(फोटो सौजन्य- सोशल मीडिया)
Manjar Movie: मराठी सिनेसृष्टीत आणखी एका भन्नाट कॉमेडी चित्रपटाची उत्सुकता वाढली आहे. ‘मांजर’ या आगामी मराठी चित्रपटाचं पोस्टर नुकतंच प्रेक्षकांच्या भेटीला आलं असून, पोस्टरमधील गोंधळाने चित्रपटाबद्दलचं कुतूहल आणखी वाढवलं आहे. तीन मित्र, घरभर पसरलेला पसारा आणि त्यांचं बेफिकीर जगणं अशी या पोस्टरची झलक आहे. मात्र, या सगळ्या गोंधळाचा आणि ‘मांजर’ या नावाचा नेमका संबंध काय, याचं उत्तर अद्याप गुलदस्त्यात आहे.
पोस्टरमध्ये घरातील अस्ताव्यस्त पसारा लक्ष वेधून घेतो. कपडे, मोबाईल, लॅपटॉप, इअरफोन्स, बॅग्ज आणि रोजच्या वापराच्या वस्तूंमध्ये तीन मित्र अगदी बिनधास्तपणे वेळ घालवताना दिसत आहेत. या दृश्यातून त्यांच्या मोकळ्या-ढाकळ्या आयुष्याची झलक मिळते.
मात्र, या निवांत विश्वात ‘मांजर’मुळे नेमका कोणता गोंधळ निर्माण होतो, हा प्रश्न पोस्टरमुळे अधिकच रंजक झाला आहे. पोस्टरमधील प्रत्येक गोष्टीमागे एखादा मजेशीर किस्सा दडलेला असावा, असा अंदाज बांधला जात आहे.
एचथ्रीओ मोशन पिक्चर्स आणि जस्ट राईट फिल्म्स निर्मित या चित्रपटाचं दिग्दर्शन सुशील महादेव यांनी केलं आहे. चित्रपटात सिद्धार्थ मेनन, ओंकार भोजने, तेजस राऊत आणि भाग्यश्री लिमये यांच्या प्रमुख भूमिका आहेत.
पोस्टरमध्ये या कलाकारांची धमाल केमिस्ट्री पाहायला मिळत असून, त्यांच्यातील मैत्री आणि त्यातून निर्माण होणारा गोंधळ चित्रपटाचा महत्त्वाचा भाग असणार असल्याचं दिसत आहे.
चित्रपटाचं शीर्षकच सध्या सर्वाधिक चर्चेचा विषय ठरत आहे. ‘मांजर’ हे या तीन मित्रांच्या आयुष्यात नेमकं कशासाठी महत्त्वाचं आहे? त्याच्यामुळे त्यांच्या आयुष्यात कोणत्या मजेशीर घटना घडतात? या प्रश्नांची उत्तरं चित्रपट प्रदर्शित झाल्यानंतरच मिळणार आहेत.
दिग्दर्शक सुशील महादेव यांनी सांगितलं की, ‘मांजर’मध्ये तीन मित्रांचं मोकळंढाकळं विश्व आणि त्यातून निर्माण होणाऱ्या भन्नाट परिस्थिती पाहायला मिळणार आहेत. मांजर त्यांच्या जगाचा आधीपासूनच एक भाग आहे; मात्र त्याच्याभोवती घडणाऱ्या घटनांमुळे त्यांच्या आयुष्यात मजेशीर परिस्थिती निर्माण होते.
पात्रांची केमिस्ट्री, कॉमेडी आणि या सगळ्या गोंधळामागचं कारण प्रेक्षकांचं मनोरंजन करेल, असा विश्वास त्यांनी व्यक्त केला. मांजराचं कथेत नेमकं स्थान काय आहे, हे मात्र सध्या निर्मात्यांनी गुपित ठेवलं आहे.
हर्ष, अविनाश शर्मा, हरि राजपूत, बंटी नागी आणि जसबीर नागी यांनी या चित्रपटाची निर्मिती केली आहे. सयाजी शिंदे, अंशुमन विचारे, वैष्णवी अंधाडे आणि अश्विनी काळसेकर यांच्याही महत्त्वाच्या भूमिका आहेत.
चित्रपटाच्या वितरणाची जबाबदारी एए फिल्म्सकडे आहे. ‘मांजर’ हा चित्रपट १८ सप्टेंबर २०२६ रोजी संपूर्ण महाराष्ट्रात प्रदर्शित होणार आहे. त्यामुळे तीन मित्रांच्या आयुष्यात नेमका कोणता गोंधळ होतो आणि या सगळ्यामागे मांजराचा काय संबंध आहे, हे पाहण्यासाठी प्रेक्षकांना आणखी काही काळ प्रतीक्षा करावी लागणार आहे.
.png "Videos"){kind=small}
