पुण्यात राष्ट्रवादीच्या नगरसेवकाविरोधात गुन्हा दाखल; नेमकं प्रकरण काय?

बालेवाडी येथील नगरसेवक बाबूराव चांदेरे यांनी बांधकामाच्या वादातून बाणेर पोलिस ठाण्याबाहेरच एका नागरिकाला धमकी दिल्याच्या आरोप करण्यात आला आहे.

• पुण्यात राष्ट्रवादीच्या नगरसेवकाविरोधात गुन्हा दाखल
• एका नागरिकाला धमकी दिल्याच्या आरोप
• पोलिसांकडून प्रकरणाची चोकशी सुरु

पुणे : बालेवाडी येथील नगरसेवक बाबूराव चांदेरे यांनी बांधकामाच्या वादातून बाणेर पोलिस ठाण्याबाहेरच एका नागरिकाला धमकी दिल्याच्या आरोप करण्यात आला आहे. याप्रकरणी बाणेर पोलिस ठाण्यात नगरसेवक चांदेरे यांच्याविरोधात तक्रार दाखल करण्यात आली असून, पुढील कारवाई सुरू आहे. सचिन रघुनाथ चाकणकर (वय ४६, रा. बाणेर) यांनी याबाबत तक्रार दिली आहे. त्यावरून हा गुन्हा दाखल करण्यात आला आहे.

 

पोलिसांच्या माहितीनुसार, तक्रारदार यांच्या राहत्या जागेवरून चुलत भावांशी मालमत्तेचा वाद सुरू आहे. या वादग्रस्त जागेवर सुरू असलेल्या बांधकामाला महापालिकेने ‘स्टॉप वर्क’ नोटीस दिली होती. त्यानंतरदेखील तेथे बांधकाम सुरूच असल्याने तक्रारदार याप्रकरणाची तक्रार करण्यास कुटुंबियांसह पोलिस ठाण्यात गेले होते.

दरम्यान, तेथे राष्ट्रवादी काँग्रेसचे बाबुराव चांदेरे आले. त्यांनी चाकणकर यांच्याशी वाद घालत, ‘माझ्या कार्यकर्त्यांचे काम थांबवतोस का? तुझे घरही पाडून टाकतो, तू कसा जगतोस ते बघतो,’ अशी धमकी दिल्याचा आरोप तक्रारदाराने केला आहे. तसेच, नगरसेवकाने आपल्या चालकाला ‘बांबू काढ’ असे सांगत मारहाणीची धमकी दिल्याचेही तक्रारीत नमूद आहे. या घटनेनंतर तक्रारदाराने पोलिसांकडे धाव घेतली असून, संबंधितांवर कायदेशीर कारवाई करण्याची मागणी केली आहे. पोलिसांनी तक्रार नोंदवून प्रकरणाची चौकशी सुरू केली आहे, अशी माहिती वरिष्ठ निरीक्षक चंद्रशेखर सावंत यांनी दिली.

हे सुद्धा वाचा : एटीएममध्ये मदतीच्या बहाण्याने फसवणूक; तक्रारदारांना वॉचमनला बोलवायला पाठविले अन्…

बच्चू कडू यांच्याविरोधात हत्येच्या कटाच्या प्रयत्नाचा आरोप

प्रहारचे अध्यक्ष तसेच माजी राज्यमंत्री बच्चू कडू यांच्याविरोधात हत्येच्या प्रयत्नाचा कट रचल्याचा आरोप करण्यात आला आहे, या प्रकरणात अमरावती ग्रामीण पोलिसांनी बच्चू कडू यांच्यासह तिघांविरोधात गुन्हा देखील दाखल केला आहे. त्यामुळे बच्चू कडू यांच्या अडचणी वाढल्या आहेत. बच्चू कडू यांनी राजकीय वैमनस्यातून आपल्याला अपघातात ठार मारण्याचा कट रचल्याची तक्रार भाजपचे आमदार प्रवीण तायडे यांचे चुलत बंधू अभिजीत तायडे यांनी दिली, आहे, त्यानंतर बच्चू कडू यांच्याविरोधात गुन्हा दाखल करण्यात आला आहे. बच्चू कडू यांच्याविरोधात आता गुन्हा दाखल झाल्यामुळे बच्चू कडू यांच्या अडचणी वाढण्याची शक्यता आहे. अमरावती ग्रामीण पोलिसांनी बच्चू कडू यांच्यासह तिघांविरोधात गुन्हा दाखल केला आहे.