Abhijeet Sawant: अभिजीत सावंत घेऊन येतोय ‘90’s बँड’; नव्वदीच्या गाण्यांची पुन्हा रंगणार मैफल!

Abhijeet Sawant: गायक अभिजीत सावंत लवकरच ‘90’s बँड’मधून नव्वदीच्या दशकातील लोकप्रिय गाण्यांची मैफल घेऊन येणार आहे. काय आहे ही नवी संकल्पना? जाणून घ्या.

Abhijeet Sawant: प्रसिद्ध गायक अभिजीत सावंतने आपल्या सुरेल आवाजाने आजवर प्रेक्षकांच्या मनावर अधिराज्य गाजवलं आहे. ‘इंडियन आयडॉल’मधून घराघरांत पोहोचलेला अभिजीत आता एका नव्या संकल्पनेसह प्रेक्षकांच्या भेटीला येण्यासाठी सज्ज झाला आहे. नुकताच त्याने सोशल मीडियावर एक खास व्हिडीओ शेअर केला असून, त्यातून त्याच्या आगामी ‘90’s बँड’ची झलक समोर आली आहे. या नव्या उपक्रमामुळे पुन्हा एकदा नव्वदीच्या दशकातील गाण्यांची जादू अनुभवायला मिळणार आहे.

काय आहे अभिजीत सावंतचा ‘90’s बँड’?

अभिजीत सावंतने आजवर ‘इंडियन आयडॉल’, ‘बिग बॉस मराठी’ आणि ‘इंडियन आयडॉल लीजेंड्स रिटर्न’ यांसारख्या कार्यक्रमांमधून प्रेक्षकांचं मनोरंजन केलं आहे. आता ‘90’s बँड’च्या माध्यमातून तो नव्वदीच्या दशकातील लोकप्रिय गाण्यांची खास मैफल घेऊन येणार आहे.

या संकल्पनेबद्दल बोलताना अभिजीतने सांगितलं की, नव्वदीच्या दशकातील गाणी आजही प्रेक्षकांच्या मनात विशेष स्थान राखून आहेत. वेगवेगळ्या प्रकारची गाणी गाताना जुन्या गाण्यांमधील वेगळीच मजा जाणवते. त्यामुळे पुन्हा एकदा प्रेक्षकांना त्या काळातील संगीतविश्वात घेऊन जाण्याची इच्छा त्याला झाली. याच विचारातून ‘90’s बँड’ची संकल्पना आकाराला आली आहे.

Shah Rukh Khan: ‘कातिल नहीं… आशिक हूं’; शाहरुख खानच्या ‘किंग’चा नवा दमदार पोस्टर प्रदर्शित, चाहत्यांची उत्सुकता वाढली!

‘90’s बँड’ कधी येणार प्रेक्षकांच्या भेटीला?

अभिजीतने या नव्या उपक्रमाची माहिती दिली असली, तरी ‘90’s बँड’ नेमका कसा असणार आणि त्याची सुरुवात कधी होणार, याबाबत अद्याप अधिकृत माहिती समोर आलेली नाही. त्यामुळे या बँडमध्ये कोणती गाणी सादर केली जाणार आणि प्रेक्षकांना ही संगीताची मैफल कुठे अनुभवता येणार, याची उत्सुकता वाढली आहे.

जेन झीलाही भावणार नव्वदीच्या गाण्यांची जादू?

नव्वदीच्या दशकातील गाण्यांची लोकप्रियता आजही कायम आहे. त्या काळातील गाण्यांशी अनेकांच्या आठवणी जोडलेल्या आहेत. अभिजीत सावंतचा ‘90’s बँड’ जुन्या गाण्यांची हीच जादू नव्या पिढीपर्यंत पोहोचवण्याचा प्रयत्न करणार आहे. त्यामुळे जुन्या गाण्यांचे चाहतेच नव्हे, तर जेन झीमधील संगीतप्रेमींनाही या संकल्पनेची भुरळ पडू शकते.

दरम्यान, अभिजीत सध्या ‘इंडियन आयडॉल लीजेंड्स रिटर्न’मध्ये आपल्या जुन्या सहकाऱ्यांसोबत परफॉर्म करताना दिसत आहे. आता ‘90’s बँड’च्या माध्यमातून तो संगीतप्रेमींसाठी काय खास घेऊन येणार, हे पाहणं महत्त्वाचं ठरणार आहे.