(फोटो सौजन्य- सोशल मीडिया)
Maitreya Movie: मैत्रीच्या नात्यात प्रेमाची चाहूल कधी लागते, हे अनेकदा कळतही नाही. एकमेकांकडे पाहताना रेंगाळणारी नजर, नकळत निर्माण होणारी ओढ आणि शब्दांविना व्यक्त होणाऱ्या भावना… प्रेमाच्या याच हळुवार क्षणांचं सुंदर चित्रण आगामी मराठी चित्रपट ‘मैत्रेया’मधील ‘तुला पाहते’ या नव्या गाण्यातून पाहायला मिळत आहे. हे रोमँटिक गाणं प्रेक्षकांच्या भेटीला आलं असून, मैत्रीचं प्रेमात रूपांतर होण्याचा नाजूक प्रवास यातून उलगडतो.
नजरेतून व्यक्त होणाऱ्या प्रेमभावना
कधी सहज होणारी नजरानजर, कधी एकमेकांकडे पाहून खुलणारं हसू, तर कधी मनातल्या भावना न बोलताच व्यक्त करणारी नजर… अशा छोट्या छोट्या क्षणांतून प्रेम फुलत असल्याचा अनुभव ‘तुला पाहते’ या गाण्यातून येतो. कलाकारांमधील सहज केमिस्ट्री आणि हळूहळू खुलत जाणाऱ्या नात्याचे भाव यामुळे गाणं लक्षवेधी ठरतं.
या गाण्याला संगीतकार पंकज पडघण यांनी संगीत दिलं असून, सायली पंकज आणि शिवम सिंह यांनी ते गायलं आहे. गीतकार गुरू ठाकूर यांच्या शब्दांतून प्रेमाच्या नाजूक भावना व्यक्त होतात. संगीत, शब्द आणि सुरांचा सुरेख मेळ या गाण्यात अनुभवायला मिळतो.
चित्रपटाच्या लेखिका-दिग्दर्शिका क्रांती रेडकर वानखेडे यांनी गाण्यामागील भावना स्पष्ट केल्या. त्या म्हणाल्या की, मैत्रीचं नातं कधी प्रेमाच्या दिशेने वाटचाल करू लागतं, हे अनेकदा आपल्याला कळतही नाही. एकमेकांकडे पाहण्याची बदललेली नजर, छोट्या छोट्या गोष्टींतून व्यक्त होणाऱ्या भावना आणि नकळत निर्माण होणारी ओढ यातून प्रेम फुलत जातं.
‘तुला पाहते’ या गाण्यातून प्रेमाची हीच हळुवार सुरुवात मांडण्याचा प्रयत्न केल्याचं त्यांनी सांगितलं. या गाण्यातील भावना प्रेक्षकांना त्यांच्या आयुष्यातील अशाच सुंदर क्षणांची आठवण करून देतील, अशी आशाही त्यांनी व्यक्त केली.
Vibhavari Pradhan: मराठी चित्रपटांत काम करण्याची इच्छा, पण संधीच मिळाली नाही! अभिनेत्री विभावरी प्रधान यांनी व्यक्त केली खंत
पंकज पडघण यांचं संगीत गाण्याचं खास वैशिष्ट्य
संगीतकार पंकज पडघण यांच्या मते, प्रेम व्यक्त करण्यासाठी नेहमी मोठ्या शब्दांची किंवा भव्य प्रसंगांची गरज नसते. एखादी नजर, निरागस हास्य किंवा एकमेकांच्या सहवासात घालवलेला क्षणही मनातील भावना व्यक्त करू शकतो. ‘तुला पाहते’ या गाण्यातून अशाच न बोलता व्यक्त होणाऱ्या भावनांना संगीताच्या माध्यमातून उलगडण्याचा प्रयत्न करण्यात आला आहे.
चित्रपटाचे निर्माते मनोज खळतकर यांनीही ‘तुला पाहते’ हे गाणं मैत्रीच्या पलीकडे जाऊन नव्या नात्याची चाहूल देणारं असल्याचं सांगितलं. ‘मैत्रेया’मध्ये तरुणाईच्या आयुष्यातील नात्यांचे विविध रंग पाहायला मिळतील, असा विश्वास त्यांनी व्यक्त केला.
समर टाईम्स प्रॉडक्शनची निर्मिती असलेल्या ‘मैत्रेया’ या चित्रपटाचं लेखन आणि दिग्दर्शन क्रांती रेडकर वानखेडे यांनी केलं आहे. मनोज खळतकर हे चित्रपटाचे निर्माते, तर अमन खळतकर सहनिर्माते आहेत. चित्रपटात समर, आयुषी, स्काय आणि रुची यांच्या प्रमुख भूमिका आहेत.
मैत्री, प्रेम आणि तरुणाईच्या आयुष्यात फुलणाऱ्या नात्यांची गोष्ट सांगणारा ‘मैत्रेया’ २० नोव्हेंबर २०२६ रोजी चित्रपटगृहांत प्रदर्शित होणार आहे. त्यामुळे प्रेमाच्या हळुवार भावनांनी सजलेल्या या चित्रपटाबद्दल प्रेक्षकांमध्ये उत्सुकता निर्माण झाली आहे.
.png "Videos"){kind=small}
