(फोटो सौजन्य- सोशल मीडिया)
Nimrat Kaur: अभिनेत्री निमरत कौर हिने तिच्या शहीद वडिलांच्या आठवणींना उजाळा दिला आहे. निमरतचे वडील मेजर भूपेंद्र सिंह हे ३२ वर्षांपूर्वी काश्मीरमध्ये झालेल्या एका दहशतवादी हल्ल्यात शहीद झाले होते. नुकत्याच एएनआयला दिलेल्या मुलाखतीत निमरतने वडिलांच्या हत्येची घटना, त्यानंतर कुटुंबावर ओढवलेलं दुःख आणि आईने दोन्ही मुलींचा केलेला सांभाळ याबद्दल सांगितलं.
निमरतने सांगितलं की, तिच्या वडिलांचं एका सामान्य कामाच्या दिवशी अपहरण करण्यात आलं होतं. दहशतवाद्यांनी सैनिकांचा वेश परिधान केला होता. ते कर्तव्यावर जात असताना आणि परत येत असताना त्यांना या लोकांनी सोबत नेलं.
“एका सामान्य कामाच्या दिवशी त्यांचं अपहरण झालं. ते त्यांच्या कर्तव्यासाठी कुठेतरी जात होते आणि परत येत असताना सैनिकांचा वेश धारण केलेल्या लोकांनी त्यांचं अपहरण केलं. त्यांनी लष्करी गणवेश घातला होता आणि ते त्यांना सोबत घेऊन गेले,” असं निमरतने सांगितलं.
सात दिवस दहशतवाद्यांकडून वेगवेगळ्या मागण्या
वडिलांचं अपहरण झाल्यानंतर कुटुंबाला त्यांच्या सुटकेची आशा होती. मात्र, सात दिवसांच्या कालावधीत दहशतवाद्यांकडून अनेक मागण्या करण्यात आल्या. यापैकी काही मागण्या तुरुंगात असलेल्या व्यक्तींच्या सुटकेशी संबंधित होत्या.
निमरतने सांगितलं की, सातव्या दिवशी कुटुंबाला तिच्या वडिलांची हत्या झाल्याची बातमी मिळाली.
‘पहिल्यांदा कामावर जाताना पाहिलं, दुसऱ्यांदा शवपेटीत’
वडिलांच्या आठवणी सांगताना निमरतने त्या काळातील धक्कादायक अनुभव शेअर केला. ती म्हणाली, “त्या दिवशी सकाळी मी माझ्या वडिलांना कामावर जाताना पाहिलं. मला फक्त ते निघून गेल्याचं आठवतं आणि त्यानंतर जेव्हा मी त्यांना दुसऱ्यांदा पाहिलं, तेव्हा ते शवपेटीत होते.”
या घटनेतून आपल्याला कधीच पूर्णपणे बाहेर पडता आलं नाही, असंही तिने सांगितलं.
वडिलांच्या निधनानंतर निमरतची आई त्यावेळी खूप तरुण होती. त्यांनी निमरत आणि तिच्या बहिणीचा एकट्याने सांभाळ केला. कठीण परिस्थितीत आईने ज्या पद्धतीने कुटुंबाला सावरलं, त्याबद्दल निमरतने तिचं कौतुक केलं.
“ज्या प्रकारे माझ्या आईने आमचं संगोपन केलं आणि नंतर तिचं व आमचं आयुष्य पुन्हा उभारलं, ते फार कमी स्त्रिया एकट्याने इतक्या सन्मानाने आणि सहजतेने करू शकल्या असत्या,” असं निमरतने म्हटलं.
‘बाबांनी देशाची सेवा करून ३२ वर्षे झाली’
वडिलांच्या पुण्यतिथीनिमित्त निमरतने त्यांची आठवण काढत एक भावनिक पोस्टही शेअर केली होती. “बाबांनी देशाची सेवा करून ३२ वर्षे झाली आहेत. ते एक खरे सुपुत्र, एक खरे नायक, एक अद्भुत पती आणि वडील होते. सर्वात महत्त्वाचं म्हणजे, ते सिंहासारखे धाडसी सैनिक होते,” अशा शब्दांत तिने वडिलांना आदरांजली वाहिली.
.png "Videos"){kind=small}
