ब्रेकअप झाल्याने फार्मसीची विद्यार्थिनी नैराश्येत; गळफास घेऊन संपवलं जीवन

आस्था ही तुळशीराम गायकवाड पाटील फार्मसी कॉलेजमध्ये शिक्षण घेत होती. ती बुटीबोरीजवळील सातगाव (म्हसाळा) येथे चंदन पोंगळे यांच्या घरी भाड्याने राहत होती.

बुटीबोरी : गेल्या काही दिवसांपासून गुन्हेगारीच्या घटनांमध्ये वाढ होताना दिसत आहे. किरकोळ कारणावरून खून, खुनाचा प्रयत्न यांसारख्या घटना घडत आहेत. त्यातच आता चंद्रपुरातील एका तरुणीने ब्रेकअप झाल्याने आत्महत्या केल्याची धक्कादायक घटना समोर आली आहे. बुटीबोरीजवळील सातगाव (म्हसाळा) येथे ही घटना घडली.

आस्था कुंदन नगराळे (वय २१, रा. शास्त्रीनगर, भद्रावती, जि. चंद्रपूर) असे आत्महत्या करणाऱ्या तरुणीचे नाव आहे. आस्था ही तुळशीराम गायकवाड पाटील फार्मसी कॉलेजमध्ये शिक्षण घेत होती. ती बुटीबोरीजवळील सातगाव (म्हसाळा) येथे चंदन पोंगळे यांच्या घरी भाड्याने राहत होती. ८ एप्रिलला रात्री १०.३० च्या सुमारास ती घरच्यांचे फोन उचलत नसल्याने आईने नागपूरला असलेल्या नातेवाईकांना कळवले. तिचे चुलत भाऊ प्रणय नगराळे यांनी तातडीने सातगाव गाठले असता आस्थाने रूममधील सीलिंग फॅनला दुपट्ट्याने गळफास घेतल्याचे दृश्य समोर आले.

आस्थाने यापूर्वी दोनवेळा ‘नीट’ परीक्षेसाठी ‘ड्रॉप’ घेतला होता. मात्र, अपेक्षित यश मिळत नसल्याने ती सतत चिडचिड करत असे आणि मानसिक तणावात राहत होती. त्यातच तन्मय बोरीकर नावाच्या तरुणासोबत असलेल्या प्रेमसंबंधात काही काळापासून दुरावा निर्माण झाला होता. शैक्षणिक अपयश आणि प्रेमभंगाचे दुःख अशा दुहेरी संकटात सापडलेल्या आस्थाने अखेर टोकाचा निर्णय घेतल्याचे बोलले जात आहे.

सुसाईड नोटमध्ये काय?

पोलिसांनी पंचनामा केला. यावेळी आस्थाने लिहिलेली ‘सुसाईड नोट’ सापडली. इंग्रजीत लिहिलेल्या चिठ्ठीत तिने नमूद केले की, ‘मी माझ्या इच्छेने हे पाऊल उचलत आहे. माझ्या मृत्यूसाठी कोणालाही दोषी ठरवू नये’ जरी तिने कोणाला जबाबदार धरले नसले तरी, तिच्या वैयक्तिक आयुष्यातील संघर्ष समोर येत आहे.

तरुणीच्या भावाची पोलिसांत तक्रार

याप्रकरणी मृत मुलीचा भाऊ प्रणय राजेश नगराळे (रा. नोएडा) यांच्या तक्रारीवरून बुटीबोरी पोलिसांनी घटनेची नोंद केली आहे. ‘माझा कोणावरही प्रत्यक्ष किंवा अप्रत्यक्ष संशय नाही’ असे त्यांनी जबाबात म्हटले आहे. तपासासाठी सुसाईड नोट ताब्यात घेतली आहे.

तरुणांमध्ये वाढते मानसिक नैराश्य

तरुणांमध्ये वाढते मानसिक नैराश्य आणि आत्महत्येचे विचार ही एक गंभीर सामाजिक समस्या बनत आहे. शैक्षणिक किंवा वैयक्तिक कारणांमुळे तणाव जाणवल्यास त्वरित समुपदेशकाची किंवा मदतीसाठी उपलब्ध असलेल्या हेल्पलाईनची मदत घेणे आवश्यक आहे.

– नीलेश चौरे, वरिष्ठ पोलिस निरीक्षक, बुटीबोरी पोलिस स्टेशन