(फोटो सौजन्य- सोशल मीडिया)
या मालिकेतील गबरूची भूमिका साकारणारे केके गोस्वामी अचानक पुन्हा चर्चेत आले आहेत. अनेक वर्षांपासून टीव्ही आणि चित्रपटांपासून काहीसे दूर असलेल्या केके गोस्वामी यांची नुकतीच एका कार्यक्रमात झलक पाहायला मिळाली. त्यानंतर सोशल मीडियावर त्यांच्या जुन्या चाहत्यांनी कमेंट्सचा वर्षाव केला.
दिवंगत दिग्दर्शक कुकू कोहली यांच्या प्रेयर मीटला बॉलिवूडमधील अनेक कलाकार उपस्थित होते. विकी कौशल आणि कतरिना कैफ यांच्यासह अनेक सेलिब्रिटी या कार्यक्रमात सहभागी झाले होते. याच कार्यक्रमात केके गोस्वामीही उपस्थित होते.
केके गोस्वामींचा व्हिडीओ सोशल मीडियावर समोर आल्यानंतर चाहत्यांनी त्यांना लगेच ओळखलं. अनेकांनी त्यांच्या जुन्या भूमिका आठवत आपल्या भावना व्यक्त केल्या. विशेष म्हणजे, अनेकांसाठी केके गोस्वामी म्हणजे आजही ‘विकराल और गबराल’मधील गबरूच आहेत.
केके गोस्वामींचा व्हिडीओ पाहिल्यानंतर एका चाहत्याने कमेंट करत “माझ्या बालपणीचा गबराल, तो बेस्ट शो होता,” असं म्हटलं. दुसऱ्या एका यूजरने “हे तर ‘विकराल और गबराल’चे गबरू आहेत, इतक्या वर्षांनी दिसले,” अशी प्रतिक्रिया दिली.
काही चाहत्यांनी ‘हातिम’ आणि ‘श्श्श्श… फिर कोई है’ या मालिकांमधील त्यांच्या भूमिका आठवल्या. तर काहींनी केके गोस्वामी यांनी पुन्हा अभिनयाच्या पडद्यावर परतावं, अशी इच्छा व्यक्त केली.
केके गोस्वामी यांचा जन्म ३ सप्टेंबर १९७३ रोजी बिहारमधील मुजफ्फरपूर येथे झाला. त्यांचं पूर्ण नाव कृष्णकांत गोस्वामी आहे. त्यांच्या उंचीमुळेही ते कायम चर्चेत राहिले. त्यांची उंची सुमारे ३ फूट ९ इंच आहे.
अभिनय क्षेत्रात सुरुवातीच्या काळात कमी उंचीमुळे त्यांना अनेक टोमणे ऐकावे लागले. मात्र, या गोष्टींमुळे त्यांनी हार मानली नाही. अभिनयाच्या जोरावर त्यांनी स्वतःची वेगळी ओळख निर्माण केली आणि टीव्हीवरील लोकप्रिय कलाकारांच्या यादीत स्थान मिळवलं.
२००३ मध्ये आलेल्या ‘विकराल और गबराल’ या मालिकेने केके गोस्वामींना विशेष लोकप्रियता मिळवून दिली. यानंतर त्यांनी ‘हातिम’, ‘श्श्श्श… फिर कोई है’ यांसारख्या लोकप्रिय मालिकांमध्येही काम केलं.
केके गोस्वामी शेवटचे २०१७ मध्ये ‘त्रिदेवियां’ या मालिकेत दिसले होते. सध्या ते सोशल मीडियावर सक्रिय असून आपल्या आयुष्यातील अपडेट्स चाहत्यांसोबत शेअर करत असतात.
केके गोस्वामींची नुकतीच झालेली झलक पाहून चाहत्यांना त्यांच्या आवडत्या ‘गबरू’ची पुन्हा आठवण झाली आहे. त्यामुळे आता त्यांना पुन्हा छोट्या किंवा मोठ्या पडद्यावर पाहायला मिळणार का, याची उत्सुकता त्यांच्या चाहत्यांना लागली आहे.
.png "Videos"){kind=small}
