
Maharashtra Breaking News Today 18.11.2026
18 Nov 2026 09:45 AM (IST)
चेन्नई सुपर किंग्सने (CSK) आयपीएल २०२७ च्या आगामी हंगामासाठी आपल्या कायम ठेवलेल्या (Retain) आणि मुक्त केलेल्या (Release) खेळाडूंची अधिकृत यादी सोशल मीडियावर जाहीर केली आहे. नव्या हंगामापूर्वी फ्रँचायझीने संघात मोठे बदल करत तब्बल ११ खेळाडूंना संघातून मुक्त केले आहे.
या निमित्ताने चेन्नईचा माजी कर्णधार आणि दिग्गज यष्टिरक्षक-फलंदाज एमएस धोनीने आयपीएलमधून निवृत्ती घेतल्याचे स्पष्ट झाले असून, आता तो संघाचा मार्गदर्शक (मेंटर) म्हणून नवी जबाबदारी सांभाळणार आहे. आगामी आयपीएल २०२७ च्या मिनी लिलावासाठी चेन्नईच्या पर्समध्ये २८.०५ कोटी रुपये शिल्लक आहेत.
18 Nov 2026 09:35 AM (IST)
अलिबागमध्ये सुरू असलेल्या रस्त्याच्या कामामुळे होणारी भीषण वाहतूक कोंडी आता थेट नागरिकांच्या जीवावर बेतू लागली आहे. बेलकडे ते अलिबाग दरम्यान लागलेल्या प्रचंड ट्रॅफिकमध्ये रुग्णवाहिका तब्बल दीड ते दोन तास अडकून पडल्याने, वेळेत उपचार न मिळाल्यामुळे २० महिन्यांच्या आरांश ठाकूर या चिमुकल्याचा दुर्दैवी मृत्यू झाला आहे.
आरांशने चुकून फुगा गिळल्याने त्याची प्रकृती अचानक गंभीर झाली होती. त्याला तातडीने उपचारासाठी नेले जात असताना वाटेतच वाहतूक कोंडीत रुग्णवाहिका अडकली. वेळेत रुग्णालयात पोहोचता न आल्याने त्याचा प्राण गेला. या हृदयद्रावक घटनेमुळे बामणगाव परिसरात तीव्र शोककळा पसरली असून, प्रशासनाच्या ढिसाळ वाहतूक नियोजनावर नागरिकांकडून संताप व्यक्त केला जात आहे.
18 Nov 2026 09:26 AM (IST)
मुंबईतील कांदिवली रेल्वे स्थानकात AK-47 रायफल घेऊन एक पाकिस्तानी दहशतवादी फिरत असल्याचा दावा करणारा पाच सेकंदांचा बनावट (AI Generated) व्हिडीओ अलीकडेच सोशल मीडियावर मोठ्या प्रमाणात व्हायरल झाला होता.
हा व्हिडीओ पूर्णपणे बनावट आणि अफवा पसरवणारा असल्याचे समोर आल्यानंतर, याप्रकरणी संबंधित अज्ञात व्यक्तींविरोधात पोलिसांत अधिकृत FIR दाखल करण्यात आला आहे. सायबर सुरक्षेच्या दृष्टीने अशा अफवा पसरवणाऱ्यांवर कडक कारवाई करण्याची प्रक्रिया सुरू आहे.
18 Nov 2026 09:25 AM (IST)
उल्हासनगरसह कल्याण-डोंबिवलीकरांना पुन्हा एकदा पाणीटंचाईचा सामना करावा लागणार आहे. महाराष्ट्र औद्योगिक विकास महामंडळाच्या (एमआयडीसी) बारवी जलशुद्धीकरण केंद्रातील देखभाल व दुरुस्तीच्या कामासाठी गुरुवार, १९ नोव्हेंबर रोजी मध्यरात्री १२ वाजल्यापासून शुक्रवार २० नोव्हेंबर रोजी मध्यरात्री १२ वाजेपर्यंत – सलग २४ तास पाणीपुरवठा बंद ठेवण्यात येणार आहे. एमआयडीसीच्या डोंबिवली विभागाचे कार्यकारी अभियंता एस. व्ही. राऊत यांनी १६ नोव्हेंबर रोजी यासंदर्भातील अधिकृत सूचना जारी केली आहे.
Maharashtra to World Breaking News :
पुण्यातील ४४ सिंहगड शैक्षणिक संस्थांच्या ४०० कोटी रुपयांच्या थकबाकी प्रकरणात मुंबई उच्च न्यायालयाने सीबीआय (CBI) आणि ईडी (ED) चौकशीचे आदेश दिले आहेत. अमरावती जिल्ह्यातील चिखलदरा तालुक्यात प्रस्तावित १,५०० मेगावॅटच्या जलविद्युत प्रकल्पासाठी मेळघाटच्या जंगलातील तब्बल २४० हेक्टर वनक्षेत्र तोडले जाणार असल्याने पर्यावरणप्रेमींमध्ये संताप व्यक्त होत आहे.
राज्यात थंडीच्या लाटेत चढ-उतार सुरू असून आज अंशतः ढगाळ वातावरण राहणार असल्याचा आणि २१ नोव्हेंबरपासून विदर्भात पावसाचा हवामान विभागाचा अंदाज आहे. मुंबईतील कुर्ला परिसरात दोन ते तीन घरांना लागलेल्या भीषण आगीत एक व्यक्ती जखमी झाली, तर दुसरीकडे कांदिवलीत १५ वर्षांपासून प्रलंबित रस्ता रुंदीकरणातील २७ अनधिकृत बांधकामे पाडण्यात आली.