गुरुवार, 13 ऑगस्ट 2026
(फोटो सौजन्य- सोशल मीडिया)
Mamachya Govyala Jauya: मराठी सिनेसृष्टीत सध्या ‘मामाच्या गोव्याला जाऊया’ या चित्रपटाची जोरदार चर्चा सुरू आहे. विजू माने दिग्दर्शित या कॉमेडी चित्रपटाला प्रेक्षकांकडून चांगला प्रतिसाद मिळत असून बॉक्स ऑफिसवरही चित्रपटाची दमदार कमाई सुरू आहे. रिलीजला अवघे ११ दिवस पूर्ण झाले असताना चित्रपटाने २०२६ मध्ये सर्वाधिक कमाई करणाऱ्या मराठी चित्रपटांच्या टॉप १० यादीत स्थान मिळवलं आहे. विशेष म्हणजे, या यादीत रितेश देशमुखचा ‘राजा शिवाजी’ पहिल्या क्रमांकावर आहे.
‘मामाच्या गोव्याला जाऊया’मध्ये अंकुश चौधरी, संतोष जुवेकर, कुशल बद्रिके आणि अभिजित चव्हाण यांच्या प्रमुख भूमिका आहेत. याशिवाय अनेक कलाकार महत्त्वाच्या भूमिका आणि कॅमिओमध्येही झळकले आहेत. मनोरंजन, विनोद आणि कलाकारांच्या दमदार अभिनयामुळे चित्रपटाला प्रेक्षकांचा चांगला प्रतिसाद मिळत आहे.
विजू माने यांच्या या चित्रपटाला प्रेक्षक भरभरून प्रेम देत आहेत. सॅकनिल्कच्या अहवालानुसार, ‘मामाच्या गोव्याला जाऊया’ने भारतात आतापर्यंत १.९३ कोटी रुपयांची ग्रॉस कमाई केली आहे, तर चित्रपटाची नेट कमाई १.७२ कोटी रुपये असल्याचं सांगितलं जात आहे.
चित्रपटाने पहिल्याच दिवशी ८ लाख रुपये कमावले. दुसऱ्या दिवशी कमाईत वाढ होत ती २३ लाखांवर पोहोचली. तिसऱ्या दिवशी चित्रपटाने तब्बल ४१ लाख रुपयांचा गल्ला जमवला. मात्र, चौथ्या दिवशी कमाईत मोठी घट झाली आणि कलेक्शन ११ लाख रुपयांवर आलं.
पाचव्या दिवशी चित्रपटाने १३ लाख रुपये कमावले, तर सहाव्या आणि सातव्या दिवशी प्रत्येकी सुमारे ९ लाख रुपयांची कमाई केली. त्यानंतर नवव्या आणि दहाव्या दिवशी पुन्हा कमाईत चांगली वाढ पाहायला मिळाली. या दोन दिवसांत चित्रपटाने मिळून सुमारे ४५ लाख रुपयांचा गल्ला जमवला.
‘मामाच्या गोव्याला जाऊया’ हा चित्रपट सुमारे ७ कोटी रुपयांच्या बजेटमध्ये तयार झाल्याचं कोईमोईच्या रिपोर्टमध्ये नमूद करण्यात आलं आहे. सध्याच्या कमाईनुसार चित्रपटाने आपल्या बजेटपैकी सुमारे २४.६ टक्के रक्कम वसूल केली आहे.
चित्रपटाला बजेटचा टप्पा गाठण्यासाठी अद्याप सुमारे ५.२७ कोटी रुपयांची कमाई करण्याची गरज आहे. त्यामुळे आगामी दिवसांत चित्रपटाच्या कमाईचा वेग कायम राहतो का, हे पाहणं महत्त्वाचं ठरणार आहे.
२०२६ मध्ये मराठी चित्रपटांना बॉक्स ऑफिसवर चांगला प्रतिसाद मिळताना दिसत आहे. उपलब्ध आकडेवारीनुसार, ‘राजा शिवाजी’ हा १०५.६८ कोटी रुपयांच्या कमाईसह पहिल्या क्रमांकावर आहे. त्यापाठोपाठ ‘देऊळ बंद २’ने १०० कोटींच्या कमाईसह दुसरं स्थान मिळवलं आहे.
१. राजा शिवाजी – १०५.६८ कोटी रुपये
२. देऊळ बंद २ – १०० कोटी रुपये
३. क्रांतिज्योती विद्यालय मराठी माध्यम – २७.८१ कोटी रुपये
४. तुम्बाडची मंजुला – १६.४७ कोटी रुपये
५. अगं अगं सूनबाई! काय म्हणता सासूबाई? – ८.९७ कोटी रुपये
६. घबाडकुंड – ७.४१ कोटी रुपये
७. सुपर डुपर – ३.४४ कोटी रुपये
८. भूतम भयम – २.९६ कोटी रुपये
९. मामाच्या गोव्याला जाऊया – १.९३ कोटी रुपये
१०. तिघी – १.६४ कोटी रुपये
अशाप्रकारे केवळ ११ दिवसांत ‘मामाच्या गोव्याला जाऊया’ने २०२६ मधील सर्वाधिक कमाई करणाऱ्या मराठी चित्रपटांच्या टॉप १०मध्ये प्रवेश केला आहे. आता चित्रपटाची कमाई आणखी किती वाढते आणि तो या यादीत किती वर पोहोचतो, याकडे मराठी चित्रपटसृष्टीचं लक्ष लागलं आहे.
