पुण्यात एकाला दगडाने मारहाण, उजव्या हाताचे हाड फ्रॅक्चर; नेमकं काय घडलं?
पुणे : राज्यासह देशभरात गुन्हेगारी वाढली असून, खून, हाणामऱ्या, लुटमार, खुनाचा प्रयत्न यासारख्या घटना दररोज वेगवेगळ्या भागात घडत असतात. गुन्हेगारी रोखण्यासाठी पोलिसांकडून गस्त घातली जात आहे. मात्र वाढलेल्या घटनांवरुन पोलिसांनाही गुन्हेगारांना पकडण्यात यश मिळत नसल्याचे दिसून येत आहे. अशातच आता पुण्यातून एक धक्कादायक प्रकार समोर आला आहे. प्लॉटमध्ये टाकलेला राडारोडा काढण्यास सांगितल्यावरून दगडाने व लाकडी बांबुने एकाला मारहाण केल्याचा प्रकार उघडकीस आला आहे.
याप्रकरणी वाघोली पोलिस ठाण्यात दाम्पत्यावर गुन्हा दाखल करण्यात आला आहे. गणेश रघुनाथ ढोकले (४५, रा. करंदीता, शिरूर, जि. पुणे) व त्याच्या पत्नीवर गुन्हा दाखल करण्यात आला आहे. याबाबत गणेश मोहन खुटवड (४०, रा. मु. पो. टाकळी भिमा, ता. दौंड, पुणे) यांनी तक्रार दिली आहे. हा प्रकार वाघोली बकोरी रोड येथील श्रीरामचंद्र व्हिला जवळ घडला आहे.
तक्रारदार यांचा न्यु सिटी शेजारील रिकाम्या जागेत प्लॉट आहे. आरोपीने त्या जागेत राडारोडा टाकला होता. तो काढण्यास सांगितला असता त्याचा राग आरोपींच्या मनात आला. त्यांनी मिलिंद भोरडे यांच्याशी वाद घालत त्यांच्या डोक्यात दगड फेकुन मारहाण केली व नंतर आरोपीच्या पत्नीने लाकडी बांबु आरोपीच्या हातात देऊन त्यांना मारा असे म्हणाल्या. यावेळी आरोपीने त्यांच्या पायावर मांडीवर व उजव्या हातावर मारून हाताचे हाड फ्रॅक्चर केले.
मध्यस्थी करणार्‍या ज्येष्ठावर हत्याराने वार
घराबाहेर फिरण्यासाठी पडलेल्या ज्येष्ठ नागरिकाला येरवड्यातील यशवंतनगर येथील डायमंड चौक येथे तीन ते चार जण आपआपसात वाद घालत असताना दिसले. त्यामुळे त्यांनी मध्यस्थी करून वाद थांबविण्याचा प्रयत्न केला. यावेळी आरोपीने शिवीगाळ करत त्याच्यावरच धारदार हत्यारांनी वार करून गंभीर जखमी केले. याप्रकरणी अमन अनिल भालेराव (रा. यशवंतनगर येरवडा) याच्यावर गुन्हा दाखल करण्यात आला आहे. याबाबत रमेश रामचंद्र साबळे (६३, रा. डायमंड चौक, यशवंतनगर, येरवडा) यांनी येरवडा पोलिस ठाण्यात तक्रार दिली आहे. दिनांक ३ ऑगस्ट रोजी रात्री साडे अकरा वाजण्याच्या सुमारास हा प्रकार घडल्यानंतर गुन्हा दाखल करण्यात आला आहे.
.png "Videos"){kind=small}
