(फोटो सौजन्य-सोशल मिडिया)
Love and God: आजच्या काळात एखादा चित्रपट काही महिन्यांत किंवा एक-दोन वर्षांत तयार होतो. मात्र, पूर्वी चित्रपट निर्मितीला बराच मोठा कालावधी लागत असे. योग्य वेळ, हवामान आणि कलाकारांच्या तारखा यांसाठी निर्मात्यांना अनेकदा प्रतीक्षा करावी लागायची. पण बॉलिवूडमध्ये एक असा चित्रपट आहे, ज्याला पूर्ण होऊन प्रेक्षकांपर्यंत पोहोचण्यासाठी तब्बल २३ वर्षांचा कालावधी लागला. या चित्रपटाच्या निर्मितीदरम्यान आणि रिलीजपूर्वी घडलेल्या घटनाही तितक्याच धक्कादायक आहेत. हा चित्रपट म्हणजे ‘लव्ह अँड गॉड’.
‘लव्ह अँड गॉड’ हा लैला-मजनूच्या प्रसिद्ध प्रेमकथेवर आधारित चित्रपट होता. या सिनेमाच्या निर्मितीला १९६३ मध्ये सुरुवात झाली. चित्रपटात मजनूची भूमिका साकारण्यासाठी गुरुदत्त यांची निवड करण्यात आली होती.
मात्र, १९६४ मध्ये गुरुदत्त यांचं निधन झालं. त्यांच्या निधनानंतर चित्रपटाचं काम रखडलं आणि ‘लव्ह अँड गॉड’ची निर्मिती काही काळासाठी थांबवण्यात आली.
यानंतर जवळपास सात वर्षांनी म्हणजेच १९७० मध्ये दिग्दर्शक आसिफ यांनी ‘लव्ह अँड गॉड’चं काम पुन्हा सुरू केलं. गुरुदत्त यांच्या जागी त्यांनी अभिनेता संजीव कुमार यांची निवड केली.
मात्र, चित्रपटाचं चित्रीकरण सुरू झाल्यानंतर पुन्हा एक मोठा धक्का बसला. मार्च १९७१ मध्ये दिग्दर्शक आसिफ यांचं निधन झालं. त्यांच्या निधनानंतर पुन्हा एकदा चित्रपटाचं काम बंद पडलं.
१५ वर्षांनी पुन्हा सुरू झाला प्रोजेक्ट
आसिफ यांच्या निधनानंतर त्यांचा हा महत्त्वाकांक्षी प्रोजेक्ट अपूर्ण राहिला. मात्र, जवळपास १५ वर्षांनंतर त्यांच्या पत्नी अख्तर आसिफ यांनी हा चित्रपट पूर्ण करण्याचा निर्णय घेतला. यासाठी त्यांनी निर्माते-दिग्दर्शक के.सी. बोकाडिया यांच्यासोबत काम केलं.
अखेर अनेक वर्षांच्या प्रतीक्षेनंतर हा चित्रपट पूर्ण झाला आणि १९८६ मध्ये ‘लव्ह अँड गॉड’ सिनेमागृहात प्रदर्शित झाला.
रिलीजच्या आधीच संजीव कुमार यांचं निधन
या चित्रपटाचा प्रवास इथेही संपला नाही. चित्रपट पूर्ण होऊन प्रदर्शित होण्यापूर्वीच त्यातील मुख्य अभिनेता संजीव कुमार यांचंही निधन झालं. त्यामुळे ज्या कलाकारांसोबत या चित्रपटाची सुरुवात झाली होती, त्यापैकी अनेकांना हा सिनेमा पडद्यावर पाहताच आला नाही.
‘लव्ह अँड गॉड’च्या निर्मितीचा तब्बल २३ वर्षांचा प्रवास त्यामुळे बॉलिवूडच्या इतिहासातील अत्यंत वेगळ्या आणि भावूक चित्रपटप्रवासांपैकी एक मानला जातो. लैला-मजनूची प्रेमकथा पडद्यावर आणण्याच्या या प्रयत्नाला अनेक अडथळ्यांचा सामना करावा लागला आणि अखेर अनेक वर्षांनी हा चित्रपट प्रेक्षकांपर्यंत पोहोचला.
.png "Videos"){kind=small}
