( फोटो सौजन्य- सोशल मीडिया)
Pranit More: स्टँड-अप कॉमेडियन प्रणित मोरे पुन्हा एकदा चर्चेत आला आहे. यावेळी कारण कोणताही नवीन वाद नसून त्याचे पुनरागमन आहे. ३७० बिर्याणी वादानंतर काही काळ कॉमेडीपासून दूर राहिलेल्या प्रणितने आता ‘घायल’ या नव्या स्टँड-अप स्पेशलची घोषणा केली आहे. मात्र, या घोषणेनंतर सोशल मीडियावर त्याची तुलना कॉमेडियन समय रैनाशी केली जात असून काही नेटकऱ्यांनी त्याला ट्रोल करण्यास सुरुवात केली आहे.
प्रणित मोरेने आपल्या अधिकृत इन्स्टाग्राम अकाउंटवर ‘घायल’चे पोस्टर शेअर करत लिहिले, “जे घडलं ते मी बदलू शकत नाही, पण त्यामुळे मी कसा माणूस बनतो हे माझ्या हातात आहे. ‘घायल’ ही त्याच प्रवासाची कहाणी आहे. याची सुरुवात मुंबईतून होते.” या पोस्टनंतर चाहत्यांसह ट्रोलर्सच्याही प्रतिक्रिया उमटल्या.
प्रणितच्या नव्या स्टँड-अप स्पेशलची तुलना कॉमेडियन समय रैनाच्या ‘Still Alive’ कमबॅक शोशी केली जात आहे. काही नेटकऱ्यांनी, “तू समय रैना नाहीस, त्याची नक्कल करू नकोस,” अशा प्रतिक्रिया देत प्रणितवर टीका केली. तर काहींनी दोन्ही प्रकरणांची तुलना योग्य नसल्याचे मत व्यक्त केले.
ट्रोलिंगदरम्यान प्रणितच्या चाहत्यांनी त्याच्या पुनरागमनाचं स्वागत केलं. “भाऊ, तुमची खूप आठवण आली,” आणि “किंग पुन्हा मनोरंजनासाठी परतला आहे,” अशा प्रतिक्रिया देत अनेकांनी त्याला शुभेच्छा दिल्या.
जून २०२६ मध्ये गुरुग्राममधील एका स्टँड-अप शोदरम्यान ‘क्राउडवर्क’ सेगमेंटमध्ये एका प्रेक्षकाने डेटदरम्यान ३७० किमतीच्या बिर्याणीबाबत केलेल्या वादग्रस्त वक्तव्यावर प्रणित हसल्याचा व्हिडिओ सोशल मीडियावर व्हायरल झाला होता. त्यानंतर संमती आणि महिलांच्या सुरक्षेच्या मुद्द्यावर मोठा वाद निर्माण झाला. वाढत्या टीकेनंतर प्रणितने सार्वजनिक माफी मागितली आणि त्या क्षणी प्रेक्षकाला थांबवायला हवे होते, अशी कबुली दिली. या प्रकरणाची राष्ट्रीय महिला आयोगाने दखल घेतली होती आणि त्यानंतर संबंधित यंत्रणांकडून गुन्हाही दाखल करण्यात आला होता
.png "Videos"){kind=small}
