(फोटो सौजन्य-सोशल मीडिया)
मिळालेल्या माहितीनुसार, संबंधित जागेच्या व्यावसायिक वापरासाठी के-वेस्ट विभागाकडून कोणतीही परवानगी देण्यात आलेली नसल्याचे पालिकेने स्पष्ट केले आहे. या प्रकरणी आवश्यक कागदपत्रे सादर करण्यास सांगण्यात आले होते. मात्र, कागदपत्रे सादर न झाल्याने काम थांबवण्याची नोटीस बजावण्यात आल्याचे पालिका अधिकाऱ्यांनी सांगितले.
मुंबई मिररच्या वृत्तानुसार, अजय देवगणने कपोळ को-ऑपरेटिव्ह हाउसिंग सोसायटीमधील आपली एक मालमत्ता भाड्याने दिली होती. या जागेचा वापर सलून आणि स्पासाठी केला जाणार असल्याची माहिती समोर आल्यानंतर सोसायटीतील रहिवाशांनी आक्षेप घेतला.
सोसायटीने देवगण कुटुंबाला पत्र लिहून संबंधित कागदपत्रे सादर करण्याची मागणी केली होती. या जागेचा सलून आणि स्पासाठी कायदेशीररित्या व्यावसायिक वापर करता येतो, हे सिद्ध करणारी आवश्यक कागदपत्रे सादर करण्याची मागणी करण्यात आली होती. मात्र, सोसायटीच्या म्हणण्यानुसार, या पत्राला देवगण कुटुंबाकडून प्रतिसाद मिळाला नाही.
BMCने काय म्हटलं?
के-वेस्ट वॉर्डच्या अधिकाऱ्याने दिलेल्या माहितीनुसार, संबंधित परिसराच्या व्यावसायिक वापरासाठी पालिकेकडून परवानगी देण्यात आलेली नाही. सोसायटीकडून तक्रार प्राप्त झाल्यानंतर मालकांकडून कागदपत्रे मागवण्यात आली होती. मात्र, ही कागदपत्रे सादर न झाल्याने ‘स्टॉप वर्क’ नोटीस बजावण्यात आली.
देवगण कुटुंबाची काय भूमिका?
दरम्यान, देवगण कुटुंबाकडून या प्रकरणी आपली बाजू स्पष्ट करण्यात आली आहे. आवश्यक असलेल्या सर्व परवानग्या आणि मंजुरी संबंधित अधिकाऱ्यांकडून रितसर घेण्यात आल्याचा दावा करण्यात आला आहे.
अजय देवगणच्या टीममधील चीफ लीगल अँड कम्प्लायन्स ऑफिसर रुचि कनोजिया यांनी सांगितले की, “जागेच्या प्रस्तावित वापराबाबत आवश्यक परवानग्या आणि मंजुरी संबंधित अधिकाऱ्यांकडून रितसर घेण्यात आल्या आहेत.”
मिळालेल्या माहितीनुसार, देवगण कुटुंबाने या प्रकरणी उत्तर देण्यासाठी चार आठवड्यांची मुदत मागितली आहे. हे प्रकरण आता को-ऑपरेटिव्ह विभागापर्यंतही पोहोचले असून, तक्रारीच्या आधारे पुढील कारवाई सुरू असल्याची माहिती आहे.
नेमका वाद कशावरून?
या संपूर्ण प्रकरणात मालमत्ता भाड्याने देण्याला सोसायटीचा मुख्य आक्षेप नसून, निवासी सोसायटीतील मालमत्तेच्या व्यावसायिक वापराबाबत प्रश्न उपस्थित करण्यात आला आहे. ही सोसायटी पूर्णपणे निवासी असल्याचे सांगत, नागरी आणि कायदेशीर परवानग्यांव्यतिरिक्त या बंगल्याचा व्यावसायिक कारणांसाठी वापर करता येतो का, असा सवाल सोसायटीकडून करण्यात आला आहे.
सध्या BMCची नोटीस, सोसायटीची तक्रार आणि देवगण कुटुंबाकडून देण्यात आलेली परवानग्यांची माहिती यामुळे हे प्रकरण चर्चेत आले आहे. पुढील प्रक्रियेत संबंधित कागदपत्रे आणि परवानग्यांच्या आधारे या वादावर काय निर्णय होतो, हे पाहणे महत्त्वाचे ठरणार आहे.
.png "Videos"){kind=small}
