शेअर बाजारात गुंतवणुकीच्या आमिषाने ज्येष्ठाची फसवणूक; तब्बल लाखो रुपयांना घातला गंडा

कोथरूड भागातील एका ज्येष्ठ नागरिकाची सायबर चोरट्यांनी २४ लाख ४४ हजार रुपयांची फसवणूक केल्याचा प्रकार उघडकीस आला आहे. शेअर बाजारात गुंतवणुकीच्या आमिषाने त्यांची फसवणूक करण्यात आली आहे.

पुणे : राज्यात फसवणुकीच्या घटनांमध्ये मोठी वाढ झाली आहे. राज्यातील वेगवेगळ्या भागातून दररोज फसवणुकीच्या घटना उघडकीस येत असतात. अशातच आता पुण्यातून एक बातमी समोर आली आहे. कोथरूड भागातील एका ज्येष्ठ नागरिकाची सायबर चोरट्यांनी २४ लाख ४४ हजार रुपयांची फसवणूक केल्याचा प्रकार उघडकीस आला आहे. शेअर बाजारात गुंतवणुकीच्या आमिषाने त्यांची फसवणूक करण्यात आली आहे. याप्रकऱणी सायबर चोरट्यांविरुद्ध गुन्हा दाखल करण्यात आला आहे. याबाबत ७३ वर्षीय ज्येष्ठ नागरिकाने कोथरूड पोलिस ठाण्यात तक्रार दिली आहे.

पोलिसांच्या माहितीनुसार, तक्रारदार कोथरूड भागात राहतात. सायबर चोरट्यांनी त्यांना मोबाइलवर संपर्क साधला होता. त्यांना एका मॅसेजद्वारे शेअर बाजारात गुंतवणूक केल्यास चांगला परतावा मिळेल, असे आमिष दाखविले होते. नंतर ज्येष्ठाने चोरट्यांच्या खात्यात काही रक्कम जमा केली. चोरट्यांनी त्यांना परतावा दिला. परतावा मिळाल्यानंतर ज्येष्ठाचा विश्वास बसला.

चोरट्यांनी त्यांना आणखी रक्कम गुंतविण्यास सांगितले. त्यानुसार ज्येष्ठाने चोरट्यांच्या खात्यात वेळोवेळी २४ लाख ४४ हजार रुपये जमा केले. मोठ्या प्रमाणावर रक्कम गुंतविल्यानंतर चोरट्यांनी त्यांना परतावा दिला नाही, तसेच त्यांना मूळ मुद्दलही परत केली नाही. फसवणूक झाल्याचे लक्षात आल्यानंतर त्यांनी पोलिसांकडे तक्रार दिली. वरिष्ठ पोलीस निरीक्षक संदीप देशमाने अधिक तपास करत आहेत.

सोशल मीडियावरील ओळख महिलेला पडली महागात

सोशल मिडीयाच्या माध्यमातून ओळख झालेल्या तरुणाने सीबीआय अधिकारी असल्याची बनावट ओळख सांगत महिलेचा विश्वास संपादन करून तिची चार लाख ८० हजार रुपयांची फसवणूक केल्याचा प्रकार उघडकीस आला आहे. तरुणाने महिलेला लग्नाचे आमिषही दाखविले होते. वानवडीतील फातिमानगर येथील ४२ वर्षीय महिलेने याप्रकरणी तक्रार दिली आहे. त्यावरू वानवडी पोलिसांत शिरीष जयंतीलाल गोहेल उर्फ चिराग मित्तल (वय २७, रा. ससाणेनगर, हडपसर) याच्यावर गुन्हा दाखल केला आहे. ही घटना १८ जुलै २०२४ ते २३ जुलै २०२५ या कालावधीत घडली आहे.

मुकादमाने केली ऊस वाहतूकदाराची फसवणूक

ऊसतोड मजूर पुरवतो म्हणून मुकादमाने ऊस वाहतूकदाराकडून ७ लाख ८० हजार रुपये घेऊन फसवणूक केल्याचा प्रकार उघडकीस आला आहे. याबाबत ऊस वाहतूकदार रामचंद्र सीताराम चव्हाण (रा. चोभे पिंपरी, ता. माढा) यांनी कुर्डुवाडी पोलिसांत उसतोड मुकादम संजय मानसाराम निकम (रा. खामखेडा, ता. देवळा, जि. नाशिक) याच्याविरुद्ध फिर्याद दाखल केली आहे.