(फोटो सौजन्य-सोशल मीडिया)
Madhu Kambikar Death: मनोरंजनविश्वातून एक दुःखद बातमी समोर आली आहे. आपल्या दमदार अभिनयाने आणि लावणीच्या ठसकेबाज सादरीकरणाने प्रेक्षकांच्या मनावर छाप उमटवणाऱ्या ज्येष्ठ अभिनेत्री मधु कांबीकर यांचे निधन झाले आहे. वयाच्या ७३व्या वर्षी त्यांनी पुण्यात अखेरचा श्वास घेतला. दीर्घ आजाराने त्यांचे निधन झाल्याची माहिती समोर येत आहे. त्यांच्या निधनामुळे मराठी चित्रपटसृष्टीत शोककळा पसरली आहे.
गेल्या काही वर्षांपासून ज्येष्ठ अभिनेत्री मधु कांबीकर अंथरुणाला खिळून होत्या. रंगमंचावर लावणी सादर करत असताना त्यांची प्रकृती बिघडली होती. त्यानंतर त्यांना पक्षाघाताचा झटका आल्याची माहिती समोर आली होती. आपल्या अभिनयाने आणि लावणीच्या सादरीकरणाने प्रेक्षकांच्या मनावर अधिराज्य गाजवणाऱ्या मधु कांबीकर यांच्या निधनाने मराठी कलाविश्वाची मोठी हानी झाली आहे.
मधु कांबीकर यांचा जन्म २८ जुलै १९५३ रोजी बीड जिल्ह्यातील माळेगाव खुर्द येथे झाला. तमाशाच्या फडातून त्यांच्या कलाप्रवासाला सुरुवात झाली. कथ्थक नृत्याचे प्रशिक्षण घेतल्यानंतर १९७३ मध्ये मुंबईतील लालबाग येथील न्यू हनुमान थिएटरमधून त्यांनी आपल्या कलेचा प्रवास पुढे नेला. लावणी, लोकनाट्य, नाटक आणि चित्रपट अशा विविध माध्यमांतून त्यांनी आपल्या अभिनयाची छाप पाडली. ग्रामीण महाराष्ट्रातील लोककलेला व्यापक ओळख मिळवून देण्यातही त्यांचे महत्त्वपूर्ण योगदान राहिले.
मधु कांबीकर यांनी मराठी चित्रपटसृष्टीत विविध प्रकारच्या भूमिका साकारल्या. ‘सतीची पुण्याई’, ‘शापित’, ‘हेच माझं माहेर’, ‘ह्योच नवरा पाह्यजे’, ‘झपाटलेला’, ‘एक होता विदूषक’ आणि ‘रावसाहेब’ यांसारख्या चित्रपटांमधील त्यांच्या भूमिका विशेष उल्लेखनीय ठरल्या. मराठी चित्रपटांसोबतच त्यांनी हिंदी चित्रपटांतही काम केले. चित्रपटांबरोबरच लोकनाट्य आणि रंगभूमीवरही त्या सक्रिय होत्या.
‘महाराष्ट्राची लोकधारा’मधून दिल्लीपर्यंत पोहोचली कला
१९७७ मध्ये ‘महाराष्ट्राची लोकधारा’ या कलापथकाच्या माध्यमातून त्यांनी दिल्ली येथे नृत्यनाट्य सादर केले. लावणीतील सहजता, प्रभावी अभिनय आणि हावभावांमुळे मधु कांबीकर यांना महाराष्ट्रभर ओळख मिळाली. लोककलेशी असलेली त्यांची नाळ आणि रंगभूमीवरील योगदान यामुळे त्यांनी मराठी मनोरंजनविश्वात स्वतःचे वेगळे स्थान निर्माण केले. त्यांच्या निधनाने मराठी चित्रपटसृष्टीने एक ज्येष्ठ अभिनेत्री, तर लोककलेच्या क्षेत्राने एक महत्त्वाची कलावंत गमावली आहे.
.png "Videos"){kind=small}
