सोनगाव मंदिरातील खून प्रकरणात मोठी अपडेट; न्यायालयाने आरोपीला सुनावली जन्मठेपेची शिक्षा

बारामती तालुक्यातील सोनगाव येथील सोनेश्वर मंदिरात युवराज आबासाहेब थोरात यांचा किरकोळ कारणावरून चाकूने भोसकून खून केल्याचा गुन्हा सिद्ध झाला आहे.

• सोनगाव मंदिरातील खून प्रकरणात मोठी अपडेट
• आरोपीला सुनावली जन्मठेपेची शिक्षा
• चाकूने भोसकून खून केल्याचा गुन्हा सिद्ध

बारामती : राज्यासह देशभरात गुन्हेगारी वाढली आहे. दररोज खून, हाणामाऱ्या, खुनाचा प्रयत्न यासारख्या घटना घडत असल्यामुळे नागरिक त्रस्त होत आहे. गुन्हेगारी रोखण्यासाठी पोलिसांकडूनही प्रयत्न केले जात आहेत. अशातच आता बारामती तालुक्यातून एक मोठी बातमी समोर आली आहे. बारामती तालुक्यातील सोनगाव येथील सोनेश्वर मंदिरात युवराज आबासाहेब थोरात यांचा किरकोळ कारणावरून चाकूने भोसकून खून केल्याचा गुन्हा सिद्ध झाला आहे.

या खूनप्रकरणी पनिश उर्फ पांग्या आनंद्या भोसले (मूळ रा. सोनगाव, ता. बारामती) याला जन्मठेप (आजन्म कारावास) व तीन हजार रुपये दंडाची शिक्षा बारामती येथील अतिरिक्त जिल्हा व सत्र न्यायाधिश व्ही.सी. बर्डे यांनी सुनावली. मिळालेल्या माहितीनुसार, सोनगाव येथील सोनेश्वर मंदिरात जानेवारी २०२० मध्ये किरकोळ कारणावरून शिवीगाळ करत पांग्या याने युवराज आबासाहेब थोरात यांना शिवीगाळ करत त्यांच्यावर चाकूने हल्ला केला होता. या हल्ल्यात थोरात यांचा मृत्यू झाला. या प्रकरणी सूरज युवराज थोरात यांनी तालुका पोलिसात फिर्याद दिली होती. या खटल्यात सरकारी वकील अ‍ॅड. ज्ञानदेव साहेबराव शिंगाडे यांनी १३ साक्षीदार तपासले. फिर्यादी व इतर साक्षीदार यांचे जबाब व सरकारी वकीलांनी केलेला युक्तिवाद ग्राह्य धरुन न्यायालयाने आरोपीला जन्मठेपेची व तीन हजार रुपये दंड अशी शिक्षा ठोठावली आहे.

या खटल्यात सरकार पक्षाला बारामती तालुका पोलिस ठाण्याचे पोलीस निरीक्षक चंद्रशेखर यादव, तपास अधिकारी प्रमोद पोरे व अण्णासाहेब घोलप, पैरवी अधिकारी गोरख कसपटे, कोर्ट अंमलदार महिला रेणुका पवार यांनी सहकार्य केले. सरकार पक्षाला या खटल्यात अ‍ॅड. ज्ञानदेव शिंगाडे यांना अ‍ॅड. विनोद जावळे, अ‍ॅड. परिश रूपनवर, विश्वतेज थोरात यांचेही सहकार्य मिळाले.