भरदुपारी सहकारनगरमध्ये धाडसी चोरी; महिलेकडील एक लाखाची रोकड पळवली

सहकारनगर भागात भरदुपारी दुचाकीचालक महिलेजवळील १ लाख रुपयांची रोकड असलेली पिशवी हिसकावून चोरून नेल्याची घटना घडली आहे. याप्रकरणी अज्ञात चोरट्यांवर गुन्हा दाखल केला.

पुणे : राज्यात चोरट्यांनी धुमाकूळ घातला असून, राज्यातील वेगवेगळ्या भागातून चोरीच्या घटना उघडकीस येत असतात. अशातचं आता पुण्यातून एक मोठी बातमी समोर आली आहे. सहकारनगर भागात भरदुपारी दुचाकीचालक महिलेजवळील १ लाख रुपयांची रोकड असलेली पिशवी हिसकावून चोरून नेल्याची घटना घडली आहे. याप्रकरणी अज्ञात चोरट्यांवर गुन्हा दाखल केला. याप्रकरणी ४६ वर्षीय महिलेने सहकारनगर पोलीस ठाण्यात तक्रार दिली आहे. त्यानुसार दुचाकीस्वार चोरट्यांवर गु्न्हा नोंद केला आहे.

पोलिसांच्या माहितीनुसार, तक्रारदार महिला तळजाई वसाहत भागात राहायला आहेत. त्या बुधवारी (५ मार्च) दुपारी साडेबाराच्या सुमारास सहकारनगर भागातून दुचाकीवरुन मुलासोबत निघाल्या होत्या. महिलेने बँकेतून एक लाखांची रोकड काढून पिशवीत ठेवली होती. विद्या विकास शाळेजवळ पाठिमागून दुचाकीवर आलेल्या चोरट्यांनी महिलेच्या हातातील रोकड असलेली पिशवी हिसकावून पोबारा केला. पिशवी हिसकावताच महिलेने आरडाओरडा केला. चोरटे भरधाव वेगात पसार झाले. या घटनेची माहिती मिळताच सहकारनगर पोलीस ठाण्याचे वरिष्ठ निरीक्षक राहुल गौड यांनी घटनास्थळी भेट दिली. पसार झालेल्या चोरट्यांचा माग काढण्यात येत आहे. पोलिसांनी परिसरातील सीसीटीव्ही तपासले आहे. सहायक निरीक्षक सागर पाटील तपास करत आहेत.

शहरात महिलांकडील दागिने हिसकावणे, तसेच पादचाऱ्यांकडील मोबाइल हिसकावण्याच्या घटनांमध्ये वाढ झाली आहे. गेल्या वर्षी अशा प्रकारचे १८० हून जास्त गु्न्हे दाखल झाले होते.

महिलेकडील अडीच लाखांचे दागिने चोरी

पादचारी महिलेकडील अडीच लाखांचे सोन्याचे दागिन चोरून नेल्याची घटना नगर रस्त्यावरील वाघोली भागात घडली आहे. याबाबत एका महिलेने वाघोली पोलीस ठाण्यात फिर्याद दिली आहे. तक्रारदार महिला कात्रज-कोंढवा रस्त्यावरील एका सोसायटीत राहायला आहेत. त्या मंगळवारी वाघोली भागात गेल्या होत्या. मंगळवारी रात्री नऊच्या सुमारास त्या ढोले पाटील महाविद्यालयाजवळ थांबल्या होत्या. दुचाकीस्वार चोरट्यांनी महिलेच्या गळ्यातील अडीच लाखांचे दागिने चोरुन नेले. पोलीस उपनिरीक्षक वैजीनाथ केदार तपास करत आहेत.