Phulwara Marathi Movie: रवी जाधवांच्या दिग्दर्शनात खुलणार ‘फुलवरा’! ‘या’ तारखेपासून मराठी लावणीचा रंगणार जल्लोष

Phulwara Marathi Movie: ‘द फोक आख्यान’ फेम हर्ष-विजय या जोडीने सिनेमाला संगीत दिले असून कथा, पटकथा, संवाद आणि गाणी ईश्वर ताराबाई अंधारे यांनी लिहिली आहेत. ‘फुलवरा’मध्ये केवळ लावणीचा नृत्यप्रकार न दाखवता तिची संस्कृती, परंपरा आणि काळानुसार झालेला बदल तसेच तमाशा कलावंतांचा संघर्ष मांडला जाणार असल्याचे रवी जाधव यांनी सांगितले आहे.

• ‘फुलवरा’ १४ जानेवारी २०२७ला थिएटरमध्ये प्रदर्शित होणार.
• रवी जाधव आणि झी स्टुडिओज पुन्हा लावणीच्या विषयावर एकत्र आले आहेत.
• हर्ष-विजय यांच्या संगीतासह लावणी, तमाशा आणि लोककलेची संस्कृती सिनेमातून पाहायला मिळणार.

लावणी म्हटलं की डोळ्यासमोर येतो तो घुंगरूचा आवाज, ढोलकीचा ठेका आणि अस्सल मराठी मातीचा सुगंध. आठवतंय ‘नटरंग‘? 16 वर्षांपूर्वी आलेल्या त्या सिनेमाने अख्ख्या महाराष्ट्राला वेड लावलं होतं. गुणा आणि त्याची लावणी आजही लोक विसरले नाहीत. आता तब्बल 16 वर्षानंतर पुन्हा तीच जोडी, झी स्टुडिओज आणि दिग्दर्शक रवी जाधव पुन्हा एकदा लावणीवर सिनेमा घेऊन येत आहेत.त्या सिनेमाचं नाव आहे ‘फुलवरा’. Phulwara Marathi Movie:

कधी येणार ‘फुलवरा’?

सिनेमाच्या टीमने आता त्याची प्रदर्शनाची तारीख जाहीर केली आहे. ‘फुलवरा’ हा सिनेमा मकर संक्रांतीला म्हणजेच 14 जानेवारी 2027 ला थिएटरमध्ये येणार आहे. संक्रांतीचा मुहूर्त साधून हा सिनेमा प्रेक्षकांच्या भेटीला येतोय.या घोषणेसोबत एक पोस्टर पण रिलीज झालं आहे. पोस्टरमध्ये पूजेचं ताट आहे आणि त्यात देवी अंबाबाईचा मुखवटा आहे. आणि त्याखाली एक ओळ लिहिली आहे – ‘आई अंबाबाईचा आशीर्वाद घ्या आणि अस्सल मराठी लावणीला बळ द्या’. या एका ओळीतच सिनेमाचा विषय काय आहे हे कळतंय. सिनेमा अस्सल मराठी लावणीवर असणार आहे. पण गोष्ट काय आहे, कलाकार कोण आहेत हे अजून गुलदस्त्यातच ठेवलं आहे.

संगीत कोणाचं आहे?

‘द फोक आख्यान’ फेम हर्ष-विजय या जोडीने या सिनेमाला संगीत दिलं आहे. आजकाल ही जोडी लोकसंगीतात खूप गाजतेय. लोककलेवर त्यांचा चांगला अभ्यास आहे. आणि या सिनेमाची कथा, पटकथा, डायलॉग आणि गाणी लिहिली आहेत. ते पण ‘द फोक आख्यान’चेच लेखक ईश्वर ताराबाई अंधारे यांनी लिहिले आहे. एकीकडे लोककलेचा अभ्यास असणारी नवीन पिढी आणि दुसरीकडे रवी जाधव यांचा मोठा अनुभव, यांचा संगम या सिनेमात बघायला मिळणार आहे. हा सिनेमा फक्त लावणीचा डान्स दाखवणार नाही तर त्या मागची संस्कृती, परंपरा आणि आजच्या काळात लावणी कशी बदलत गेली हे पण दाखवणार आहे असं बोललं जातंय.

रवी जाधव काय म्हणाले?

या सिनेमाबद्दल बोलताना रवी जाधव म्हणाले, “‘नटरंग’नंतर 16 वर्षांनी परत तमाशावर सिनेमा करणं हे खरंच धाडस आहे. कारण तमाशा हा महाराष्ट्राच्या लोककलेचा जीव आहे आणि लावणी ही त्या लोककलेची राणी आहे. अशा मोठ्या परंपरेवर सिनेमा करणं ही मोठी जबाबदारी आहे. ती जबाबदारी समजून आम्ही ‘फुलवरा’ बनवला आहे.”ते पुढे म्हणाले, “‘नटरंग’ची गोष्ट 70 च्या दशकातली होती. तर ‘फुलवरा’ची गोष्ट 2015 मधली आहे. या 50-55 वर्षात तमाशा खूप बदलला. पण आजही तमाशा कलावंत आपली अस्सल मराठी कला जपण्यासाठी धडपडत आहेत. त्यासाठी त्यांचा संघर्ष आणि त्याग खूप मोठा आहे. आमच्या या फुलवऱ्याला लोक ‘नटरंग’ सारखंच प्रेम देतील अशी आशा आहे.”

झी स्टुडिओजला विश्वास

झी स्टुडिओजचे बवेश जानवलेकर म्हणाले, “झी स्टुडिओज, रवी जाधव आणि लावणी, हे समीकरण पुन्हा एकदा येतंय याचा आम्हाला खूप आनंद आहे. कथा ऐकल्यापासूनच आम्हाला या सिनेमाबद्दल उत्सुकता होती. नवीन वर्षाची सुरुवात ‘फुलवरा’ने चांगली होईल याची खात्री आहे. प्रेक्षकांना अस्सल लावणीचा बाज बघायला मिळेल.”तर मित्रांनो, 14 जानेवारी 2027 ला ‘फुलवरा’ थिएटरमध्ये येतोय. ‘नटरंग’ने जो ठसा उमटवला होता, तोच ठसा ‘फुलवरा’ उमटवतोय का हे बघणं आता महत्त्वाचं असणार आहे.