Crime News: दौंडमध्ये मोबाईल विक्रीचे दुकान फोडून ५७ हजाराचा ऐवज लंपास

याबाबात अधिक माहिती अशी की , दौंड शहरातील दौंड – सिध्दटेक अष्टविनायक मार्गावर भंगाळे हॉस्पिटल समोरील श्री गणेश मोबाइल शॉपी येथे काल दि. २० रोजी मध्यरात्री चोरी झाली.चोरट्यांनी शटर उचकटून दुकानातील दोन नवीन व दोन जुने मोबाइल हॅण्डसेट व रोख ३४ हजार रूपये, असा एकूण ५७ हजार १०० रूपयांचा ऐवज चोरून नेला. याबाबत दुकानाचे मालक नितीन सलामपुरे यांनी दौंड पोलिस ठाण्यात फिर्याद दाखल केली आहे.

तसेच छत्रपती शिवाजी महाराज चौकातील ओझा गॅस एजन्सी या दुकानाच्या शटरचे कुलूप लावण्याच्या दोन कड्या तोडून आत प्रवेश केला. पहाटे साडेतीन वाजण्याच्या सुमारास अवघ्या दोन मिनिट व चाळीस सेकंदांमध्ये चोरट्यांनी दोन कड्या तोडून आत प्रवेश केला.  चोरट्यांनी मोबाइल हॅण्डसेट मधील बॅटरीच्या उजेडात आतील भागात जाऊन पाहणी केल्याच्या नोंदी आहेत. या बाबत गॅस एजन्सीचे वितरक गोविंद ओझा यांनी सांगितले की, चोरट्यांनी दुकानाचे शटर तोडून आत प्रवेश केला परंतु यामध्ये दुकानातील काही चोरीस गेले नाही.

शहारातील मुख्य चौकातील ओझा गॅस एजन्सीच्या सीसीटीव्ही कॅमेऱ्यात अंदाजे २० ते २५ वयोगटातील तीन युवक शटर तोडताना दिसत आहेत. अंगावर जीन्स, टी शर्ट व पाठीवर सॅक असलेल्या या तीन युवकांचा पोलिस शोध घेत आहेत. भर बाजारपेठेतील दुकाने फोडून चोरी झाल्याने व्यापारी वर्ग आणि नागरिक धस्तावले आहेत.

दौंड पोलीस स्थानकापासुन साधारणतः ५०० ते ७०० मीटरवर चोरीच्या घटना घडल्या आहेत. यावेळी पहाटे साडेतीन ते चार वाजण्याच्या सुमारास ओझा यांनी पोलिस स्थानकात फोन केला व शटर उचकले आहे; मात्र चोरीस काहीच गेले नाही ,असे सांगितलेले असताना ठाणे अंमलदार यांनी चोरीस काही गेले नाही तर सकाळी पोलीस येतील ,असे सांगत फोन ठेवला .त्यानंतर सकाळी पोलीस पोहोचले नाहीत तर पुन्हा ओझा यांनी पोलिस ठाण्याशी संपर्क केल्यानंतर पोलीस बारा वाजता पोहोचले. पोलीस स्थानकाच्या शेजारीच असलेल्या ठिकाणी पोलिसांना चोरीच्या गुन्ह्यात भेट देता येत नसे,ल तर संपुर्ण कार्यक्षेत्रात हे कधी भेटणार आणि पोलिसिंग कसे होणार? असा सवाल निर्माण झाला आहे. याप्रकरणी पोलिस अधिक्षक काय कारवाई करतात याकडे लक्ष लागले आहे.