( फोटो सौजन्य- सोशल मिडिया)
Jyoti Chandekar Death Anniversary:ज्येष्ठ अभिनेत्री ज्योती चांदेकर यांच्या निधनाला एक वर्ष पूर्ण झालं आहे. १६ ऑगस्ट २०२५ रोजी त्यांनी अखेरचा श्वास घेतला. त्यांच्या निधनाने मराठी सिनेसृष्टीवर शोककळा पसरली होती. आता त्यांच्या पहिल्या स्मृतीदिनी मुलगी आणि अभिनेत्री तेजस्विनी पंडितने आईच्या आठवणीत एक भावुक पोस्ट शेअर केली आहे.
ज्योती चांदेकर यांनी अनेक गाजलेल्या चित्रपट आणि मालिकांमध्ये आपल्या अभिनयाची छाप पाडली. त्या ‘ठरलं तर मग’ या लोकप्रिय मालिकेत ‘पूर्णा आजी’ची भूमिका साकारत होत्या. या भूमिकेतून त्या घराघरात पोहोचल्या. त्यांच्या निधनानंतर मालिकेच्या संपूर्ण टीमने त्यांना भावपूर्ण श्रद्धांजली वाहिली होती.
ज्योती चांदेकर यांच्या स्मृतीदिनी तेजस्विनीने सोशल मीडियावर आईचा एक जुना फोटो शेअर केला आहे. या फोटोमध्ये ज्योती चांदेकर डायरी वाचताना दिसत आहेत. या आठवणीसोबत तेजस्विनीने आपल्या मनातील भावना शब्दांत व्यक्त केल्या आहेत.
“आई… १ वर्ष झालं! तुझ्याशिवाय आयुष्य पूर्वीसारखं राहिलेलं नाहीये… I Am Sorry, तुला थँक्यू म्हणता आलं नाही…” असं तेजस्विनीने आपल्या पोस्टमध्ये लिहिलं आहे.
दरम्यान, अभिनेत्री प्राजक्ता कुलकर्णी यांनीही ज्योती चांदेकर यांच्या स्मृतीस विनम्र अभिवादन करत एक भावुक पोस्ट शेअर केली आहे. ज्योती ताईंसोबत काम करतानाचे अनुभव आठवत त्यांनी त्यांच्या व्यक्तिमत्त्वाचं कौतुक केलं आहे.
प्राजक्ता कुलकर्णी लिहितात, “ज्योती ताई, तुझ्यासोबत जेव्हा-जेव्हा काम केलंय, तेव्हा प्रत्येक वेळेचा अनुभव अविस्मरणीय आहे. तू उत्तम कलाकार तर होतीसच, पण माणूस म्हणूनसुद्धा अगदी दिलखुलास होतीस. तू जिथे असशील, तिथे सुद्धा सगळ्यांची मनं जिंकून घेत असशील. तुझ्या आठवणी कायम स्मरणात राहतील… Love you.”
प्राजक्ता यांच्या या पोस्टमधून ज्योती चांदेकर यांच्या सहकलाकारांशी असलेल्या जिव्हाळ्याच्या नात्याची आणि त्यांच्या प्रेमळ स्वभावाची झलक पाहायला मिळते. त्यांच्या आठवणींना उजाळा देताना अनेक कलाकारांनी सोशल मीडियावर भावुक होत त्यांना श्रद्धांजली वाहिली आहे.
ज्योती चांदेकर यांनी आपल्या प्रदीर्घ अभिनय कारकिर्दीत मराठी रंगभूमी, चित्रपट आणि छोटा पडदा अशा विविध माध्यमांमध्ये उल्लेखनीय काम केलं. त्यांच्या दीर्घ आणि योगदानाबद्दल त्यांना प्रतिष्ठेचा ‘बालगंधर्व जीवनगौरव पुरस्कार’ प्रदान करण्यात आला होता.
चित्रपटांमध्येही ज्योती चांदेकर यांनी विविधांगी भूमिका साकारत प्रेक्षकांची मनं जिंकली. ‘मी सिंधुताई सपकाळ’, ‘गुरू’, ‘ढोलकी’, ‘तिचा उंबरठा’, ‘पाऊलवाट’, ‘सलाम’ आणि ‘सांजपर्व’ यांसारख्या अनेक चित्रपटांमध्ये त्यांनी महत्त्वाच्या भूमिका साकारल्या.
केवळ मोठ्या पडद्यावरच नव्हे, तर छोट्या पडद्यावरही त्यांनी आपल्या अभिनयाची छाप उमटवली. ‘तू सौभाग्यवती हो’ आणि ‘छत्रीवाली’ यांसारख्या मालिकांमध्ये त्यांनी महत्त्वपूर्ण भूमिका साकारल्या होत्या. त्यामुळे ज्योती चांदेकर यांचा अभिनयप्रवास हा अनेक पिढ्यांच्या आठवणींशी जोडलेला आहे.
.png "Videos"){kind=small}
