‘सखा माझा पांडुरंग’मध्ये जलसमाधीचा थरार; सखुची अढळ भक्ती की विठुरायाचा चमत्कार?

‘सन मराठी’वरील लोकप्रिय मालिका ‘सखा माझा पांडुरंग’ सध्या चर्चेत आली आहे. या मालिकेमध्ये नवा अध्याय पाहायला मिळणार आहे. तसेच, हा ट्विस्ट पाहण्यासाठी चाहते उत्सुक आहेत.

• ‘सखा माझा पांडुरंग’मध्ये जलसमाधीचा थरार
• सखुची अढळ भक्ती की विठुरायाचा चमत्कार?
• ‘सखा माझा पांडुरंग’ चा विशेष भाग कधी?

 

‘सन मराठी’वरील लोकप्रिय मालिका ‘सखा माझा पांडुरंग’ लवकरच प्रेक्षकांसाठी एक अत्यंत भावनिक आणि थरारक वळण घेऊन येत आहे. मालिकेत सखुच्या अढळ भक्तीची कठोर परीक्षा पाहायला मिळणार असून येणारा जलसमाधी विशेष भाग प्रेक्षकांना खिळवून ठेवणार आहे.

कथानकानुसार, सखु दिगूचे प्राण वाचवते. मात्र या घटनेचे श्रेय झिंग्रोबाला द्यावे यासाठी मनोरमा आणि नागोजी एक मोठे कारस्थान रचतात. सखुला अंधारात ठेवून झिंग्रोबाच्या पूजेची तयारी केली जाते. पण सत्य समजल्यावर सखु ठामपणे या खोट्या गोष्टींना नकार देते आणि सर्वांसमोर विठुरायावरचा तिचा अढळ विश्वास व्यक्त करते.

‘अनुपमा’मध्ये नवा ट्विस्ट; गोव्यात रुपाली गांगुलीची नवी सुरुवात; कॅफेच्या स्वप्नातून उभी करणार नवी ओळख

सखुचा हा निर्धार पाहून संतापलेला नागोजी गावकऱ्यांमध्ये भीती निर्माण करतो. झिंग्रोबाचा कोप दाखवत तो सखुवर अमानुष अत्याचार करतो. मात्र कोणत्याही परिस्थितीत सखु विठोबाची भक्ती सोडायला तयार होत नाही. तिची न डगमगणारी श्रद्धा आणि देवावरील नितांत विश्वास हा या कथानकाचा केंद्रबिंदू ठरत आहे.

घटनांचा कळस गाठताना नागोजी एक धक्कादायक निर्णय घेतो सखुला तिच्या लाडक्या विठोबाच्या मूर्तीसह तळ्यात बुडवण्याचा. या जलसमाधीच्या प्रसंगात सखु आपल्या विठुरायाला कवटाळत मृत्यूला सामोरी जाते. आता या प्रसंगातून विठुराया सखूला कशा प्रकारे वाचवणार, हा प्रश्न प्रेक्षकांमध्ये प्रचंड उत्सुकता निर्माण करत आहे.

दरम्यान, या विशेष भागाबद्दल बोलताना संत सखुबाईंची भूमिका साकारणारी बालकलाकार स्वराली खोमणे म्हणाली, “ही भूमिका साकारत असल्यापासून मला खूप सकारात्मकता जाणवते. जलसमाधीसारखे कठीण प्रसंग शूट करताना सुरुवातीला भीती वाटते, पण कॅमेरा सुरू झाला की सखुबाईंची हिम्मत माझ्यात येते. या आठवड्यात सखुबाईंची कठोर परीक्षा पाहायला मिळणार आहे. विठुराया त्यांना कशी मदत करेल, हे पाहण्यासाठी मीही उत्सुक आहे.”

किंग खानही पडेल फिका; ‘ठरलं तर मग’ मालिकेतील पुरुष कलाकरांनी तरुणींना लावले वेड, Dance असावा तर असा

ती पुढे म्हणाली की, “माझे आई-वडील आणि मालिकेची टीम मला खूप साथ देते. अभ्यास आणि शूटिंग यामध्ये समतोल साधणं कठीण असलं तरी त्यांच्या पाठिंब्यामुळे हे शक्य होत आहे.” ‘सखा माझा पांडुरंग’मधील हा जलसमाधी विशेष भाग येत्या २९ मार्च रोजी दुपारी १:०० वाजता आणि सायंकाळी ७:३० वाजता प्रसारित होणार आहे. सखुच्या भक्तीचा हा महासंग्राम आणि विठुरायाचा चमत्कार पाहण्यासाठी प्रेक्षक आतुर झाले आहेत.