( फोटो सौजन्य- सोशल मीडिया)
Moushumi Chatterjee: बॉलिवूडच्या प्रसिद्ध अभिनेत्री मौसमी चॅटर्जी यांनी वयाच्या अवघ्या १६व्या वर्षी अभिनय क्षेत्रात पदार्पण केलं. १९६७ साली प्रदर्शित झालेल्या ‘बालिका वधू’ या बंगाली चित्रपटातून त्यांनी चित्रपटसृष्टीत पाऊल ठेवलं. त्यानंतर त्यांनी बंगाली आणि हिंदी चित्रपटसृष्टीत दमदार कारकीर्द घडवली. अभिनय क्षेत्रात काम करत असतानाच मौसमी यांचं लहान वयातच प्रसिद्ध गायक आणि संगीतकार हेमंत कुमार यांचे पुत्र जयंत मुखर्जी यांच्याशी लग्न झालं.
मात्र, स्वतःचं लग्न लहान वयात झाल्यामुळे मौसमी यांनी आपल्या मुलीला लग्नाची घाई न करण्याचा आणि स्वतःच्या अटींवर आयुष्य जगण्याचा सल्ला दिला आहे.
जागरण चित्रपट महोत्सव २०२६मध्ये मौसमी चॅटर्जी यांनी मुलीला दिलेल्या सल्ल्याबद्दल भाष्य केलं. त्या म्हणाल्या, “मी माझ्या मुलीला सांगते, तुला बॉयफ्रेंड ठेवता येईल, पण त्याच्याशी लग्न करणे आवश्यक नाही.”
भगवद्गीतेचा दाखला देत त्यांनी “बदल हा जगाचा नियम आहे” असं म्हटलं. बदलत्या काळानुसार मुलींनी स्वतःच्या आयुष्याबाबत विचारपूर्वक निर्णय घ्यावा, असा त्यांचा सल्ला आहे. यासोबतच त्यांनी आजच्या मुलींनी स्वतःचा विचार करताना थोडं सावध राहण्याची गरज असल्याचंही सांगितलं.
मौसमी चॅटर्जी यांनी आजच्या काळात मुलगा आणि मुलगी दोघांनाही घरातील जबाबदाऱ्या शिकवण्याची गरज व्यक्त केली. त्या म्हणाल्या की, आपण मुलींना सासरच्या मंडळींची काळजी घ्यायला शिकवतो; मात्र मुलांना घरकाम शिकवत नाही.
आजची तरुण पिढी अनेक कारणांमुळे तणावाखाली असल्याचंही त्यांनी सांगितलं. इतरांना काहीतरी सिद्ध करण्यासाठी स्वतःवर अनावश्यक दबाव आणू नये, असा सल्ला त्यांनी दिला.
मौसमी यांनी तरुणांना आयुष्याचा आनंद घेण्यासोबतच चुका झाल्यास त्यातून शिकण्याचा सल्ला दिला. त्या म्हणाल्या, “तुम्हाला जे आवडतं ते करा, पण त्याचा अतिरेक करू नका. जर तुमच्याकडून चूक झाली, तर ती पुन्हा करू नका आणि सारासार विचार करा.”
त्यांच्या या वक्तव्यामुळे लग्न, नाती आणि स्वतःच्या आयुष्याबाबत तरुण पिढीने स्वतःचे निर्णय विचारपूर्वक घ्यावेत, हा मुद्दा पुन्हा चर्चेत आला आहे.
मौसमी चॅटर्जी यांनी याआधी आपल्या लग्नाबद्दलचा एक रंजक किस्साही सांगितला होता. ‘बालिका वधू’ चित्रपटाच्या यशानंतर त्यांना लग्नाचे अनेक प्रस्ताव येऊ लागले होते. त्याच काळात त्यांच्या आजारी मावशीची प्रकृती गंभीर होती.
भवानीपूरमध्ये राहणाऱ्या त्यांच्या मावशीला कॅन्सर झाला होता आणि आजार शेवटच्या टप्प्यात होता. मौसमी यांच्या लग्नाला उपस्थित राहण्याची इच्छा त्यांनी व्यक्त केली होती. त्यांनी मौसमी यांचे होणारे सासरे हेमंत कुमार यांचा हात धरून, आपण मौसमीच्या लग्नाला उपस्थित राहू शकू का, अशी विचारणा केली.
हेमंत कुमार यांनी होकार दिल्यानंतर मौसमी यांचं लग्न अवघ्या एका महिन्यात ठरवण्यात आलं. अशा प्रकारे लहान वयातच त्यांचा विवाह झाला. आज अनेक वर्षांनंतर त्या आपल्या मुलीला मात्र लग्नाची घाई न करण्याचा आणि स्वतःच्या आयुष्याबाबत विचार करून निर्णय घेण्याचा सल्ला देताना दिसतात.
Salman Khan: तमन्ना भाटियाचा आवाज ऐकून सलमान खान भारावला; ‘बिग बॉस २०’मध्ये केलं भरभरून कौतुक
.png "Videos"){kind=small}
