Prajakta Mali: प्राजक्ता माळीचा ‘तो’ लूक पाहून धक्का बसेल! (फोटो सौजन्य- सोशलमीडिया)
Prajakta Mali Devkhel 2 Teaser: मराठी मनोरंजनविश्वात पुन्हा एकदा ‘देवखेळ’ची चर्चा सुरू झाली आहे. या वेबसीरिजच्या पहिल्या भागानंतर आता निर्माते दुसरा अध्याय घेऊन सज्ज झाले आहेत. प्राजक्ता माळी आणि अंकुश चौधरी यांच्या प्रमुख भूमिका असलेल्या ‘देवखेळ 2’चा टीझर नुकताच समोर आला असून, पहिल्याच झलकने प्रेक्षकांच्या मनात अनेक प्रश्न निर्माण केले आहेत. पहिल्या भागात दिसलेल्या कथानकापेक्षा यावेळी वातावरण अधिक गडद आणि रहस्यमय असल्याचे टीझरवरून जाणवते. काही प्रसंग पाहताना अंगावर काटा आणणारे वातावरण दिसते, तर काही दृश्ये पुढे नेमके काय होणार, याची उत्सुकता वाढवतात. विशेष म्हणजे संपूर्ण कथा उघड न करता निर्मात्यांनी केवळ काही महत्त्वाच्या झलक दाखवल्या आहेत.
या टीझरमधील सर्वाधिक लक्ष वेधून घेणारी गोष्ट म्हणजे प्राजक्ता माळीचा लूक. तिच्या कारकिर्दीत प्रेक्षकांनी वेगवेगळ्या भूमिका पाहिल्या आहेत. मात्र या मालिकेतील तिची व्यक्तिरेखा काहीशी वेगळी आणि गूढ दिसत आहे. प्राजक्ताच्या चेहऱ्यावरील भाव, तिच्याभोवतीचे वातावरण आणि कथेत तिची नेमकी भूमिका काय आहे, याबाबत उत्सुकता निर्माण झाली आहे. ‘सारिका’ हे तिच्या व्यक्तिरेखेचे नाव असून, दुसऱ्या भागात तिच्याभोवतीचे रहस्य अधिक उलगडणार असल्याचे संकेत मिळतात.
प्राजक्ताने सोशल मीडियावर टीझर शेअर करत दुसऱ्या भागात नवे रहस्य आणि नवा खून पाहायला मिळणार असल्याचे सूचित केले आहे. त्यामुळे या वेळी कथेत कोणाचा मृत्यू होतो आणि त्यामागचे कारण काय आहे, हा प्रश्न प्रेक्षकांना पडला आहे.
‘देवखेळ’चा पहिला भाग फेब्रुवारी २०२६ मध्ये प्रदर्शित झाला होता. कोकणातील शंकासूर परंपरेची पार्श्वभूमी घेत त्यावर काल्पनिक कथा उभी करण्यात आली होती. अंकुश चौधरी आणि प्राजक्ता माळी यांच्या अभिनयामुळे या मालिकेकडे प्रेक्षकांचे लक्ष वेधले गेले. आता दुसऱ्या भागात रहस्य आणि थराराची पातळी आणखी वाढवण्याचा प्रयत्न दिसतो. टीझरमध्ये फारशी माहिती न देता काही धक्कादायक दृश्ये दाखवण्यात आली आहेत. त्यामुळे मालिकेची खरी कथा नेमकी कोणत्या दिशेने जाणार, हे अद्याप गुलदस्त्यात आहे.
पहिल्या भागाच्या प्रदर्शनानंतर या मालिकेवरून कोकणात मोठा वाद निर्माण झाला होता. स्थानिक नागरिकांनी मालिकेत दाखवलेल्या नमन-खेळे या पारंपरिक लोककलेच्या चित्रणावर आक्षेप घेतला होता. शंकासूर या लोकपरंपरेतील दैवताचे चित्रण योग्य पद्धतीने झाले नसल्याचीही नाराजी व्यक्त करण्यात आली होती. या प्रकरणाचा आवाज पुढे विधानसभेपर्यंत पोहोचला होता. त्यामुळे ‘देवखेळ’ ही केवळ मनोरंजनाची मालिका न राहता तिच्या आशयावरूनही चर्चेत आली होती.
आता ‘देवखेळ 2’समोर एकीकडे पहिल्या भागाची उत्सुकता कायम ठेवण्याचे, तर दुसरीकडे नव्या कथेला प्रेक्षकांशी जोडण्याचे आव्हान आहे. टीझरने मात्र सुरुवातीलाच वातावरण तयार केले आहे. प्राजक्ताची गूढ व्यक्तिरेखा, अंकुश चौधरीची उपस्थिती आणि नव्या हत्येभोवती फिरणारे रहस्य यामुळे दुसऱ्या भागाची उत्सुकता नक्कीच वाढली आहे. आता या गूढ खेळामागचे सत्य काय आहे आणि ‘सारिका’ या सगळ्या घटनांमध्ये नेमकी कुठे उभी आहे, याचे उत्तर मालिका प्रदर्शित झाल्यानंतरच मिळणार आहे.
.png "Videos"){kind=small}
