डेक्कन जिमखाना भागातील हॉटेलसमोर तरुणाच्या खुनाचा प्रयत्न, तरुणींसह तिघे अटकेत; नेमकं काय घडलं?
पुणे : राज्यात गुन्हेगारी प्रचंड वाढली असून, अशातच आता पुण्यातून एक मोठी बातमी समोर आली आहे. डेक्कन जिमखाना भागातील फ्लाईंग जिप्सी हॉटेलसमोर तरुणाच्या डोक्यात शस्त्राने वार करुन त्याला मारहाण केल्याची घटना शनिवारी पहाटे घडली आहे. याप्रकरणी दोन तरुणींसह साथीदाराला अटक करण्यात आली असून, त्यांच्याबरोबर असलेल्या सात ते आठ जणांवर गुन्हा दाखल करण्यात आला आहे.
अथर्व प्रमोद जगताप (वय १९, रा. ऑरा सोसायटी, शिवसृष्टीजवळ, आंबेगाव) असे जखमी झालेल्याचे नाव आहे. याप्रकरणी माधवी कुंभार (रा. काळेपडळ, हडपसर), स्नेहल सोनके (रा. पिंपळे गुरव), शार्दुल ओव्हाळ (रा. हडपसर) यांना अटक करण्यात आली आहे. त्यांच्याबरोबर असलेल्या सात ते आठ जणांवर गु्न्हा दाखल करण्यात आला आहे. याबाबत जगताप याने डेक्कन पोलिसांत तक्रार दिली आहे.
पोलिसांच्या माहितीनुसार, आरोपी तरुणी आणि तक्रारदार अथर्व जगताप हे ओळखीचे आहेत. सातारा येथे त्यांची काही महिन्यांपूर्वी भांडणे झाली होती. शनिवारी (१५ ऑगस्ट) पहाटे सव्वातीनच्या सुमारास अथर्व हा फ्लाईंग जिप्सी हॉटेलमधून बाहेर पडत होता. त्यावेळी टोळक्याने अथर्वला अडवले. ‘तू तरुणींना काय बोलला. आमच्याबरोबर चल तुला दाखवितो’, अशी धमकी दिली. अथर्व घाबरून हाॅटेलमध्ये पळाला. त्या वेळी आरोपी तरुणी आणि साथीदारांनी त्याला शिवीगाळ केली. ‘याला मारा, जिवंत सोडू नका’, अशी धमकी देऊन त्याच्या डोक्यात शस्त्राने वार केला. हाॅटेलमधील खुर्ची त्याला फेकून मारली, तसेच लाथाबुक्क्यांनी मारहाण केली.
डेक्कन जिमखाना भागातील शिरोळे रस्त्यावर असलेले हॉटेल मध्यरात्रीपर्यंत सुरू असल्याने यापूर्वी पोलिसांनी कारवाई केली होती. संबंधित हॉटेल मालकाविरुद्ध कारवाई केली होती. या हॉटेलच्या परिसरात यापूर्वी मारामारीच्या घटना घडल्या होत्या. रात्री अपरात्री तरुणांचा आवाजामुळे, गोंधळामुळे स्थानिक नागरिकांनी पोलिसांकडे तक्रारी दिल्या होत्या.
.png "Videos"){kind=small}
