सोमवार, 17 ऑगस्ट 2026
( फोटो सौजन्य- सोशल मिडिया)
Anurag Kashyap: दिग्दर्शक आणि निर्माते अनुराग कश्यप सध्या त्यांच्या वैयक्तिक आयुष्यामुळे चर्चेत आहेत. ५३ वर्षीय अनुराग कश्यप आणि त्यांच्यापेक्षा २० वर्षांनी लहान असलेल्या शुभ्रा शेट्टी यांच्या नात्याची अनेकदा चर्चा होते. नुकत्याच दिलेल्या एका मुलाखतीत अनुराग यांनी शुभ्रासोबतच्या नात्यावर, लग्नाच्या योजनांवर आणि वयातील अंतरामुळे येणाऱ्या अस्वस्थतेवर मोकळेपणाने भाष्य केलं.
“मी तिच्यासोबत खूप आनंदी आहे”
जेनिस सेक्वेरा यांच्याशी झालेल्या संवादात अनुराग कश्यप यांनी शुभ्रा शेट्टीसोबतच्या नात्याबद्दल बोलताना सांगितलं की, ते तिच्यासोबत आनंदी आहेत आणि त्यांना तिच्यासोबतच राहायचं आहे.
ते म्हणाले, “मी तिच्यासोबत खूप आनंदी आहे. मला तिच्यासोबतच राहायचं आहे. त्यामुळे, जे काही करावं लागेल ते मी करेन.”
अनुराग यांनी पुढे आयुष्याबद्दलच्या त्यांच्या विचारांवरही भाष्य केलं. “मला माझ्या प्रियजनांपेक्षा जास्त काळ जगण्याइतके निरोगी राहायचं आहे. कारण जर तसं झालं नाही, तर त्यानंतर काय होईल? त्यामुळे मी याचा खूप विचार करतो,” असं त्यांनी म्हटलं.
अनुराग यांच्या म्हणण्यानुसार, शुभ्रा शेट्टी लग्नाच्या संकल्पनेवर फारसा विश्वास ठेवत नाही. त्यामुळे सध्या दोघेही त्यांच्या नात्यात आनंदी असल्याचं त्यांनी सांगितलं.
“जोपर्यंत आपल्याकडे सध्या जे काही आहे, त्यात मी आनंदी आहे. मला ते गमवायचं नाही,” असं अनुराग यांनी स्पष्ट केलं.
अनुराग आणि शुभ्रा यांच्या वयात तब्बल २० वर्षांचं अंतर आहे. या वयातील फरकामुळे एका टप्प्यावर अनुराग यांना अस्वस्थ वाटत होतं आणि त्यांनी शुभ्रापासून दूर राहण्याचाही प्रयत्न केला होता.
याबद्दल बोलताना ते म्हणाले, “असे काही क्षण आले जेव्हा आम्हाला थोडं अस्वस्थ वाटलं. मला जास्त अस्वस्थ वाटत होतं. एका क्षणी मला इतकं अस्वस्थ वाटलं की मी दूर राहण्याचा प्रयत्न केला.”
“ती तिच्या वयाची दिसत नाही”
शुभ्राच्या दिसण्याबद्दल बोलताना अनुराग यांनी सांगितलं की, तिच्या चेहऱ्यावरून तिचं वय कळत नाही. त्यामुळे जसजसं त्यांचं वय वाढत गेलं, तसतसं त्यांना या वयातील अंतराची जाणीव अधिक होऊ लागली.
ते म्हणाले, “तिच्या चेहऱ्यावरून तिचं वय कळत नाही. ती आजही तशीच दिसते. ती तिच्या वयाची दिसत नाही. त्यामुळे जसजसं माझं वय वाढत गेलं आणि ती तशीच दिसत राहिली, तसतसं मला थोडं अस्वस्थ वाटू लागलं.”
शुभ्रा शेट्टी यांनी अनुराग कश्यप यांच्यासाठी सहाय्यक दिग्दर्शक म्हणून काम केलं आहे. त्या अनुराग यांच्या निर्मिती संस्था फँटम फिल्म्सशीही संबंधित होत्या. दोघे २०१५ मध्ये पहिल्यांदा सार्वजनिकरित्या एकत्र दिसले होते, तर २०१८ मध्ये त्यांनी आपल्या नात्याची अधिकृत घोषणा केली होती.
सध्या शुभ्रा शेट्टी प्रसिद्धीपासून काहीशा दूर राहतात. मात्र, अनुराग यांच्यासोबतच्या नात्यामुळे त्या अनेकदा चर्चेत येतात.
शुभ्रापूर्वी अनुराग कश्यप यांनी दोनदा लग्न केलं आहे. त्यांचं पहिलं लग्न आरती बजाज यांच्यासोबत झालं होतं. दोघांनी २००९ मध्ये घटस्फोट घेतला. या दोघांना एक मुलगी आहे.
यानंतर अनुराग यांनी अभिनेत्री कल्की कोचलिन यांच्यासोबत लग्न केलं होतं. मात्र, त्यांचं नातंही फार काळ टिकलं नाही आणि २०१५ मध्ये दोघांचा घटस्फोट झाला.आता शुभ्रा शेट्टीसोबतच्या नात्याबद्दल अनुराग यांनी केलेल्या या स्पष्ट वक्तव्यामुळे पुन्हा एकदा त्यांच्या वैयक्तिक आयुष्याची चर्चा रंगली आहे.
