(फोटो सौजन्य- सोशल मीडिया)
Rucha Gaikwad Engagement: ‘शेतकरीच नवरा हवा’ या मालिकेतून घराघरात पोहोचलेली अभिनेत्री ऋचा गायकवाड सध्या ‘तुला जपणार आहे’ या मालिकेत खलनायिकेची भूमिका साकारत आहे. ऋचाने आपल्या अभिनयाने प्रेक्षकांच्या मनात वेगळी ओळख निर्माण केली आहे. आता अभिनेत्रीच्या वैयक्तिक आयुष्यातही एक नवा अध्याय सुरू झाला आहे. ऋचा गायकवाड हिचा प्रथमेशसोबत थाटात साखरपुडा पार पडला आहे. तिच्या साखरपुड्याचे व्हिडिओ फोटो सध्या सोशल मीडियावर व्हायरल होत आहेत.
ऋचा गायकवाड आणि प्रथमेशच्या साखरपुड्यासाठी ‘When Konkan Meets Kolhapur’ अशी खास थीम ठेवण्यात आली होती. साखरपुड्याच्या सजावटीमध्ये कोकण आणि कोल्हापूरची खास झलक पाहायला मिळत आहे. पार्श्वभूमीवर कोकणातील निसर्गरम्य परिसरासोबत कोल्हापूरच्या प्रसिद्ध वास्तूची झलक दाखवण्यात आली आहे. त्यामुळे या साखरपुडा सोहळ्याची थीमही विशेष आकर्षण ठरली आहे.
साखरपुड्यासाठी ऋचाने मॉडर्न आणि सुंदर लूक केला होता. तिच्या या खास लूकने सोशल मीडियावर नेटकऱ्यांचे लक्ष वेधून घेतले आहे. तिच्या साखरपुड्याच्या लूकचे काही जण कौतुक करत आहेत, तर काही नेटकऱ्यांनी तिच्या लूकवरून ट्रोलही केले आहे. त्यामुळे ऋचाचा हा लूक सध्या चर्चेचा विषय ठरला आहे.
दरम्यान, ऋचा आणि प्रथमेशच्या साखरपुड्याचे फोटो चाहत्यांच्या पसंतीस उतरले असून, दोघांच्या नव्या आयुष्यासाठी चाहते त्यांना मनापासून शुभेच्छा देत आहेत.
ऋचा गायकवाड आणि प्रथमेशच्या साखरपुडा सोहळ्याला ‘तुला जपणार आहे’ मालिकेतील कलाकारांनीही आवर्जून उपस्थिती लावली. अभिनेत्री प्रतीक्षा मुणगेकरसह मालिकेतील अनेक कलाकारांनी ऋचाच्या या खास दिवसात सहभागी होत तिचा आनंद द्विगुणित केला. सहकलाकारांनी ऋचा आणि प्रथमेशला नव्या आयुष्यासाठी शुभेच्छा दिल्या. या खास सोहळ्यातील कलाकारांचे फोटो आणि व्हिडिओ सोशल मीडियावर शेअर होत असून, चाहत्यांचेही त्यावर भरभरून प्रेम मिळत आहे.
.png "Videos"){kind=small}
