(फोटो सौजन्य- सोशल मीडिया)
मिठी नदीतील गाळ काढण्याच्या कामात कथित अनियमितता झाल्याप्रकरणी मुंबई पोलिसांच्या आर्थिक गुन्हे शाखेकडून डिनो मोरियाची चौकशी सुरू होती. शुक्रवारी सकाळपासूनच त्याची चौकशी करण्यात आली. सुमारे आठ तासांच्या चौकशीनंतर त्याला पुढील तपासासाठी ताब्यात घेण्यात आल्याची माहिती आहे. ताब्यात घेण्यापूर्वी त्याला अधिक चौकशीसाठी मुंबई पोलीस आयुक्तालयात आणण्यात आल्याचेही सांगितले जात आहे.
मिठी नदीतील गाळ काढण्याच्या कामातील कथित गैरव्यवहार प्रकरणात डिनो मोरिया आणि त्याचा भाऊ सँटिनो रोको मोरिया यांची मे २०२५ मध्येही चौकशी करण्यात आली होती. या प्रकरणाच्या तपासादरम्यान आर्थिक गुन्हे शाखेने डिनो मोरियाला समन्स बजावून त्याचा जबाब नोंदवला होता.
एसआयटीच्या तपासात डिनो मोरियाचं नाव
मिठी नदीतील कामांमध्ये झालेल्या कथित गैरव्यवहारांची चौकशी करण्यासाठी विशेष तपास पथकाची (SIT) स्थापना करण्यात आली होती. या पथकाने तपासादरम्यान १३ जणांविरोधात गुन्हे दाखल केले होते. याच प्रकरणात डिनो मोरियाचंही नाव समोर आलं होतं. त्यानंतर त्याला समन्स बजावून चौकशीसाठी बोलावण्यात आलं होतं.
या प्रकरणातील कथित आर्थिक अनियमितता आणि डिनो मोरियाची भूमिका याबाबत आर्थिक गुन्हे शाखेकडून पुढील तपास केला जात आहे.
.png "Videos"){kind=small}
