(फोटो सौजन्य- सोशल मीडिया)
‘हनुमान अंश’ हा चित्रपट ७ ऑगस्ट रोजी प्रदर्शित झाला. प्रदर्शनाच्या सुरुवातीला हा चित्रपट चित्रपटगृहांमध्ये फार काळ टिकणार नाही, अशी शक्यता व्यक्त केली जात होती. मात्र, जसजसे दिवस पुढे गेले, तसतशी चित्रपटाची कमाई वाढत गेली. विशेष म्हणजे, ज्या काळात बहुतांश चित्रपटांची कमाई दिवसेंदिवस कमी होत जाते, त्याच काळात ‘हनुमान अंश’च्या कमाईत सातत्याने वाढ झाल्याचे आकडे सांगतात.
नीम करोली बाबा यांना ‘महाराज-जी’ म्हणूनही ओळखले जाते. त्यांच्या जीवनातील दयाळूपणा, सेवा आणि आध्यात्मिक विचारांवर या चित्रपटात प्रकाश टाकण्यात आला आहे. कोणताही मोठा स्टार नसतानाही प्रेक्षकांकडून मिळालेल्या प्रतिसादामुळे हा सिनेमा बॉक्स ऑफिसवर चर्चेचा विषय ठरला आहे.
मिळालेल्या माहितीनुसार, ‘हनुमान अंश’ची निर्मिती अवघ्या २ कोटी रुपयांच्या बजेटमध्ये करण्यात आली आहे. मात्र, या चित्रपटाने भारतात ५० कोटी रुपयांचा टप्पा पार केला आहे. भारतातील निव्वळ कमाई ५४.१३ कोटी रुपये, तर एकूण कमाई ६३.८२ कोटी रुपयांपर्यंत पोहोचल्याचे सांगितले जात आहे.
चित्रपटाच्या बजेटच्या तुलनेत ही कमाई पाहता त्याने तब्बल २६ पटींहून अधिक परतावा मिळवल्याचा दावा केला जात आहे. त्यामुळे २०२६ मधील सर्वाधिक नफा कमावणाऱ्या चित्रपटांमध्ये ‘हनुमान अंश’चा समावेश झाल्याची चर्चा आहे.
‘हनुमान अंश’च्या बॉक्स ऑफिस प्रवासातील सर्वात आश्चर्यकारक बाब म्हणजे त्याची वाढती कमाई. प्रदर्शनाच्या पहिल्या काही दिवसांत चित्रपटाने सुमारे १० लाख, १५ लाख आणि २० लाख रुपयांच्या आसपास कमाई केली होती. मात्र, त्यानंतर चित्रपटाच्या कमाईचा वेग वाढला.
१६व्या दिवशी चित्रपटाच्या कमाईत तब्बल ६३ टक्क्यांची वाढ झाली आणि त्याने सुमारे ८५ लाख रुपये कमावले. त्यानंतर १७व्या दिवशी ही कमाई थेट २.२० कोटी रुपयांवर पोहोचली. पुढील दिवसांतही चित्रपटाने चांगली कामगिरी कायम ठेवली. २४व्या दिवशी म्हणजेच रविवारी चित्रपटाने १२.७५ कोटी रुपयांची कमाई केल्याचे आकडे सांगतात.
सॅकनिल्कच्या अहवालानुसार, ‘हनुमान अंश’ने चौथ्या सोमवारी म्हणजेच २५व्या दिवशी ५.५० कोटी रुपयांची कमाई केली. त्यानंतर २६व्या दिवशी म्हणजेच मंगळवारी चित्रपटाने ८.५० कोटी रुपये कमावल्याचे सांगितले जात आहे.
देशभरातील ७,००८ शोमधून ही कमाई झाल्याचे आकडे आहेत. यातील सर्वाधिक शो दिल्ली-एनसीआरमध्ये झाल्याचे सांगितले जात आहे.
‘हनुमान अंश’च्या वाढत्या कमाईमुळे आता त्याची तुलना मोठ्या बजेटच्या चित्रपटांशी केली जात आहे. यशचा ‘टॉक्सिक’ हा मोठ्या अपेक्षांमध्ये प्रदर्शित झालेला चित्रपट असून, ‘हनुमान अंश’ त्याच्या प्रदर्शनानंतर अवघ्या आठ दिवसांनी प्रदर्शित झाला. त्यामुळे दोन्ही चित्रपटांच्या बॉक्स ऑफिस कामगिरीची चर्चा रंगली आहे.
दरम्यान, इम्रान हाश्मीच्या ‘अवारपन २’च्या कमाईचा वेग आता स्थिरावल्याचेही सांगितले जात आहे.
चित्रपटाची कथा नेमकी काय?
‘हनुमान अंश’ची कथा नीम करोली बाबांच्या जीवनावर आधारित आहे. विशाल चतुर्वेदी यांनी या चित्रपटाचे लेखन आणि दिग्दर्शन केले आहे.
चित्रपटाच्या कथेनुसार, एका दुःखी मुलाला आपल्या दिवंगत आईसोबत पुन्हा एकदा जोडले जाण्याची इच्छा असते. पुढे त्याला दैवी शक्तीचा अनुभव येतो आणि प्रेम, अन्नदान तसेच आशीर्वादाच्या माध्यमातून मानवतेची सेवा करण्याचा मार्ग तो स्वीकारतो. पुढे हाच मुलगा ‘हनुमान अंश’ अर्थात नीम करोली बाबा म्हणून ओळखला जातो.
५०००% नफ्यापर्यंत पोहोचणार?
‘हनुमान अंश’ने आतापर्यंत २६०० टक्क्यांहून अधिक नफा कमावल्याचा दावा केला जात आहे. चित्रपटाची कमाई अशीच सुरू राहिली, तर प्रदर्शनाच्या अखेरीस हा नफा ५००० टक्क्यांपर्यंत पोहोचू शकतो, असा अंदाज चित्रपट तज्ज्ञांकडून व्यक्त केला जात आहे.
मोठ्या बजेटचे आणि स्टारकास्ट असलेले चित्रपट बॉक्स ऑफिसवर वर्चस्व गाजवत असताना, केवळ २ कोटी रुपयांच्या बजेटमध्ये तयार झालेल्या ‘हनुमान अंश’ने मिळवलेले हे यश निश्चितच लक्षवेधी ठरत आहे.
.png "Videos"){kind=small}
