महिलेच्या कपाळावर चाकूने वार, चौघांवर गुन्हा दाखल; नेमकं काय घडलं?
छत्रपती संभाजीनगर : दुचाकीवरून जाताना अंगावर पाणी उडाल्याच्या कारणावरून झालेल्या वादानंतर शेजारी राहणाऱ्या चौघांनी एका महिलेसह तिच्या पती व आईला जबर मारहाण केल्याचा प्रकार समोर आला आहे. यावेळी एका व्यक्तीने चाकूने महिलेच्या कपाळावर वार करुन तिला जखमी केले आहेत. ही घटना नारळीबाग परिसरात घडली आहे. सचिन उर्फ माया प्रदिप सोनवणे, दिक्षा अमोल भावसार, सोहम सोनवणे (सर्व रा. नारळीबाग) आणि सुवर्णा उर्फ गुड्डी पोटपिल्लेवार (रा. पावन चौक, नारळीबाग) अशी मारहाण करणाऱ्यांची नावे आहे. त्यांच्याविरोधात सिटीचौक पोलिस ठाण्यात गुन्हा दाखल करण्यात आला आहे.
या प्रकरणात अश्विनी योगेश कोतवाल (वय २५, रा. नारळीबाग) यांनी फिर्याद दिली आहे. त्यानुसार, ७ ऑगस्ट रोजी रात्री साडेनऊच्या सुमारास फिर्यादी या दुचाकीवरून परिसरातील किराणा दुकानासमोरून मेडिकलमध्ये जात होत्या. त्यावेळी शेजारी राहणारी दिक्षा भावसार हिने त्यांना थांबवून दुचाकी वेगात का चालवित आहेस, तसेच अंगावर पाणी का उडविले, असा जाब विचारला. त्यावरून वाद होऊन दिक्षाने शिवीगाळ करत अश्विनी यांना मारहाण केली. अश्विनी यांची आई व पती त्यांना सोडविण्यासाठी आले असता दिक्षासह तिचा भाऊ सचिन उर्फ माया सोनवणे, सोहम सोनवणे आणि सुवर्णा उर्फ गुड्डी पोटपिल्लेवार यांनीही तिघांना मारहाण केल्याचे फिर्यादीत म्हटले आहे. त्यानंतर सचिन उर्फ माया याने चाकूने अश्विनी यांच्या कपाळाच्या उजव्या बाजूला वार केला. यात त्यांच्या डोक्यातून रक्तस्त्राव झाला. अश्विनी यांच्या पतीला फिट आल्याने दोघेही बेशुद्ध झाले. शेजाऱ्यांनी पोलिसांना माहिती दिल्यानंतर दोघांना रुग्णवाहिकेतून घाटीत दाखल केले. या घटनेनंतर चौघेही तेथून पसार झाले. सिटीचौक पोलिस ठाण्यात गुन्हा दाखल करण्यात आला आहे.
दारू पिण्यासाठी पैसे न दिल्याचा राग अनावर
पुण्यातून एक मोठी बातमी समोर आली आहे. दारू पिण्यास पैसे न दिल्याने तरुणाच्या डोक्यात दगड घातल्याची घटना गुलटेकडीतील डायसप्लॉट परिसरात घडली आहे. यामुळे परिसरात तणावाचे वातावरण निर्माण झाले होते. दरम्यान खुनाचा प्रयत्न केल्याप्रकरणी पोलिसांनी एकाला अटक केली. राजू शिवलिंगप्पा इककळकी (वय ३०, रा. डायसप्लाॅट, गुलटेकडी) असे गंभीर जखमी झालेल्याचे नाव आहे. याप्रकरणी प्रेम संजय काळे (वय २८, रा. डायसप्लाॅट, गुलटेकडी) याला अटक करण्यात आली आहे. याबाबत इककळकी याची आई लक्ष्मीबाई (वय ५८) यांनी स्वारगेट पोलिस ठाण्यात तक्रार दिली आहे.
.png "Videos"){kind=small}
