सणासुदीत भेसळीवर FDA ची करडी नजर! 6 आस्थापनांमधून तब्बल 675 किलो अन्नसाठा जप्त

सणासुदीच्या काळात मिठाई, खवा, पेढे आणि दुग्धजन्य पदार्थांच्या मागणीत वाढ होत असतानाच अन्न भेसळीला आळा घालण्यासाठी अन्न व औषध प्रशासनाने नांदेड जिल्ह्यात तपासणीची धडक मोहीम सुरू केली आहे.

नांदेड : सणासुदीच्या काळात मिठाई, खवा, पेढे आणि दुग्धजन्य पदार्थांच्या मागणीत वाढ होत असतानाच अन्न भेसळीला आळा घालण्यासाठी अन्न व औषध प्रशासनाने नांदेड जिल्ह्यात तपासणीची धडक मोहीम सुरू केली आहे. ‘सुरक्षित अन्न, सुरक्षित महाराष्ट्र’ अभियानांतर्गत झालेल्या कारवाईत सहा आस्थापनांमधून तब्बल ६७५ किलो अन्नसाठा जप्त करण्यात आला असून, त्याची अंदाजे किंमत २ लाख ८९ हजार ८० रुपये आहे. विविध अन्नपदार्थांचे ५४ नमुने विश्लेषणासाठी प्रयोगशाळेत पाठविण्यात आले आहेत.

 

अन्न व औषध प्रशासन, नांदेड कार्यालयामार्फत जिल्ह्यातील मिठाई दुकाने, दूध व दुग्धजन्य पदार्थ विक्री केंद्रे तसेच अन्य खाद्यपदार्थ विक्रेत्यांची तपासणी करण्यात आली. या मोहिमेत सहा आस्थापनांमधून तूप, खवा, कुंदा पेढा, स्वीट पेढा, मावा पेढा आणि खाद्यतेलाचा साठा जप्त करण्यात आला.

जिल्ह्यातील २८ आस्थापनांची केली तपासणी

नांदेड जिल्ह्यातील स्वीट मार्ट, दूध व दुग्धजन्य पदार्थ तसेच अन्य खाद्यपदार्थ विक्री करणाऱ्या २८ आस्थापनांचीही तपासणी करण्यात आली आहे. यावेळी खवा, पनीर, पेढा, बर्फी, खाद्यतेल आदींचे २६ नमुने विश्लेषणासाठी घेण्यात आले. नमुन्यांचे अहवाल प्राप्त झाल्यानंतर त्यानुसार पुढील कायदेशीर कारवाई करण्यात येणार आहे.

ग्राहकांनीही दक्ष राहण्याचे आवाहन

सणासुदीच्या काळात नागरिकांनी परवानाधारक विक्रेत्यांकडूनच अन्नपदार्थांची खरेदी करावी. पॅकबंद पदार्थ घेताना पॅकिंगवरील माहिती, वैधता कालावधी आणि आवश्यक तपशील तपासावेत. मिठाई व दुग्धजन्य पदार्थांची साठवणूक योग्य पद्धतीने झाली आहे का, याचीही ग्राहकांनी खात्री करावी. अन्न भेसळ किंवा असुरक्षित अन्नपदार्थांची विक्री आढळल्यास नागरिकांनी अन्न व औषध प्रशासनाच्या नांदेड कार्यालयाशी संपर्क साधावा. तसेच FOSCOS ऑनलाइन पोर्टल अथवा complaints.ma-hafda.in वर तक्रार नोंदवावी, असे आवाहन सहायक आयुक्तांनी केले आहे.

हे सुद्धा वाचा : मोठी बातमी! अखेर राज्यातील 265 तालुक्यांमध्ये दुष्काळ जाहीर; देवेंद्र फडणवीस यांचा मोठा निर्णय

कुठे किती साठा जप्त ?

मे. शिवकृपा दूध भांडार, देगलूर नाका, नांदेड येथून ८८ किलो तूप व ४९ किलो खवा, मे. श्रीसाई खवा सेंटर, मालेगाव रोड येथून ९९ किलो खवा, तर मे. खंडेलवाल मिठाई, एमआयडीसी येथून ९९ किलो खवा जप्त करण्यात आला आहे. मे. बदामराव पेढेवाले, पाळज, ता. भोकर येथून ३८ किलो कुंदा पेढा व ७८ किलो स्वीट पेढा, मे. काशीराम दाचावर, कुंडलवाडी, ता. बिलोली येथून १४६ लिटर रिफाइंड सोयाबीन तेल आणि मे. जगदंबा बिकानेर, वाई बाजार, ता. माहूर येथून ७८ किलो मावा पेढा जप्त करण्यात आला आहे.