पुण्यात मद्यधुंद तरुणांचा कारमधून जीवघेणा स्टंट, डेक्कन पोलिसांकडून पाठलाग; नेमकं काय घडलं?

उच्चभ्रू आणि वर्दळीच्या लॉ कॉलेज रस्त्यावर मध्यरात्री मद्यधुंद तरुणांनी भरधाव कारच्या मागील खिडक्यांमधून शरीर बाहेर काढत हातात बियरच्या बाटल्या उंचावत आरडाओरडा करत जीवघेणा स्टंट करून धिंगाणा घातल्याचा प्रकार समोर आला आहे.

पुणे : उच्चभ्रू आणि वर्दळीच्या पुण्यातील लॉ कॉलेज रस्त्यावर मध्यरात्री मद्यधुंद तरुणांनी भरधाव कारच्या मागील खिडक्यांमधून शरीर बाहेर काढत हातात बियरच्या बाटल्या उंचावत आरडाओरडा करत जीवघेणा स्टंट करून धिंगाणा घातल्याचा प्रकार समोर आला आहे. या सर्व प्रकाराचा व्हिडीओ व्हायरल झाल्यानंतर पोलिसांनी त्यांच्यावर कायदेशीर कारवाई केली आहे. पाच तरुणांना पोलिसांनी ताब्यात घेऊन नोटीस दिली. हे तरुण महाविद्यालयीन विद्यार्थी असल्याचे पोलिसांनी सांगितले.

याप्रकरणी डेक्कन पोलिस ठाण्यात भारतीय न्याय संहिता, मोटार वाहन कायदा आणि महाराष्ट्र दारूबंदी अधिनियमान्वये गुन्हा दाखल करण्यात आला आहे. यावेळी वापरलेली कार जप्त करण्यात आली आहे. ही घटना दिनांक १० ऑगस्ट रोजी मध्यरात्री दोन ते अडीचच्या सुमारास घडली आहे.

मिळालेल्या माहितीनुसार, डेक्कन पोलिस ठाण्याचे पोलिस शिपाई तुळशीराम भानुदास शेंडगे आणि पोलीस शिपाई महेर हे लॉ कॉलेज रोड परिसरात गस्तीवर होते. त्यावेळी लॉ कॉलेजकडून नळस्टॉपच्या दिशेने एक सिल्व्हर रंगाची एलेंट्रा कार भरधाव वेगाने जाताना दिसली. कारच्या मागील दोन्ही खिडक्यांमधून तरुण अर्धे बाहेर येऊन हातात बियरच्या बाटल्या उंचावत ते मोठमोठ्याने आरडाओरडा करीत असल्याचे दिसू आले. त्यांच्या या हुल्लडबाजीनंतर पोलिसांनी कारचा पाठलाग सुरू केला. पोलिसांची चाहूल लागताच कारचालकाने नळस्टॉपच्या दिशेने कार आणखी वेगाने पळवली. मात्र, पोलिसांनी प्रसंगावधान राखत कारचा क्रमांक टिपून घेतला. नंतर तांत्रिक तपासाच्या आधारे कारचा आणि त्यातील तरुणांचा शोध घेण्यात आला. अखेर पाचही जणांना पोलिस ठाण्यात हजर केले. पोलिसांनी चौकशी केल्यानंतर पाचही तरुणांनी मद्यप्राशन केल्याचे समोर आले. पुढील तपास पोलीस उपनिरीक्षक नवनाथ कुलाळ करीत आहेत.

हे सुद्धा वाचा : पाच वर्षांत राज्यातील 36211 कंपन्यांना टाळे, मुंबईत सर्वाधिक कंपन्या बंद; वाचा सविस्तर आकडेवारी

पुण्यात तरुणाचा खून

पुण्याचा मध्यभाग असलेल्या गणेश पेठ परिसरात वडापाव खरेदीसाठी गेल्यानंतर पायाला धक्का लागल्यावरून वाद झाल्यानंतर तरूणाचा खून करण्यात आल्याची धक्कादायक घटना समोर आली आहे. गणेश पेठेतील डुल्या मारूती चौक परिसरात रविवारी दुपारी तीनच्या सुमारास ही घटना घडली आहे. शिवम राजेश परदेशी (वय २८, रा. गणेश पेठ) असे खून झालेल्या तरूणाचे नाव आहे. तर याप्रकरणी पोलिसांनी वैभव किशोर साळुंखे (वय २४, रा. गणेश पेठ) याला पोलिसांनी ताब्यात घेतले असून त्याच्या विरोधात खुनाचा गुन्हा दाखल करण्यात आला आहे.