(फोटो सौजन्य- सोशल मीडिया)
माधुरीने व्हिडीओमध्ये सांगितले की, सोशल मीडियामुळे तिला कमी वेळात प्रेक्षकांपर्यंत पोहोचता आले. मात्र, आता याच सोशल मीडियाच्या माध्यमातून तिच्याबाबत वेगळेच प्रकार घडत असल्याने तिला प्रेक्षकांपर्यंत व्यवस्थित पोहोचता येत नसल्याचे तिने म्हटले.
काही दिवसांपूर्वी आपल्या पोस्टवर अतिशय घाणेरड्या कमेंट्स येत असल्याबाबत आपण एक बाईट पोस्ट केली होती, असेही माधुरीने सांगितले. मात्र, हा प्रकार गेल्या तीन वर्षांपासून सुरू असल्याचा दावा तिने केला आहे.
माधुरीने पुढे सांगितले की, तिचे विकिपीडिया पेज दिसत नाही. तसेच तिच्या काही फॅन पेजेसना हॅक करण्यात आले असून त्यातील काही पेजेस हटवण्यात आल्याचेही तिने म्हटले आहे.
इतकंच नाही तर तिच्या वर्किंग नंबरवर ‘कॉल बॉम्बिंग’ करण्यात आल्याचा दावाही तिने केला. सतत फोन वाजत राहणे आणि त्याचा कोणत्याही कामासाठी उपयोग न होणे, यामुळे आपल्याला नाहक त्रास सहन करावा लागत असल्याचे माधुरीने सांगितले.
या सर्व प्रकारामागे नेमकं कोण आहे आणि हे का केलं जात आहे, याची आपल्याला काहीच माहिती नसल्याचे माधुरीने स्पष्ट केले.
या सगळ्यामुळे आपल्याला वेगळ्या प्रकारचा मानसिक त्रास सहन करावा लागत असल्याचेही तिने सांगितले. बाहेर जातानाही सुरक्षिततेची चिंता वाटते. ‘कोण काय बोलेल? कोण मध्येच काही करेल का?’ असे अनेक विचार सतत मनात येत असल्याचे माधुरीने व्हिडीओमध्ये सांगितले.
माधुरीने या प्रकरणी सायबरकडे तक्रार केल्याचे सांगितले. मात्र, या प्रकारामागे कोण आहे, याबाबत अद्याप कोणताही पुरावा सापडला नसल्याचे तिने म्हटले आहे.
‘हे सतत होत चाललंय, हे थांबतच नाहीये,’ असं म्हणत तिने संबंधित यंत्रणांकडून मदतीची अपेक्षा व्यक्त केली आहे.
मुख्यमंत्र्यांसह नेत्यांकडे मदतीची मागणी
माधुरीने आपल्या व्हिडीओच्या माध्यमातून महाराष्ट्राचे मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि राज ठाकरे यांच्याकडे मदतीची मागणी केली आहे. आपल्या परिस्थितीची दखल घेऊन योग्य ती मदत आणि संरक्षण मिळावे, अशी तिची विनंती आहे.
तिने सुनेत्रा पवार यांच्याकडेही मदतीची मागणी केली आहे. गेल्या तीन वर्षांपासून हे प्रकार सुरू असून प्रेक्षकांना याबाबत आता माहिती होत असल्याचे माधुरीने म्हटले आहे.
माधुरीने हा व्हिडीओ शेअर करताना आपल्या पोस्टमध्येही आपली व्यथा मांडली. ‘मला न्याय आणि सुरक्षिततेसाठी तुमच्या मदतीची गरज आहे,’ असे तिने म्हटले आहे.
आपल्याबद्दल चुकीच्या आणि अपमानास्पद कमेंट्स करून सतत टार्गेट केले जात असल्याचा तसेच बदनामी करण्याचा प्रयत्न होत असल्याचा दावा तिने केला आहे. आपले विकिपीडिया पेज डिलीट करण्यात आल्याचे आणि सोशल मीडिया अकाउंट्स हॅक करण्याचे प्रयत्न सुरू असल्याचेही तिने नमूद केले.
‘एक मुलगी म्हणून ही परिस्थिती माझ्यासाठी मानसिकदृष्ट्या खूप त्रासदायक आणि भीतीदायक आहे,’ असे म्हणत माधुरीने या प्रकारामागे कोण आहे, याची योग्य चौकशी व्हावी आणि आपली प्रतिष्ठा व सुरक्षितता जपली जावी, अशी अपेक्षा व्यक्त केली आहे.
.png "Videos"){kind=small}
