बुधवार, 30 सप्टेंबर 2026
Houn Jau De Song Release
आगामी ‘अफरातफरी’ चित्रपटातील ‘होऊन जाऊ दे’ हे नवं गाणं प्रदर्शित झालं असून, या गाण्यातून चित्रपटाचा रंगतदार अंदाज पाहायला मिळत आहे. ग्लॅमरस लूक, रंगीबेरंगी रोषणाई, मस्तीचा मूड आणि ठेका धरायला लावणारं संगीत अशा सगळ्याच गोष्टींचा मेळ या गाण्यात साधण्यात आला आहे. ‘केरळा स्टोरी’ फेम प्रणाली घोगरे हिच्या आकर्षक अंदाजामुळे गाण्याला आणखीनच रंगत आली असून, तिच्या अदांमुळे ‘होऊन जाऊ दे’ हे गाणं लक्ष वेधून घेत आहे.
या गाण्याचं आणखी एक वैशिष्ट्य म्हणजे हे संपूर्ण गाणं ४८ फ्रेम्स प्रति सेकंद या वेगाने लिपसिंक करण्यात आलं आहे. मराठी चित्रपटात अशा पद्धतीने संपूर्ण गाण्यावर हा प्रयोग पहिल्यांदाच करण्यात आला आहे. या आधी १९९२ साली ‘जो जीता वही सिकंदर’ या चित्रपटात आमिर खानवर चित्रित करण्यात आलेल्या ‘पहला नशा, पहला खुमार’ या गाण्यात ४८ फ्रेम्स प्रति सेकंद या वेगाने लिपसिंक करण्याचा प्रयोग करण्यात आला होता. त्यानंतरही या तंत्राचा वापर करत अनेक प्रयोग झाले, मात्र संपूर्ण गाणं ४८ फ्रेम्स प्रति सेकंद या वेगाने लिपसिंक करून चित्रित करण्याचा प्रयोग याआधी पाहायला मिळाला नाही. शूटिंगच्या दृष्टीने तसेच तांत्रिकदृष्ट्याही हा प्रयोग आव्हानात्मक होता.
गाण्यातील पत्त्यांचा खेळ, झगमगणारं वातावरण आणि कलाकारांचा बिनधास्त अंदाज यामुळे ‘होऊन जाऊ दे’ हे गाणं ‘अफरातफरी’च्या मस्तीखोर विश्वाला साजेसा एक रंगतदार संगीतसोहळा ठरत आहे. गाण्याच्या तालातली ऊर्जा आणि त्याला लाभलेला ग्लॅमरस टच यामुळे प्रेक्षकांनाही या गाण्याच्या तालावर थिरकण्याचा मोह आवरणार नाही. मुग्धा कऱ्हाडे यांच्या दमदार आवाजाने सजलेल्या या गाण्याला वरुण लिखाते यांनी संगीत दिलं आहे, तर मंदार चोळकर यांनी गीत लिहिले आहे. तर राहुल ठोंबरे यांचे नृत्य दिग्दर्शन या गाण्याला लाभले आहे.
या गाण्याबद्दल संगीत दिग्दर्शक वरूण लिखाते म्हणाले, ‘’होऊन जाऊ दे’ हे गाणं तयार करताना त्यातली मस्ती, उत्साह आणि ग्लॅमर प्रेक्षकांपर्यंत पोहोचवण्याचा प्रयत्न केला आहे. गाण्याचा मूडच असा आहे की, पहिल्याच ठेक्यावर पाय थिरकायला हवेत. मुग्धा कऱ्हाडे यांच्या दमदार आवाजामुळे गाण्याला एक वेगळीच ऊर्जा मिळाली आहे. ‘अफरातफरी’च्या धमाल वातावरणाला साजेसं हे गाणं प्रेक्षकांना नक्कीच एन्जॉय करायला लावेल.’’
दिग्दर्शक मिलिंद झुंबर कवडे म्हणतात, “‘होऊन जाऊ दे’ हे गाणं ‘अफरातफरी’च्या धमाल आणि मस्तीच्या वातावरणाला साजेसं आहे. गाण्यात ग्लॅमरसोबतच कलाकारांचा मजेशीर अंदाज पाहायला मिळतो. या गाण्यात ४८ फ्रेम्स प्रति सेकंद या वेगाने संपूर्ण गाणं लिपसिंक करण्याचा प्रयोग आम्ही केला आहे. हा प्रयोग शूटिंगच्या दृष्टीने आणि तांत्रिकदृष्ट्याही खूप आव्हानात्मक होता. गाण्याच्या प्रत्येक ठेक्याशी आणि कलाकारांच्या हालचालींशी लिपसिंक अचूक जुळवणं गरजेचं होतं. त्यामुळे या गाण्याच्या शूटिंगमध्ये खूप बारकाईने काम करावं लागलं. कलाकारांनीही ते खूप छान एन्जॉय केलं आहे. हे गाणं प्रेक्षकांनाही नक्कीच आवडेल आणि त्यांना त्याच्या तालावर थिरकायला लावेल.”
मिलिंद झुंबर कवडे दिग्दर्शित व स्कायलाईन सिनेमॅटिक आणि येन मुव्ही स्टुडिओज प्रस्तुत, आऊट ऑफ द बॉक्स फिल्म्सच्या सहयोगाने तयार झालेला हा चित्रपट येत्या ९ ऑक्टोबरला प्रेक्षकांच्या भेटीला येणार आहे. या चित्रपटात मोहन आगाशे, शशांक शेंडे, संजय नार्वेकर, ओंकार भोजने, नेहा खान, प्राजक्ता हनमघर, असावरी जोशी, हेमंत पाटील आणि किरण माने यांसारख्या दमदार कलाकारांची फौज पाहायला मिळणार आहे.
