(फोटो सौजन्य- सोशल मीडिया)
Javed Akhtar on Ramayana: नितेश तिवारी दिग्दर्शित ‘रामायण’ चित्रपटाची सध्या सर्वत्र जोरदार चर्चा सुरू आहे. बॉक्स ऑफिसवरही हा सिनेमा चांगली कमाई करत असून प्रदर्शनाच्या १३व्या दिवशीही चित्रपटाची पकड मजबूत असल्याचे पाहायला मिळत आहे. या चित्रपटाचे काही जणांकडून कौतुक होत आहे, तर काहींनी त्यावर टीकाही केली आहे. अशातच प्रसिद्ध गीतकार आणि लेखक जावेद अख्तर यांनी ‘रामायण’ चित्रपटाबद्दल केलेले वक्तव्य सध्या चर्चेचा विषय ठरत आहे.
जावेद अख्तर यांनी अद्याप ‘रामायण’ चित्रपट पाहिलेला नाही. मात्र, हा सिनेमा पाहण्याची त्यांची इच्छा आहे. नुकत्याच एका कार्यक्रमात त्यांना नितेश तिवारी दिग्दर्शित ‘रामायण’ पाहिला का, असा प्रश्न विचारण्यात आला. त्यावर उत्तर देताना त्यांनी आपण हा चित्रपट नक्कीच पाहणार असल्याचे सांगितले. तसेच त्यांची मुलगी झोया अख्तर हिने हा चित्रपट पाहिला असून तिला तो आवडल्याचेही त्यांनी सांगितले. झोया सहसा एखाद्या गोष्टीचे सहज कौतुक करत नाही, असेही जावेद अख्तर यांनी नमूद केले.
याच कार्यक्रमात जावेद अख्तर यांनी भगवान राम यांच्याविषयी आपले विचार मांडले. ते म्हणाले, “भगवान राम केवळ एक व्यक्ती नाहीत, तर ते एक आदर्श आणि जगण्याची एक पद्धत आहेत. प्रत्येक भारतीयामध्ये आणि त्याच्या संस्कारांमध्ये राम आहेत. कदाचित माझ्या या वक्तव्यामुळे उद्या अनेक जण नाराज होतील. पण राम यांचे विचार प्रत्येक भारतीयाच्या रक्तात आहेत. मग ती व्यक्ती कोणत्याही धर्माची असो.”
पुढे त्यांनी सांगितले की, अनेकदा भगवान राम यांच्याकडे केवळ एक व्यक्ती म्हणून पाहिले जाते; मात्र त्यांचे महत्त्व त्यापेक्षा कितीतरी मोठे आहे. ते जीवन जगण्याच्या एका तत्त्वज्ञानाचे प्रतिनिधित्व करतात. जावेद अख्तर यांच्या या वक्तव्यामुळे ‘रामायण’ चित्रपटासोबतच भगवान राम यांच्याविषयीची त्यांची भूमिका सोशल मीडियावर चर्चेत आली आहे.






