दुचाकी चोरणाऱ्या चोरट्याला ठोकल्या बेड्या, अल्पवयीन साथीदारही ताब्यात; तब्बल १४ दुचाकी जप्त

टिळक रस्ता परिसरातून दुचाकी चोरुन पसार झालेल्या चोरट्यासह अल्पवयीन साथीदाराला विश्रामबाग पोलिसांनी पकडले आहे. या चोरट्यांकडून तब्बल १४ दुचाकी जप्त करण्यात आल्या आहेत.

• दुचाकी चोरणाऱ्या चोरट्याला ठोकल्या बेड्या
• अल्पवयीन साथीदारही ताब्यात
• तब्बल १४ दुचाकी जप्त

पुणे : टिळक रस्ता परिसरातून दुचाकी चोरुन पसार झालेल्या चोरट्यासह अल्पवयीन साथीदाराला विश्रामबाग पोलिसांनी पकडले आहे. या चोरट्यांकडून तब्बल १४ दुचाकी जप्त करण्यात आल्या आहेत. चोरट्यांनी शहर व जिल्ह्यातून दुचाकी चोरल्याचे निष्पन्न झाले आहे. कृष्णा चंदक्रांत शेळके (वय २६, रा. माळेगाव, ता. अहदमपूर, जि. लातूर) असे अटक करण्यात आलेल्याचे नाव आहे. या प्रकरणी शेळके याचा साथीदार वैभव सांगुळे (रा. सुतारदरा, कोथरूड) याच्या विरुद्ध गुन्हा दाखल करण्यात आला आहे.

पोलिस उपायुक्त कृषीकेश रावले यांच्या मार्गदर्शनाखाली वरिष्ठ निरीक्षक नवनाथ जगताप, गुन्हे शाखेचे निरीक्षक विकास भिंगारदिवे, अमोल भोसले, महेश कदम, शैलेश सुर्वे, सचिन अहिवळे, शशिकांत दरेकर, कैलास डुकरे यांनी ही कामगिरी केली आहे.

टिळक रस्ता परिसरातील चिमणबाग परिसरातून २३ जून रोजी एकाची दुचाकी चोरीला गेली होती. या गुन्ह्याचा विश्रामबाग पोलिसांकडून तपास करण्यात येत होता. तपासात दुचाकी चोरणारे चोरटे नारायण पेठेत थांबल्याची माहिती पोलिसांना मिळाली. नंतर पोलिसांच्या पथकाने सापळा लावून एकाला पकडले. अंधारात त्याच्या बरोबर असलेला साथीदार पसार झाला. चौकशीत ताब्यात घेण्यात आलेला चोरटा अल्पवयीन असल्याची महिती मिळाली. तो कोथरूडमधील सुतारदरा परिसरात राहत असल्याची माहिती मिळाली. पोलिसांनी त्याच्या आत्यासमक्ष चैाकशी केली. तेव्हा वैभव सांगुळे आणि कृष्णा शेळके यांच्याबरोबर पुणे शहरातून दुचाकी चोरल्याची कबुली अल्पवयीनाने दिली. त्यानंतर पोलिसांनी सांगुळे आणि शेळके यांचा शोध घेण्यास सुरुवात केली.

सांगुळे पसार झाला होता. त्याच्याबरोबर असलेला साथीदार शेळके हा लातूर परिसरात राहत असल्याचे समजले. त्यानंतर विश्रामबाग पोलिसांचे पथक लातूरला रवाना झाले. शेळके याला ताब्यात घेण्यात आले. अल्पवयीन आणि साथीदार शेळके यांच्याकडून दहा लाख रुपयांच्या १४ दुचाकी जप्त करण्यात आल्या. शेळके, सांगुळे आणि अल्पवयीनाने पुणे शहर आणि जिल्ह्यातून आणखी काही दुचाकी चोरल्याचा संशय असून, त्यादृष्टीने तपास करण्यात येत आहे.

हे सुद्धा वाचा : बुलडाणा अर्बनच्या माजी सीईओ व विभाग व्यवस्थापिकांविरुद्ध गुन्हा दाखल; नेमकं प्रकरण काय?