सातारा-सांगली जिल्ह्यातून दोन सराईत गुन्हेगार तडीपार; दोन वर्षांसाठी केली गेली मोठी कारवाई

सातारा जिल्ह्यात शांतता व सुव्यवस्था अबाधित ठेवण्यासाठी अशा सराईत गुन्हेगारांविरुद्ध भविष्यातही हद्दपारी, मोक्का, एमपीडीए अशा कडक कारवाया सुरू राहतील, अशी माहिती पोलीस प्रशासनाकडून देण्यात आली आहे.

कराड : कराड शहर परिसरात शरिराविरुद्ध व मालमत्तेविरुद्ध गुन्हे करणाऱ्या टोळीवर सातारा पोलिसांनी कडक कारवाई करत दोन सराईत गुन्हेगारांना सातारा व सांगली जिल्हा हद्दीतून दोन वर्षांसाठी तडीपार केले आहे. आशिष उर्फ बाळू अरुण कुर्ले (वय 28, रा. शनिवार पेठ, कराड) व श्रीधर उर्फ भैया काशीनाथ थोरवडे (वय 21, रा. बुधवार पेठ, कराड) अशी तडीपार करण्यात आलेल्यांची नावे आहेत. या दोघांविरुद्ध खुनाचा प्रयत्न, खंडणी, दरोडा, मारहाण, जबरी चोरी, विनयभंग अशा गंभीर स्वरूपाचे गुन्हे दाखल आहेत.

याबाबत पोलिसांकडून मिळालेली माहिती अशी की, सदर प्रस्ताव कराड शहर पोलिस ठाण्याचे वरिष्ठ पोलीस निरीक्षक आर. ए. ताशिलदार यांनी महाराष्ट्र पोलीस कायदा कलम ५५ अंतर्गत तयार करून हद्दपार प्राधिकरण तथा पोलीस अधीक्षक तुषार दोशी यांच्या कार्यालयात सादर केला होता. या प्रस्तावाची चौकशी पोलीस उपअधीक्षक राजश्री पाटील यांनी केली. सुनावणीनंतर आशिष उर्फ बाळू अरुण कुर्ले व श्रीधर उर्फ भैया काशीनाथ थोरवडे या दोघांना दोन वर्षांसाठी सातारा व सांगली जिल्ह्याबाहेर हद्दपार करण्याचे आदेश पोलीस अधीक्षकांनी दिले.

हेदेखील वाचा : Ratnagiri Crime: Jeevansathi.com वर फसवणुकीचा जाळा! पोलिस असल्याचे सांगून लग्नाचे आमिष दाखवलं, अनेकांना लुटून महिलांवर अत्याचार

दरम्यान, या टोळीवर पूर्वी अनेकवेळा अटक आणि प्रतिबंधक कारवाया करण्यात आल्या होत्या, तरीही त्यांनी गुन्हेगारी कारवाया सुरूच ठेवल्या. त्यानुसार ही कारवाई करण्यात आली. या प्रकरणात सरकार पक्षाच्या वतीने अपर पोलीस अधीक्षक डॉ. वैशाली कडुकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक अरुण देवकर, पोलिस हवालदार प्रमोद सावंत, अमित सपकाळ यांनी महत्वाची भूमिका बजावली.

सातारा जिल्ह्यात शांतता व सुव्यवस्था अबाधित ठेवण्यासाठी अशा सराईत गुन्हेगारांविरुद्ध भविष्यातही हद्दपारी, मोक्का, एमपीडीए अशा कडक कारवाया सुरू राहतील, अशी माहिती पोलीस प्रशासनाकडून देण्यात आली आहे.