रविवार, 1 नोव्हेंबर 2026
(फोटो सौजन्य-सोशल मीडिया)
Honey Singh: प्रसिद्ध रॅपर यो यो हनी सिंगवर दुःखाचा डोंगर कोसळला आहे. १ नोव्हेंबर रोजी पंजाबमधील जालंधर येथे झालेल्या भीषण कार अपघातात त्याच्या पुतण्याचा मृत्यू झाला. या अपघातात हनी सिंगच्या पुतण्याच्या मित्राचाही मृत्यू झाल्याची माहिती समोर आली आहे. या दुःखद घटनेनंतर हनी सिंगने सोशल मीडियावर पोस्ट शेअर करत आपल्या भावना व्यक्त केल्या आहेत.
मिळालेल्या माहितीनुसार, हनी सिंगचा पुतण्या विदित ओलक आणि त्याचा मित्र एका पार्टीवरून घरी परतत होते. त्यावेळी त्यांच्या कारची ट्रॅक्टर-ट्रॉलीला धडक बसली. हा अपघात इतका भीषण होता की कारचे मोठ्या प्रमाणात नुकसान झाले आणि दोघांचाही मृत्यू झाला. ही घटना पहाटे सुमारे ३ वाजण्याच्या सुमारास घडल्याचे सांगितले जात आहे.
अपघाताच्या वेळी कारमध्ये पाच जण होते. त्यापैकी तिघांना आधीच त्यांच्या घरी सोडण्यात आले होते. त्यानंतर उर्वरित दोघे घरी परतत असताना हा अपघात झाला. दोघांच्या कुटुंबीयांना घटनेची माहिती देण्यात आली असून मृतदेह त्यांच्या ताब्यात देण्यात आल्याची माहिती आहे.
या घटनेनंतर हनी सिंगने इन्स्टाग्राम स्टोरीवर पोस्ट शेअर करत पुतण्याच्या निधनाबद्दल दुःख व्यक्त केले. त्याने पोस्टमध्ये लिहिले, “हा माझ्यासाठी अत्यंत कठीण दिवस आहे. आपल्या पुतण्याला गमावणं अत्यंत हृदयद्रावक आहे. भोलेनाथची कृपा राहो.”
हनी सिंगचा पुतण्या विदित ओलक हा पंजाबी म्युझिक कंपनी ‘स्पीड रेकॉर्ड्स’चे मालक दिनेश यांचा मुलगा असल्याची माहिती समोर आली आहे. या घटनेमुळे हनी सिंगच्या कुटुंबावर दुःखाचा डोंगर कोसळला आहे. पुतण्याच्या निधनाची बातमी शेअर केल्यानंतर त्याने आपले इन्स्टाग्राम प्रोफाइलही हटवल्याचे सांगितले जात आहे.
