(फोटो सौजन्य- सोशल मीडिया)
Ramayana Movie:रणबीर कपूरचा बहुचर्चित चित्रपट ‘रामायण’ प्रदर्शित झाल्यापासून वेगवेगळ्या कारणांमुळे चर्चेत आहे. या चित्रपटाची प्रेक्षकांमधील क्रेझ पाहता कोलकात्यातील एका चित्रपटगृहाने घेतलेला विशेष निर्णय सध्या चर्चेचा विषय ठरत आहे. ‘रामायण’ पाहण्यासाठी येणाऱ्या प्रेक्षकांना चित्रपटगृहातील सभागृहात केवळ शाकाहारी खाद्यपदार्थच उपलब्ध करून दिले जाणार आहेत. प्रेक्षकांच्या धार्मिक भावना आणि श्रद्धांचा आदर राखण्यासाठी हा निर्णय घेण्यात आल्याचे सांगण्यात येत आहे.
कोलकात्यातील एसव्हीएफ सिनेमाने रणबीर कपूरच्या ‘रामायण: राइज ऑफ अ लेजेंड’ या चित्रपटाच्या प्रदर्शनासाठी ही विशेष व्यवस्था केली आहे. या नियमानुसार, चित्रपट सुरू असताना सभागृहात बसलेल्या प्रेक्षकांना केवळ शाकाहारी खाद्यपदार्थांचा आस्वाद घेता येणार आहे. विशेष म्हणजे, हा नियम फक्त ‘रामायण’च्या प्रदर्शनापुरताच लागू असणार आहे. इतर चित्रपटांच्या प्रदर्शनावेळी नेहमीप्रमाणे संपूर्ण खाद्यपदार्थांचा मेन्यू उपलब्ध असेल.
धार्मिक भावना आणि श्रद्धेचा आदर करण्यासाठी निर्णय
एसव्हीएफ सिनेमाच्या प्रवक्त्याने या निर्णयामागील भूमिका स्पष्ट केली आहे. हिंदू महाकाव्य रामायणाबद्दल असलेली लोकांची श्रद्धा आणि धार्मिक भावना लक्षात घेऊन हा निर्णय घेण्यात आल्याचे त्यांनी सांगितले. काही चित्रपट हे केवळ मनोरंजनाचे माध्यम नसतात, तर ते लोकांच्या धार्मिक श्रद्धा आणि भावनांशीही जोडलेले असतात, असे कंपनीचे मत आहे.
कंपनीच्या मते, चित्रपटातील प्रसंगांदरम्यान जेव्हा हनुमान चालिसा ऐकायला मिळते, तेव्हा चित्रपटगृहातील वातावरण एखाद्या मंदिरासारखे वाटते. त्यामुळे या चित्रपटाचा अनुभव घेताना प्रेक्षकांच्या श्रद्धेचा आदर राखला जावा, या उद्देशाने ही विशेष व्यवस्था करण्यात आली आहे.
दरम्यान, चित्रपटगृहाने या निर्णयाबाबत एक महत्त्वाची बाबही स्पष्ट केली आहे. या निर्णयाचा अर्थ मांसाहारी खाद्यपदार्थांवर संपूर्ण बंदी असा नाही. प्रेक्षक पूर्वीप्रमाणेच चित्रपटगृहाबाहेरील फूड काउंटरवरून मांसाहारी पदार्थ खरेदी करू शकतात. मात्र, ‘रामायण’ चित्रपट पाहताना सभागृहात मांसाहारी खाद्यपदार्थ नेण्याची परवानगी दिली जाणार नाही.
इतर चित्रपटांच्या प्रदर्शनादरम्यान खाद्यपदार्थ आणि पेयांबाबतचे नेहमीचे नियम लागू राहतील. त्यामुळे हा निर्णय केवळ ‘रामायण’च्या प्रदर्शनापुरता मर्यादित आहे. चित्रपटाच्या धार्मिक आणि सांस्कृतिक महत्त्वाचा विचार करून घेतलेल्या या निर्णयाची सध्या मनोरंजनविश्वात चर्चा रंगली आहे.






