(फोटो सौजन्य-सोशल मीडिया)
काही दिवसांपूर्वी ‘कापूसकोंडा’ चित्रपटाचा टीझर प्रदर्शित झाला होता. त्याला प्रेक्षकांचा चांगला प्रतिसाद मिळाल्यानंतर आता चित्रपटाचा ट्रेलर सोशल मीडियावर लाँच करण्यात आला आहे. ‘अ फॅमिली डॉग फिल्म’ अशी टॅगलाइन असलेल्या या चित्रपटात कौटुंबिक नातेसंबंध, मानवी भावना आणि एका कुत्र्यामुळे घडणाऱ्या अनपेक्षित घटनांची गुंफण पाहायला मिळणार आहे.
एका निवृत्त कर्मचाऱ्याला भेट म्हणून कुत्रा मिळतो आणि त्यानंतर त्याच्या आयुष्यात अनेक घडामोडी घडू लागतात. या नव्या सदस्यामुळे कुटुंबात कोणते बदल होतात, नात्यांमध्ये कोणती वळणे येतात आणि नेमके कोणते कारस्थान घडते, हे चित्रपटातून उलगडणार आहे. ‘फॅमिलीत कोण राहणार? कोण जाणार?’ असा प्रश्न उपस्थित करत ट्रेलरने चित्रपटाबद्दलची उत्सुकता वाढवली आहे.
सचिन पिळगावकर आणि मधुराणी गोखले यांची प्रमुख भूमिका
‘कापूसकोंडा’मध्ये सचिन पिळगावकर आणि अभिनेत्री मधुराणी गोखले यांच्यासह नव्या पिढीतील अभिनेत्री अक्षता पाडगांवकर, जान्हवी तांबट आणि अभिनेता भूषण पाटील यांच्या भूमिका पाहायला मिळणार आहेत. अनुभवी कलाकार आणि नव्या चेहऱ्यांचा संगम या चित्रपटात पाहायला मिळणार आहे.
चित्रपटाचे लेखन आणि दिग्दर्शन सचिन मोहिते यांनी केले आहे. सचिन मोहिते, गणेश पंडित आणि ऋषिकेश तुरई यांनी पटकथा व संवादलेखनाची जबाबदारी सांभाळली आहे. सचिन पाटेकर यांनी छायांकन केले असून, संगीतकार ए. व्ही. प्रफुल्लचंद्र यांनी चित्रपटातील गाणी संगीतबद्ध केली आहेत. पार्श्वसंगीत अभिजीत हेगडेपाटील यांचे आहे. गायक अवधूत गुप्ते आणि पद्मनाभ गायकवाड यांनी गाण्यांना आपला आवाज दिला आहे, तर सुहास राणे यांनी ध्वनी तंत्रज्ञ म्हणून काम पाहिले आहे.
‘कापूसकोंडा’ या चित्रपटाची निर्मिती जास्वंद एंटरटेन्मेंट्स प्रा. लि. यांनी केली आहे. पॅनोरामा स्टुडिओज प्रस्तुत हा चित्रपट व्हीपी माऊली ग्रुप ऑफ कंपनीज आणि स्टोरीवाला फिल्म यांच्या सहकार्याने सादर करण्यात येत आहे. कथानकाची गरज लक्षात घेऊन चित्रपटाचे बहुतांश चित्रीकरण लातूर जिल्ह्यातील अंधोरी या गावात करण्यात आले आहे.
सत्यघटनेवरून प्रेरित असलेली कथा, कौटुंबिक नात्यांची गुंतागुंत आणि एका कुत्र्याभोवती फिरणाऱ्या अनोख्या घटनांमुळे ‘कापूसकोंडा’ चित्रपटाबद्दल उत्सुकता निर्माण झाली आहे. आता या चित्रपटातून प्रेक्षकांना मनोरंजनासोबत भावनिक अनुभवही मिळणार का, हे २३ ऑक्टोबरला स्पष्ट होईल.
.png "Videos"){kind=small}
