सोनगावात अवैध दारू व्यवसायाचा पर्दाफाश; हातभट्टीसह साहित्य पोलिसांच्या ताब्यात

अवैध दारू व्यवसायाविरोधात बारामती तालुका पोलिसांनी धडक कारवाई करत सोनगाव येथील पारधी वस्ती परिसरात सुरू असलेली हातभट्टी उद्ध्वस्त केली आहे. पोलिसांनी एका संशयित आरोपीला ताब्यात घेतले आहे.

• सोनगावात अवैध दारू व्यवसायाचा पर्दाफाश
• हातभट्टीसह साहित्य पोलिसांच्या ताब्यात
• अवैध धंद्यांविरोधात कारवाई सुरूच राहणार

बारामती : अवैध दारू व्यवसायाविरोधात बारामती तालुका पोलिसांनी धडक कारवाई करत सोनगाव येथील पारधी वस्ती परिसरात सुरू असलेली हातभट्टी उद्ध्वस्त केली आहे. या कारवाईत मोठ्या प्रमाणावर गावठी दारू गाळण्यासाठी वापरण्यात येणारे साहित्य आणि सुमारे १०० लिटर कच्चे रसायन (वॉश) जप्त करण्यात आले आहे. पोलिसांनी एका संशयित आरोपीला ताब्यात घेतले असून, त्याच्याविरुद्ध महाराष्ट्र दारूबंदी कायद्यानुसार गुन्हा दाखल करण्याची प्रक्रिया सुरू करण्यात आली आहे.

 

२८ ऑक्टोबर २०२६ रोजी बारामती तालुका पोलीस ठाण्याचे पोलीस निरीक्षक नारायण पवार यांना सोनगाव येथील पारधी वस्तीमध्ये अवैध हातभट्टी सुरू असल्याची माहिती मिळाली. या माहितीच्या आधारे पोलिसांनी पथकासह संबंधित ठिकाणी छापा टाकला. या वेळी गावठी दारू तयार करण्यासाठी वापरण्यात येणारी भट्टी, कच्चे रसायन आणि इतर साहित्य आढळून आले. पोलिसांनी घटनास्थळावरील रसायन नष्ट करून हातभट्टी उद्ध्वस्त केली. या व्यवसायातून परिसरात अवैध दारूची निर्मिती व विक्री केली जात असल्याचा संशय आहे. कारवाईदरम्यान एका आरोपीला ताब्यात घेण्यात आले असून, त्याच्याविरोधात पुढील कायदेशीर कारवाई सुरू आहे.

उपविभागीय पोलीस अधिकारी यांच्या मार्गदर्शनाखाली पोलीस निरीक्षक नारायण पवार व त्यांच्या पथकाने ही कारवाई केली. यामध्ये पोलीस उपनिरीक्षक शिंदे, हेड कॉन्स्टेबल पवार, देशमाने, खरातडे, खटके, वाघमारे कदम, खैरे, पोमणे, तरंगे आणि कांबळे यांच्यासह पथकातील कर्मचाऱ्यांनी सहभाग घेतला. तसेच राज्य उत्पादन शुल्क विभागाच्या बारामती पथकानेही या कारवाईत सहभाग घेतला. विभागाचे उपअधीक्षक गणेश कसरे, निरीक्षक देवदत्त पोटे, दुय्यम निरीक्षक सागर साबळे यांच्यासह गिरीश कुमार करचे, मनोज होलेम, प्रदीप झुंजुरके, मयूर गाडे, दिनेश ठाकूर, प्रदीप मोहिते, प्रणव मेहता, शितल शिंदे, सुनील वाघ, दिनेश सूर्यवंशी, विनोद शिंदे, विनोद इंजे, चरण कुंठे व अन्य कर्मचाऱ्यांनी कारवाईत सहभाग नोंदविला.

हे सुद्धा वाचा : चोरीची रिक्षा अन्‌ चोरांचा धागादोरा नव्हता, मात्र ‘तांत्रिक विश्लेषणाने’ कुळगाव पोलिसांनी केले जेरबंद!

अवैध धंद्यांविरोधात कारवाई सुरूच राहणार

बारामती तालुका पोलीस आणि राज्य उत्पादन शुल्क विभागाने संयुक्तपणे केलेल्या या कारवाईमुळे अवैध हातभट्टी चालकांचे धाबे दणाणले आहेत. परिसरात अवैध दारू निर्मिती व विक्री करणाऱ्यांविरोधात यापुढेही कठोर कारवाई सुरू राहणार असल्याचा इशारा पोलिसांनी दिला आहे.