापासून ते शेवटच्या प्राणघातक घावापर्यंत सर्व काही समाविष्ट आहे.” रेकॉर्डिंगमध्ये, ट्रिस्टन असे म्हणताना ऐकू येतो: “हाच तो क्षण आहे जेव्हा आपण हे करणार आहोत. आपण त्याला हातोड्याने मारणार आहोत.”
न्यायालयाला सांगण्यात आले की रॉबर्ट्सने रात्री ११ वाजण्याच्या सुमारास हत्या करण्यास सुरुवात केली आणि पहाटे ३:३० वाजेपर्यंत त्या सुरू ठेवल्या. त्याने प्रथम घरात आपल्या आईवर हल्ला केला, नंतर तिला वैद्यकीय मदत आणण्याच्या बहाण्याने बाहेर नेले. या दरम्यान, त्याने आपल्या आईला मास्क घालायला लावला आणि फक्त त्याच्या मागे येण्यास सांगितले.
तो रेल्वे लाईन ओलांडून आपल्या आईला एका निर्जन बागेत घेऊन गेला. तिला एका बाकावर बसवल्यानंतर त्याने आपला हातोडा बाहेर काढला. रेकॉर्डिंगमधून हे उघड होते की, जेव्हा त्याच्या आईने ते शस्त्र पाहिले, तेव्हा ती मोठ्याने किंचाळली, पण त्या निर्दयी मुलाने जराही दया दाखवली नाही. त्याने हातोड्याने आपल्या आईच्या डोक्यावर सलग चार वेळा प्रहार केला. त्यानंतर रेकॉर्डिंगमध्ये अँजेला “मी तिला मारले… माझे झाले,” असे ओरडताना ऐकू येते. डोक्याला झालेल्या गंभीर दुखापतीमुळे वेदनांनी तडफडत अँजेलाचा मृत्यू झाला. त्यानंतर त्याने तिचा मृतदेह सुमारे १०० मीटर ओढत नेऊन झुडपात लपवला.
ट्रिस्टनने खुनाच्या काही आठवड्यांपूर्वीच हा कट रचला होता. तो वारंवार ऑनलाइन खुनाची प्रकरणे, पद्धती आणि शस्त्रे यावर संशोधन करत होता. त्याने डिस्कॉर्ड या सोशल मीडिया प्लॅटफॉर्मवर महिलांविरुद्ध द्वेषपूर्ण पोस्ट्सही टाकल्या होत्या. त्याने सांगितले की त्याला विश्वासघात झाल्यासारखे आणि अस्वस्थ वाटत होते. तो त्याच्या सर्व त्रासांसाठी त्याच्या आईला जबाबदार धरत होता. त्याने लिहिले होते की तो “सूड, न्याय आणि बदला” घेण्यासाठी त्याच्या आईला मारत आहे. १८ ऑक्टोबर रोजी, त्याने ॲमेझॉनवरून ऑनलाइन अनेक हातोडे, कुऱ्हाडीला धार लावण्यासाठी एक दगड, प्लास्टिकचे पत्रे आणि हातमोजे विकत घेतले.
मृत अँजेला शेलिस या एक शिक्षण सहाय्यक होत्या. ट्रिस्टनला ऑटिझम आणि एडीएचडी (ADHD) चा त्रास होता. त्याची आई त्याला उपचार आणि मदत मिळवून देण्यासाठी सतत प्रयत्न करत होती. खुनाच्या काही दिवस आधी, १७ ऑक्टोबर रोजी, अँजेलाने एका सामाजिक कार्यकर्त्याला आणि मित्रांना मेसेज करून कळवले की तिच्या मुलाने एक चाकू आणि हातोडा विकत घेतला आहे. घाबरून, तिने तिच्या फोनवर एक चिठ्ठीसुद्धा लिहिली होती, ज्यात तिने विचारले होते, “का? त्याला या गोष्टींची काय गरज आहे? तो मला, स्वतःला की आणखी कोणाला इजा पोहोचवण्याचा विचार करत आहे? का?” हा खून आधीच पूर्णपणे नियोजित होता.
या भीषण गुन्ह्यासाठी, न्यायाधीश राइस रोललँड्स यांनी ट्रिस्टन रॉबर्ट्सला जन्मठेपेची शिक्षा सुनावली. त्याला किमान २२ वर्षे आणि सहा महिने तुरुंगात काढावे लागतील. न्यायाधीश म्हणाले, “असे दिसते की, तू तुझ्या आईची हत्या करताना खूप आनंद घेतलास. एखाद्या व्यक्तीचा मृत्यू होण्याचा हा एक भयानक आणि वेदनादायी मार्ग होता.”
.png "Videos"){kind=small}
