(फोटो सौजन्य- सोशल मीडिया)
Dharavu Marathi Movie: गोमातेप्रती असलेली श्रद्धा, भारतीय संस्कृतीतील तिचं महत्त्व आणि माणूस व गोमाता यांच्यातील भावनिक नातं उलगडणारा ‘धाराऊ’ हा आगामी मराठी चित्रपट लवकरच प्रेक्षकांच्या भेटीला येणार आहे. “धाराऊ… ती गाय नाय… माय हाय!” या लक्षवेधी टॅगलाइनसह चित्रपटाचं मोशन पोस्टर नुकतंच सोशल मीडियावर प्रदर्शित झालं आहे. पोस्टर समोर येताच चित्रपटाची चर्चा सुरू झाली असून, येत्या २३ ऑक्टोबर २०२६ रोजी हा चित्रपट महाराष्ट्रातील चित्रपटगृहांत प्रदर्शित होणार आहे.
गोमातेचं महत्त्व उलगडणार ‘धाराऊ’
बुलढाणा अर्बन मीडिया हाऊस आणि हिंदचित्र फिल्म्स प्रस्तुत ‘धाराऊ’ या चित्रपटातून गोमातेप्रती असलेली श्रद्धा आणि तिच्याशी जोडलेल्या भावनिक नात्याचा संवेदनशील वेध घेण्यात आला आहे. भारतीय संस्कृतीत गाईला केवळ प्राणी म्हणून न पाहता आईसमान मानलं जातं. याच भावनेला केंद्रस्थानी ठेवून गोमातेचं सांस्कृतिक, ऐतिहासिक आणि सामाजिक महत्त्व चित्रपटातून मांडण्याचा प्रयत्न करण्यात आला आहे.
लेखक, पटकथाकार आणि दिग्दर्शक मनिष सुरेश शिंदे यांचा ‘धाराऊ’ हा पहिलाच मराठी चित्रपट आहे. चित्रपटाची कथा, पटकथा, संवाद आणि दिग्दर्शन अशी संपूर्ण जबाबदारी त्यांनी सांभाळली आहे. चित्रपटाविषयी बोलताना मनिष शिंदे म्हणाले, “लेखक आणि दिग्दर्शक म्हणून ‘धाराऊ’ हा माझा पहिलाच मराठी चित्रपट आहे आणि हा चित्रपट माझ्यासाठी खूप खास आहे. भारतीय संस्कृतीत गाईला केवळ एक प्राणी म्हणून पाहिलं जात नाही, तर तिला आईसमान मानलं जातं. याच भावनेला केंद्रस्थानी ठेवून गोमातेचं महत्त्व, तिच्याविषयीची संवेदना आणि समाजातील तिचं स्थान यांचा वेध घेण्याचा प्रयत्न ‘धाराऊ’मधून करण्यात आला आहे.”
ते पुढे म्हणाले की, या विषयाच्या माध्यमातून समाजात जनजागृती आणि प्रबोधन निर्माण व्हावं, तसेच गोमातेशी संबंधित ऐतिहासिक, सांस्कृतिक आणि सामाजिक संदर्भ नव्या पिढीपर्यंत पोहोचावेत, हा चित्रपटामागील प्रमुख उद्देश आहे.
‘धाराऊ’ हा चित्रपट दिग्दर्शक मनिष सुरेश शिंदे यांच्यासाठी विशेष महत्त्वाचा आहे. या चित्रपटाला विविध चित्रपट महोत्सवांमध्ये तब्बल १५ पुरस्कारांनी गौरविण्यात आलं आहे. या यशामुळे चित्रपटाबद्दलची उत्सुकता वाढली आहे. हा चित्रपट केवळ एका विषयापुरता मर्यादित न राहता, प्रेक्षकांना भावनिक पातळीवर जोडणारा आणि विचार करायला प्रवृत्त करणारा अनुभव ठरेल, असा विश्वास दिग्दर्शकांनी व्यक्त केला आहे.
२३ ऑक्टोबरला चित्रपटगृहांत होणार प्रदर्शित
बुलढाणा अर्बन मीडिया हाऊस आणि हिंदचित्र फिल्म्स प्रस्तुत या चित्रपटाचे निर्माते श्री. राधेश्यामजी चांडक (भाईजी), डॉ. श्री. सुकेशजी झंवर आणि सौ. कोमलजी झंवर आहेत. नुकत्याच प्रदर्शित झालेल्या मोशन पोस्टरमुळे ‘धाराऊ’विषयीची उत्सुकता आणखी वाढली आहे. ‘धाराऊ’ हा मराठी चित्रपट २३ ऑक्टोबर २०२६ रोजी महाराष्ट्रातील चित्रपटगृहांत प्रदर्शित होणार आहे.
.png "Videos"){kind=small}
